Jeremiah 32 - Zanniat Bible

Jeremiah In Loram Lai I

¹ Bawipa in, Zedekiah ai Judah kumpibawi a cang kum hrahnak ah i hnenah thu rel i. Ciami kum tu Nebuchadnezzar Babylon kumpibawi a canghnak kum hlairiathnak kum i ve i.

² Cia kum ah Babylon kumpibawi ralkapte in Jerusalem tawng ai kai tu kumpibawi inn kiltute khan pakhat songah i khum i.

³ Kumpibawi Zedekiah in ciata ah thawng ah i toh ai i tohhnak thu tu, ‘Bawipa ai ponghnak na phuang manin,’ i ti i. Bawipa in hetihin i rel i, “Babylon kumpibawi in he khuapui heh langruai tuhai,

⁴ Kumpibawi Zedekiah khai luat tuh lo i. Babylon kumpibawi kut songah pehnak tuar tuh i. Hmaiton in hmu dun tuhai pumpak in pon dun tuh i.

⁵ Zedekiah tu Babylon ah fehpui tuhai a thu i rel hlanlo ciata ah um tuh i. Babylon mite tawng inkhai hlawhtling tuh lo i. Kaimah Bawipa in rel zo ing,” tiin ti i.

⁶ Bawipa in thurel ai,

⁷ I pakhatta Shallum ai fapa Hanamel tu kaimah hnenah kawi tuhai Benjamin ram song Anathoth khua ai a lo khiah kaimah in lai tuhin i tawk tuh i; zaimantifangin a songkhat lakah a nong ber ing ai kaimah caah a laithiltu ing.

⁸ Cen Bawipa in a rel ben sawng fangin Hanamel tu i umhnak khan songah kawi ai lo lai tuhin i ruai i. Ciamanin Bawipa in kaimah hnenah a ponghnak heh a dik i, ti ling ing.

⁹ Hanamel hnenin lo khiah lai ai tangka tu cuai teh i ing. A man tu ngun tangka in hlaisarih man i.

¹⁰ Lungkhimhnak laikhen bawn ai i hming ngan ing. Thulingpuitu ko ai tangka tu cuai in teh i ing.

¹¹ Lo laihnak laikhen khiah pahnih in bawn i ing. Pakhat tu tacik khenhnak i ai a dang pakhat tu tacik khen lo i. Kaimah ca tuhin a pahnih in lang ai,

¹² Maisaiah ai fasuan Neriah ai fapa Baruch hnenah pe ing. Hanamel mithmuh ah le lo laihnak hming ngantu le thulingtute le ciami khan songai a totute mithmuh ah Baruch hnenah pe ing.

¹³ Amahte veksen hmaiah Baruch hnenah,

¹⁴ “Cungnungber Bawipa, Israel ai Pathian in hemi lo laihnak laikhen heh kum raipui tian pai loniu in um tuhin tacik khenhnak ituseh, khen lohnak ituseh, kum raipui hnawm tuh loin lai bel songah phatak niu in dah tuhin thu ning pe i.

¹⁵ Cungnungber Bawipa, Israel ai Pathian in inn le lo le cabit vuante khai he ram songah lai leh tuh i,” tiin ti i.

Jeremiah Sawngenhnak

¹⁶ Lo laihnak laikhen heh Baruch hnenah i pe hnuaah sawngen ing:

¹⁷ “A lianber Bawipa, lai le van heh na hathnak le na huham in bawn isi. Nangmah caah a harhnak zaikhai um lo i.

¹⁸ Minung siar cawk lo vumah a kho ngai na ithnak larruai zo isi, ikhalselai a nu le pate sualhnak manin mi cawh fawn isi; nang tu mi menma lo le mi thupui Pathian isi, nang tu Cungnungber Bawipa isi.

¹⁹ Nang tu thil ruatthiamtu, ngaihsunurkul thil bawntu isi. Minung bawnhnak hmuahhmuah hmu sio ai amahte perhnak bangin lehsawng pe isi.

²⁰ Kum raipui laiah Egypt ramah thil khuaruahhar le thil ngaihsunurkul bawn ai tunnia tianin Israel mite lakah ituseh, miphun dangdang lakah ituseh, bawn lai ngio isi. Ciamanin khuahacang ah hming na thang i.

²¹ Khuaruahhar le thil ngaihsunurkul na bawnhnak in kin ralte kihruai ai na huham le na hathnak hmang in Israel mite khiah Egypt ram an hoi isi.

²² Hemi ram kawlpawhnawi le khoitizu a luanghnak ram heh amahte pupate hnenah thu i khamciahnak bangin anite hnenah pe isi.

²³ Ikhalselai he ram song hleng tlang ai a khur fangin na thukham hlun lo i; na thuzirhhnak bangin hlun fawn lo i. Anite bawn tuhai thu na pehnak hmuahhmuah zaikhai bawn lo i. Ciamanin hebang siatsuahhnak heh anite vumah hlengruai isi.

²⁴ “Babylon mite in a khuapui lang tuhin a pualam in laipua silh tlang ai tawng dekdo i. Raltawng, rian tlung le urhnak in he khuapui khiah amahte kut songah hlengruai tuh i. Na ponghnak hmuahhmuah khim sio i ti hmu hlen isi.

²⁵ Ikhalselai, Aw Cungnungber Bawipa, Babylon mite in he khuapui lang dawn napui hang ai thu lingpuitute mithmuh ah lo lai tuhin thu i pe fawn isi,” tiin ti ing.

²⁶ Ciata ah Bawipa in i hnenah,

²⁷ “Kai tu Bawipa ing, mi zongzong ai Pathian ing. Kaimah caah zaikhai harhnak um lo i.

²⁸ Hemi khuapui tu Babylon kumpibawi Nebuchadnezzar le a ralkapte kut ah pe tuh ing, lang tuhai,

²⁹ mai in tai tuh i. Hemite in amahte inn vumah Baal khuavang hnenah rimhmui tai ai khuavang dangdang hnenah cabitti pe in burh manin thin i raw i. Hemite tu a innte thawn ziam rori in tai tuh sio i.

³⁰ Amahte tluanthu a hampan in Israel mite le Judah mite in thin i tokruai ai amahte thil bawnhnak hmuahhmuah in i thin i rawruai zo i.

³¹ Hemi khuapui song mite in he khuapui a tungding ai panin thin i rawruai zo i. Siatsuah tuhin ruatcat zo ing.

³² Zaimantifangin Judah mi le Jerusalem mite in a kumpibawi le prophette thawn thilsual bawn tlang i.

³³ Amahte in i zam ai zirh thliahthlo napui zaikhai ngai lo i, zir khai zir nuam tlang lo i.

³⁴ Ningdulkul milimte rin kaimah biakinn hrangah sahnak biakinn songah dah ai ningrimtiar zo i.

³⁵ Amahte fanu le fapate Molech khuavang hnenah hibawlhnak pe tuhin Baal khuavang hnenah Hinnom phairawn ah puleng tiang i. Ciatihin bawn tuhin thupe lo ing; ciatihin bawn tuhai Judah mite sualruai tuh tu a ruat rin ruat awng lo ing,” tiin ti i.

Umlamhnak Thukham

³⁶ Bawipa Israel ai Pathian in kaimah hnenah, “Jeremiah, raltawng, rian tlung le urhnak in he khuapui khiah Babylon kumpibawi kut ah hlengruai tuh ing, tiin hemite in ti i. Tunai i pong tuhhnak heh ngai rih tu!

³⁷ I thinrawhnak le i thintokhnak manin ram tampui ai i piakruaihnak in a nite tu khawm tuh ing; he ramah letruai leh tuhai muang ngai in um tuh i.

³⁸ Anite tu i minung i ai kaimah heh anite Pathian tuh ing.

³⁹ Anite nunhnak ah tumtekhnak thil pakhat ian pe tuh ing: anite phathnak le a tesinfate phathnak hrangah catloin in kai tu upathnak i pe tuh i.

⁴⁰ Anite thawn kumzangza hrangah thukham bawn tuh ing. Anite caah thilpha bawn com tuh awng lo ing; amahte thinlung veksen thawn kaimah i kihzah tuhin bawn tuhai ciatihin kaimah hnenin pial tuh nawn lo i.

⁴¹ Anite caah thilpha bawn heh nuam ti tuhai he ramah a zomzet in khoruai tuh ing.

⁴² “Anite vumah thil poimawh i hlengruai zo bangin anite hnenah thilpha i thukhamhnak tu khimruai tuh betbo ing.

⁴³ Mite in he ram tu nelrawn bang, minung le ramsa um lo ramah cang tuhai Babylon mite ai kut ah pe tuh i tiin rel tlang i. Ikhalselai he ramah lo le lairamte lai leh tuh diamdo i.

⁴⁴ Mite in lo lai tlang tuh i, amahte laidunhnak laikhen ah hming ngan tuh i, tacik khen tuhai thu lingpuitu khai um tuh i. Hemi bang tu Benjamin ram songah le Jerusalem hiang khuatenaute ah, Judah ram khua songah le tlang vum ram khuate ah le Judah ram hlang lam ram songah khai bawn tuh i. Zaimantifangin ral ai pom mite tu amahte ram songah umruai leh tuh ing. Kaimah Bawipa in rel zo ing,” tiin ti i.