Jeremiah 35 - Zanniat Bible

Jeremiah Le Rechab Mite

¹ Josiah ai fapa Jehoiakim tu Judah kumpibawi a cang awng laiah Bawipa in kaimah hnenah,

² “Rechab miphunte ai innsang hmuahhmuah ah feh tulai thu rel ta tu. Biakinn songai a khan pakhatkhat songah hoi tulai cabitti pe tu,” tiin i ti i.

³ Ciamanin Rechab hinte, Habazziniah ai fapa a dang Jeremiah ai fapa Jaazaniah le a unaute le a fapate khiah,

⁴ Biakinn ah hoi ing. Igdaliah ai fapa prophet Hanan ai hnuahlunte ai khan ah umruai ing. Hemi khan tu Biakinn ai thunaitu bawi Shallum ai fapa Maasaiah khan vumah i ai a dang bawite ai khan hiangah i.

⁵ Cen khuat le pakankum dim in cabitti Rechab mite hmaiah dah ai, “Cabitti ding tu ih,” ti ing.

⁶ Ikhalselai anite in, “Cabitti ding tlang lo i ing. Kin pu Rechab ai fapa Jonadab in kaimah ituseh kin tesinfate ituseh cabitti ding tuh hrimhrim lo i si kin ti i.

⁷ Inn sa khai kin kham i; lo vai le cabit vuan bawn khai kin siang lo i; a lai khai lai tuh lo i si, ti i. Hemi ram song mikhual bangin i umhnak ramah catloin kin umthilhnak tuhin ponhlam songah um tuh ngio in thu kin pe i.

⁸ Jonadab in i relhnak le a thupeciahnak hmuahhmuah hlun tlang sio i ing. Kinmah in cabitti ding awng lo i ing; kin nupuite, kin fanu le kin fapate inkhai ding awng lo i.

^9-10 Kin umhnak kin inn hrangah tiin inn sa awng lo i ing; Ponhlam songah um tlang i ing; cabit vuan le lo le rong khai nai lo i ing. Kin pu Jonadab thupehnak hmuahhmuah a khim in hlun sio i ing.

¹¹ Ikhalselai kumpibawi Nebuchadnezzar in he ram a tawng fangin Babylon ralkap le Syria ralkapte lau in tlan ai Jerusalem ah feh tuh ising ti ai ciamanin tun Jerusalem ah um i ing,” tiin ti tlang i.

^12-13 Ciafangin Cungnungber Bawipa, Israel ai Pathian in Judah mi le Jerusalem mite hnenah feh tuhin le hetihin rel tuhin i ruai i, “Kaimah Bawipa in, zaimanin i thuhluphnak ngai ning nuam tlang lo ai i thupehnak hlun ning nuam lo i? tiin ning zawt ing.

¹⁴ Rechab miphun tu amahte pu Jonadab ai thupehnak khiah a tesinfate in hlun tlang ai tunnia tianin aisu inkhai cabitti ding lo i. Ikhalselai ning tu kaimah in ning rel thliahthlo napui i thu hlun ning nuam lo i.

¹⁵ I sal prophette pakhat hnua pakhat ning hnenah hlat napui a dikcang bawn ai thilsual bawnhnak nuncan hlum tuhin ning rel thliahthlo ing. Ning pupate le ningmah hnenai i pehnak he ramah catloin ning umthilhnak tuhin Pathian dangte na ruaihtu tuh loin le bia tuh loin ning rel i, ralringhnak ning pe i. Ikhalselai i thurelhnak tu ngai tlang lo ai zaikhai siar lo i si.

¹⁶ Jonadab ai tesinfate in a pu ai thupehnak hlun tlang napui ning cenin i thu hlun lo i si.

¹⁷ Ciamanin ningmah Judah mi le Jerusalem mite ning vumah kaimah Cungnungber Bawipa, Israel ai Pathian in ning thukham siatsuahhnak hmuahhmuah hlengruai tuh ing. Hemi bangin ning vumah hlengruai tuh ing, zaimantifangin ning hnenah i pong fangin ngai ning nuam lo ai ning ko fangin i awi ning nuam lo i,” tiin ti i.

¹⁸ Cen Rechab hinte hnenah, “Cungnungber Bawipa, Israel ai Pathian in ‘Ning pu Jonadab ai thupehnak hlun tlang zo sio i si; a thuzirhhnak khai ngai ai a relhnak dan hmuahhmuah bawn sio i si.

¹⁹ Ciamanin kaimah Cungnungber Bawipa, Israel ai Pathian in thu ning kham ing. Rechab ai fapa in i na ruaihtu tuhin tesinfa fapa catloin nai tuh ngiode i,’ ti i,” tiin rel ing.