Jeremiah 3 - Zanniat Bible

Hlotlau Israel

¹ Bawipa in, “Mi pakhat tu a nupui ma ai pasal dang a pa leh hnuaah tu ciami nu khiah a nupui tuhin lang leh tuh im? Lang leh lekhaw amahte ram ningrimtiar i. Ikhalselai Israel, nang in tu daihtu tampui na nai hnuaah i hnenah let na nuam i.

² Tlang phundir hmuahhmuah khiah sik tucuk! Hlotlau na per lohnak hmun pakhat tal um awm? Nelrawn ramkhing ah Arab in a ralte a bawh bangin lampui cangcang ah na daihtu mi iang isi. Hlotlau na ihnak in he ram heh ningrimtiar zo sio isi.

³ Ciamanin ruahsi thil lo ai khuasik ruah tianin a si lohnak khiah! Na hmel tianin hlotlau na bang zo ai zakthi khai nai nawn lo isi.

⁴ “Tun i hnenah, ‘Nang tu i papui isi ai i naupang lai in i daih awngtu isi.

⁵ I vumah kumzangza in thin na raw tuh lo ai thintok ngiode malaw maw,’ i ti i. Aw Israel, na hmurka incen ciatihin pong isi, ikhalselai thilsual tu bawn thil zah in bawn fawn isi,” tiin ti i.

Israel le Judah Sualsirhnak Kul I

⁶ Josiah kumpibawi awng lai ah, Bawipa in kaimah hnenah, “Hlotlau nupang bang a imi Israel ai thil bawnhnak heh hmu aw sim? Kaimah hnenin tlan ai tlangsang cang le thing nim hnia cangah hlotlau in um i.

⁷ Hemi bangtluk thil a bawn hnuaah i hnenah let tuh tengteng i tiin ruat ing. Ikhalselai let cuang lo i. Cen sangtlak lo a unau nu Judah in hmu sio fawn i.

⁸ Kaimah hnenah let lo manin le hlotlau in a um manin Israel khiah ma ai i hnawt teuhnak khai Judah in hmu sio hlen i. Ikhalselai sang tlak ve lomi Israel ai unau nu Judah in kihhnak zaikhai nai cuang lo in ani khai hlotlau cang ve ai,

⁹ zakthihnak zaikhai nai lo i. Hemi ram tu ningrimtiar sio ai lungto le thingkung bia in a pasal kang songin pasal dang daihtu ah cang i.

¹⁰ Hemi hmuahhmuah hnuaah Israel ai nupang hlotlau nu Judah tu i hnenah a let bangin bawn dun i. Ikhalselai a thinlung taktak in let lo i. Kaimah Bawipa in rel zo ing,” tiin ti i.

¹¹ Cen Bawipa in kaimah hnenah, “Israel incen i zam zo napui sangtlak lo nu Judah tahin tu pha sawn deuh lai i.

¹² Ciamanin Israel hnenah feh ta tulai, ‘Aw sangtlak lo Israel, i hnenah let tu. Ninghiohnak naitu ing ai thin i raw tuh lo i. Kumzangza incen na vumah thin i raw tuh lo i.

¹³ Bawipa na Pathian vumah na sual zo ai amah na ralcaihnak fel ngai in phuang tu. I thukhamhnak hlun lo ai thing nim hnia cangah ramdang khuavangte ngai in um heh phuang tu sio. Bawipa Kaimah in rel zo ing,’ ti ta tu.

¹⁴ “Aw sangtlak lo minungte, let tu ih; Kaimah ai i si. Khua pakhat in mi pakhat ṭen le hin khat in mi pahnih ṭen ning lang tuhai Zion Mual ah ning letpui tuh ing.

¹⁵ Kaimah thu a hluntu hotute ning pe tuhai fimhnak le lingthiamhnak thawn ning uk tuh i.

¹⁶ Cen cia ramah ning pungzai tuhai ciatihin mi in i Thutiam Kuang thu rel tlang tuh nawn lo i. Ciami thu tu ruat tuh nawn lo ai hih khai hih tuh lo i; a kul khai kul tuh lo i. Ciabang Kuang khai bawn tuh nawn lo i.

¹⁷ Ciami can a hleng fangin Jerusalem khua tu ‘Bawipa ai Bawi tohkham,’ ti tuhai miphun hmuahhmuah ciata ah kaimah bia tuhin khawm tuh i. Amahte thinlung ruh le thinlung siava ai a ruaihnak ruathnakte thawn thil bawn tuh nawn lo i.

¹⁸ Israel in Judah kom tuhai sal ai a tang awnghnak hmun sak lam ram an hmun khat ah, ning pu le ning pate hnenah a zomzet hrang tuhin i pehnak ramah, let tuh i,” tiin ti i.

Pathian Minungte Milim Biahnak

¹⁹ Bawipa in, “Aw Israel, I fapa cang tuhin na daih ing; Rampha le laipua vumai ram mawi ber na hnenah pe tuhin i nuam i. ‘I pa,’ tiin i ko tuhin le, Kaimah hnenin tlan tuh nawn loin na daih ing.

²⁰ Ikhalselai rintlak lo nupui bangin, kaimah ca rintlak de lo isi. Bawipa kaimah in rel zo ing,” tiin ti i.

²¹ Tlang vum phul lakin thawmvang thang i, Israel mite sualral in nung i; Bawipa Pathian hai sio zo manin amahte aihramhnak le ngenhnak aw thang i.

²² Bawipa a zamtute khai, let tu ih; Ning cakruai tuhai rinsantlak ah ning bawn tuh i. Ningmah in, “I, Bawipa hnenah let i ing, zaimantifangin amah khiah Pathian i.

²³ Tlang vumai khuavang biahnak in kin caah hnempuihnak zaikhai kin pe lo i. Israel ohnak khiah Bawipa kin Pathian hnen lek ian in hleng i.

²⁴ Ikhalselai zakthikul Baal khuavang biahnak hlanlai ai kin pupate ai naper a perhnak man, a tuu le kawlpawrual, a fanu le pafate tianin ai sio i.

²⁵ Zakthi kongin mitmu tuhai mualphohnak in kin khuk tuseh, kinmah ituseh, kin pupate ituseh, Bawipa kin Pathian vumah kin sen lai in tunnia tian a sualtu thliahthlo i ing. Zaikom inkhai amah ai thu ngai lotu i ing,” ti i si.