Jeremiah 29 - Zanniat Bible

Babylon Um Judah Mite Hnenah Jeremiah Ai Laikuat

¹ Jerusalem an Babylon ah Nebuchadnezzar in sal tuhin a hoihnak lakai hotute, suangbawite, prophette le midangte hnenah Jeremiah ai lainganhnak i.

² Hemi lai tu kumpibawi Jehoiachin le a nu, kumpibawi inn ai upate, Judah ram hotu le Jerusalem khuasong upate, kutzungthiam le pumsute saltanghnak hmunah fehpui sio hnuaah a nganhnak i.

³ Hemi lai tu Babylon kumpibawi Nebuchadnezzar hnenah Judah kumpibawi Zedekiah ai a hlathnak Shaphan ai fapa Elasah le Hilkiah ai fapa Gemariah kut in a kuathnak i. A lai song ahcen:

⁴ “Cungnungber Bawipa, Israel ai Pathian in Jerusalem an Babylon ah Nebuchadnezzar a hoiruaihnak misenpui hnenah hetihin rel i:

⁵ ‘Hmun khur tu ilai inn khai phatak niu in sa tu ilai um tu ih. Vuan bawn tu ilai ning cinghnak ai tu ih.

⁶ Nupui hoi tu ilai fate khai nai tu ih. Ning fate khai nupui hoi tu selai fate nai tu ve seh. ṭumsuk loin khangso tu sawn ih.

⁷ Thawngtla ai i fehruaihnak khuapui ai phathnak hrangah naper tu ih. Kaimah hnenah anite ca sawnget tu ih. Zaimantifangin anite khangso ai nainung lekhaw ning inkhai nainung tuh ve i si.

⁸ Kaimah Bawipa Israel ai Pathian in ralringhnak ning pe ing. Ning lakai a umtu prophette in ituseh, hmai lam thu ling i ing a titu midang inkhai ituseh, ning zawl maseh. Amahte mang manhnak khai zaisiar mah ih.

⁹ Anite tu kaimah hming in thudonreltute i. I hlathnak ilo i. Kaimah Bawipa in rel zo ing,’ ti i.

¹⁰ Bawipa in, “Babylon ramai ning umhnak kum sawmsarih a khim fangin ning vumah ngaihharhnak nai tuhai ning khua le ning ramah let tuhin i tiamhnak bangin khimruai tuh ing.

¹¹ Ningmah ca i tumtekhnak tu kaimah ian in ling ing. Tumtekhnak i naihnak tu ning hnawmcan tuhhnak ilo in nainungmi ning canghnak tuh hrangah i. Cia tumtekhnak tu ning umlamhnak le ning hmai lam hrang i.

¹² Ciafangin kaimah in ko tuh ing. Kaimah hnenah kawi in saw ning ngen fangin ning ngai sah tuh ing.

¹³ Ningmah in i si tuhai i hmu tuh i si. Ning thinlung taktak in i si fangin!

¹⁴ I, i hmu tuhai ning khua le ning ramah ning letruai tuh ing, tiin ning rel ing. Khuacang le ramcang ah ning piakhnak in ning khawm tuhai sal ning tanghnak hlanai ning umhnak ramah ning hoi leh tuh ing. Kaimah Bawipa in rel zo ing,” tiin ti i.

¹⁵ “Bawipa in Babylon ah prophette kin pe i, tiin ti i si.

¹⁶ David in a ukhnak ram a uktu kumpibawi le he khuapui songah a ummi, ningmah bangin sal tuhin hoi sio lomi ning songkhatte ai thu ah Bawipa ai ponkam heh ngai tu ih:

¹⁷ Cungnungber Bawipa in ‘Raltawng le rian tlung le urhnak anite vumah hlengruai tuhai aih phalo in a hmonmi thaihmin bangin bawn tuh ing.

¹⁸ Raltawng, rian tlung le urhnak thawn hlun tuhai ciami tu laipua vum miphun tampui in hmu fangin tihik tuh ngaingai i. I piakruaihnak ram cangcang ai mite in anite vumah a hlenghnak thil hmu fangin mangbang le thinlau in um tlang tuh i. Mi in hnihsarelhnak in hmang tuhai anite hming tu mi cukcamhnak ah hmang tuh i.

¹⁹ Anite hnenah catloin kaimah na ruaihtu prophette hnenin i thu tu hlengruai ṭio napui ngai nuam tlang lo manin he bangin a tuarhnak i.

²⁰ Babylon ai i kuathnak ning veksen in kaimah Bawipa ai i relhnak heh ngai tu ih,’ ti i.

²¹ “Cungnungber Bawipa, Israel ai Pathian in, ning hnenah amah hming in thudon a rel hnelhnotu Kolaiah ai fapa Ahab le Maasaiah ai fapa Zedekiah thu ah relhnak nai zo i. Anite tu Babylon kumpibawi Nebuchadnezzar kut ah pe tuhai ning mithmuh rori ah rek tuh i, ti i.

²² Jerusalem an Babylon ah hoihnak sal pom mite in mi pakhatkhat a cukcam nuam fangin, ‘Babylon kumpibawi in a nung pah in a kiomi Zedekiah le Ahab bangin Bawipa in na bawn tuseh,’ ti tuh i.

²³ Ciatihtluk in tuar tuh i, zaimantifangin thilsual bawn tlang i. Mi nupui le mi pasal vumah sual ai Bawipa ai hming in thudonrel tlang manin i. Ciami tu Bawipa ai daih lomi i. Amahte bawnhnak hmuahhmuah ling sah sio ai amah tu anite sualhnak ah thulingtu i. Bawipa in rel zo i,” tiin ngan i.

Shemaiah Ai Laikuat

^24-25 Cungnungber Bawipa, Israel ai Pathian in Nehelam mi Shemaiah hnenah thu rel tuhin i ruai i. Shemaiah in Jerusalem mi le Maasaiah ai fapa suangbawi Zephaniah le suangbawi dangdang hnenah amah ai hming in lai kuat i. A laikuat song ahcen Shemaiah in Zephaniah hnenah,

²⁶ “Bawipa in Jehoiada tumrul in suangbawi ah na bawn zo ai tunah Biakinn songai bawi lianber ah na cang zo i. Ciamanin mivoi inapui prophet a per kheltute hmuahhmuah thir cikcin in amahte hawng in khit tusek; ciami tu ning ṭuanvo i.

²⁷ Zaimanin misenpui hnenah prophet ponkam ai a pong hnelhnotu Anathoth khuami Jeremiah khiah ciatih bangin bawn lo i si?

²⁸ A raipui awkruai pha lo i. Zaimantifangin Babylon ai minungte tu ciata ah a raipui sal ah ning tang tuh i, inn sa tuhai um tuh i si. Vuan bawn tuhai ning cinghnak rong ai tuh i si, a titu heh amah i,” tiin lai kuat i.

²⁹ Ciami lai tu Zephaniah in kaimah hnenah siar i.

³⁰ Cen Bawipa in kaimah hnenah,

^31-32 Shemaiah ai thu thawn peh dun in Babylon ai sal tangtu hmuahhmuah hnenah hetihin thucah tuhin i ruai i, “Kaimah Bawipa in Shemaiah le a tesinfate hmuahhmuah cawh tuh ing. Ani tu i hlathnak mi ilo napui ning hnenah prophet ngaingai bangin pong ai ning zawl i. Ningmah lakah tesinfa pakhat khai nai tuh lo i. I minungte ca thilpha i bawn tuhhnak tu hmu man tuh nawn lo i. Zaimantifangin kaimah ralcai tuhin i minungte forh i. Kaimah Bawipa in rel zo ing,” tiin ti i.