Jeremiah 30 - Zanniat Bible

A Minung Hnenah Bawipa Ai Thukhamhnak

¹ Bawipa, Israel ai Pathian in kaimah hnenah,

² “Kaimah relhnak hmuahhmuah heh laibu songah ngan tu.

³ Zaimantifangin i minung Israel le Judah mite i letruaihnak can hleng tuh i. Amahte pupate hnenah i pe awnghnak ramah letruai tuhai amahte ai cang leh tuh i. Kaimah Bawipa in rel zo ing,” ti i.

⁴ Bawipa in Israel le Judah mite hnenah,

⁵ “Thinlauhnak awthawm za ing, daphnak ilo i; Thinlau ai auhnak awthawm i.

⁶ Com rih tu ilai ruat tu ih! Pasal in fate hing thil tuh im? Zaimanin nupang nau nai dawn bangin, pasalte in amahte pum dom dun tlang hnelhno ini? Zaimanin amahte hmai khai dul sio ini?

⁷ Kihkul le tihik nia hleng tuh i. Ciabang nia tu um awng kel lo i; I minung caah thincawlhnak nia i. Ikhalselai tuar ben tuh i,” tiin ti i.

⁸ Cungnungber Bawipa in, “Ciami nia a hleng fangin amahte hawng ai hak ek tuh sek ai amahte thir cikcin tu lon sah tuh sek ing. Ramdang mite ai sal ah cang tuh nawn lo i.

⁹ Kaimah Bawipa a Pathian khiah na i ruaih tuhai kumpibawi in i bawn tuhhnak David ai tesinfa khiah ruaih tlang tuh sawn i.

¹⁰ “I minungte, kih mah ih; Israel mite lau mah ih. Ram hlapui an ning o tuh ing, Sal ning tanghnak ram an. Ning ramah let tlang leh tuhai, hlamuang niu in um tlang leh tuh i si. Him ngai in um tuhai thin ning lau tuh lo i.

¹¹ Ning hnenah kawi tuhai ning hup tuh ing. I piakruaihnak ram tu siatsuah tuh ing. Ikhalselai ning tu ning hnawmcan tuh lo ing. Ning cawh loin um tuh lo ing; Ikhalselai ningmah i cawh fangin dikcanglairelhnak thawn bawn tuh ing. Kaimah Bawipa in rel zo ing,” tiin ti i.

¹² Bawipa in a minungte hnenah, “Ning hmaihma heh lawm thil tuh lo i; Ning maliamhnak heh a roh ze i.

¹³ Ning tuamhlawmtu aisu khai um lo i, Na hmaihma mat tuhin si um fawn lo i. Ning cakhnak tuhin umlamhnak um lo i.

¹⁴ Na ittute in na hai zo sio i. Anite in na van tlang nawn lo i. Ral bangin na bawn ing; Cawh ning tuarhnak heh a roh ze i. Zaimantifangin amahte sualhnak tam ai, Ning phatlohnak heh a roh ze i.

¹⁵ Ning maliamhnak manin phuncam nawn mah ih; Ning cakhnak tuh um lo i. Hetihin ning cawh ing, Zaimantifangin ning sualhnak tam ai, Ning phatlohnak a tam ze manin i.

¹⁶ Ikhalselai tunin tu ning thon awngtute khiah, thon tuar tuh ve i. Ning ralte khiah ralpom mi ah cang tlang tuh i. Zoh ning suam awngtute tu, zohsuamhnak tuar tlang tuh ve i. Ning roktute tu rokhnak tuar tuh ve i.

¹⁷ Nun ning cakruai tuh ing, Ning hmaihmate tu potruai tuh ing; Ning ralte in, ‘Zion tu hnawl mi le thuih mi i; Aisu inkhai zaikhai siar lo i,’ ti ta inkhai, Kaimah Bawipa in pong zo ing,” ti i.

¹⁸ Bawipa in, “I minungte tu, Amahte ramah letruai tuhai, Amahte innsang ṭen ah ninghiohnak nai tuh ing. Jerusalem tu saleh tuhai, A kumpibawi inn tu tungding leh tuh i.

¹⁹ Ciata ai a umtute in, Thangphathnak la sa tuh i; lungawi in au tuh i. Hmuifu pe tuhai pungzai tuh diamdo i. I hmuifu pehnak manin upathnak ngah tuh i.

²⁰ Hlanlai ai a nai awnghnak naupang bangin nai leh tuh i. Amahte khua le ram tu kho ngai in tungdingruai leh tuh ing. A zohsuamtute tu cawh tuh ing.

^21-22 Anite uktu tu a miphun songin suak tuh i. Amahte kumpibawi fapa tu a miphun i tuh i. Ciami pa i ko fangin i nong tuh i. Aisu in a ko lopui in kawi ngam tuh i? Anite tu i minung cang tuhai, Kai tu a Pathian i tuh ing. Kaimah Bawipa in rel zo ing,” tiin ti i.

^23-24 Bawipa ai thinrawhnak tu khuahu bang i. A huk dumdo khuahu bang i ai misualte ai lu vumah huk tuh i. Bawn a tumhnak a bawn sek hlanlo bo tuh lo i. Hemi thu tu a hleng tuhhnak can ah a minungte in fiang ngai in ling tuh i.