Jeremiah 25 - Zanniat Bible

Sak lam Ai Ral

¹ Josiah ai fapa Jehoiakim tu Judah kumpibawi a canghnak kum lihnak ah Judah mite hmuahhmuah caah Bawipa ai ponka tu kaimah hnenah hleng i. Hemi tu Nebuchadnezzar in Babylon kumpibawi a cang kum khathnak ah i.

² Cen Judah mi le Jerusalem mite hmuahhmuah hnenah hetihin rel ing:

³ “Amon ai fapa Josiah tu Judah kumpibawi a cang kum hlaithumhnak in tunnia tian, kum kul hluanthum song, Bawipa ai thu tu kaimah hnenah hleng ai a relhnak tepawl ning hnenah rel leh loin um awng lo ing. Ikhalselai zaisiar lo i si.

⁴ Bawipa in a cengfa prophette hlat ṭiode napui amahte thu ngai cuang lo ai zaisiar cuang lo i si.

⁵ Bawipa in ning pupate le ningmah hnenah he ram tu a zomzet in ningmah ai tuhin ning pe i. Hemi ramah ning um thil tuh ngiohnak in ning nuncan pha lo le thilsual ning bawnhnak tepawl heh hlum tuhin he prophette in ning rel i.

⁶ Khuavang bia tuh loin le a na ruaih tuh loin ituseh, ning bawn fawmhnak milim biahnak in Bawipa thinrawtiar tuh loin ituseh, ning rel i. Bawipa ai thu hlun ta isilai ning cawh tuh hrimhrim lo napui i!

⁷ Tun tu Bawipa amah rori in a thu ning hlun nuam lohnak ning rel i. Ciacingin milimte ning bawnhnak in a thinrawtiar ai a cawhhnak tu ning vumah ningmah niu in hlengruai i si.

⁸ “Cia thu ngai ning nuam lo manin Cungnungber Bawipa in hetihin i ti i:

⁹ ‘Sak lam ramai mi zongzong le i cengfa Babylon kumpibawi Nebuchadnezzar ko tuh ing. Cen Judah le a ram song umtu hmuahhmuah le a hiangai ramte tawngruai tuh ing. Hemi ram le a hiangai ramte hnawmcan tuhai kumzangza in hnawmborh pumhnak ah cangruai tuh ing. Sik hiam lo le a kihkul in cang tuh i. Kaimah Bawipa in rel zo ing.

¹⁰ Lungawi ai amahte auhnak thawmvang le mohoi puai ai amahte thawmvang tu dapruai tuh sio ing. Amahte maikhuat hrangah yinan nai tlang tuh lo ai rong khai um tuh nawn lo i.

¹¹ Hemi ram pumpuhluk tu sik tlak loin hnawm tuh sio ai mite mangbang tlang tuh i. A hiangai ramte an Babylon kumpibawi tu kum sawmsarih song a na ruaih tlang tuh i.

¹² Cia hnuaah Babylon le a kumpibawi tu amahte sualman ah cawh tuh ing. Khia ram heh siatsuah tuhai kumzangza in hnawmborh pumhnak cangruai tuh ing.

¹³ Jeremiah hnenah i relciahnak, miphun tampui vumah hlengruai tuh ing i tihnak cawhkuan, he laibu songai khumhnak bawngsiahnak hmuahhmuah thawn Babylon tu cawh tuh ing.

¹⁴ A thilsual bawnhnak man ah Babylon mite vumah phuzul tuhai miphun tampui le kumpibawi thawmlian ngaingai pawl in sal ah zua tuh i,” ti i, tiin rel i.

Miphunte Vumah Pathian Thukhanhnak

¹⁵ Bawipa Israel ai Pathian in kaimah hnenah, “Heta ah i thinrawhnak in a dimmi cabit khuat khat um i. Kaimah in na hlathnak miphun hmuahhmuah hnenah feh tulai dingruai tu.

¹⁶ A ding fangin mivoi ah cang tuhai tlu tuh i; raltawnghnak amahte hnenah hlengruai tuh manin,” tiin ti i.

¹⁷ Ciamanin ciami khuat tu Bawipa ai kut in lang ai i hlathnak miphun hnenah feh ai dingruai ing.

¹⁸ Jerusalem le Judah ram khuate, a kumpibawi le hotute thawn dingruai ing. Ciatihin nelrawn ramkhing, tihikkul le sik tlak lo ramah cang tuhai, mi in tun san tianin cukcamhnak ah hmang tuh i.

^19-26 Ciami khuat a dingtu tuh ramte tu a hnia lamai ramte i: Egypt kumpibawi, a kuthnia tlangsuakte le hotute; Egypt mite le Egypt ramah a umtu ramdang mite; Uz ram kumpibawi hmuahhmuah; Filistin ramai khuate Ashkelon, Gaza, Ekron le a tangtu Ashdod khua ai kumpibawite, Edom, Moab le Ammon ram mite; Tyre le Sidon kumpibawite; Mediterranean tikulh ai kumpibawite; Dedan, Tema le Buz khuate; Amahte sam comniu ai a mettute; Arabia ram kumpibawite Nelrawn ram miphun ai kumpibawite; Zimri, Elam le Media kumpibawite; Sak lam ram kumpibawite; A hla a nong ti um loin pakhat hnua pakhat ding tuh ṭen i. Lailung vum miphun hmuahhmuah in ding tuh i. A hnuakhumber ah Babylon kumpibawi in ding tuh i.

²⁷ Cen Bawipa in kaimah hnenah, “Mipui hnenah rel tu; Kaimah Cungnungber Bawipa, Israel ai Pathian in, ri ai awk lai hlanlo, sawn ai tho ben hlanlo, ding tuhin thupe ing. Zaimantifangin anite hnenah raltawnghnak hlengruai ing.

²⁸ Ciami khuat tu na kut in lang nuam loin um ai ding nuam hlah lesikhaw Cungnungber Bawipa in, ding kul tengteng i si ti i, tiin rel tu.

²⁹ Siatsuahhnak tu kaimah ai khuapui an pan tuh ing. Cawhhnak tawk lo ai luat tuhin ruat tlang i sim? Luat tuh lo i, cawhhnak tawk tuh sio i. Laivum mi zongzong hnenah raltawnghnak hlengruai tuh ing.

³⁰ “Jeremiah, he i relhnak hmuahhmuah heh nangmah in phuang tuh sio isi. Hemite tu hetihin rel tu law, “Bawipa tu van in huk tuh dumdo i, Vansang ber in khuari bangin huk tuh dumdo i. A minungte vumah a roh ngai in huk tuh i; Cabit hmettu pa bangin au tuh i. Laivum mi zongzong in za tlang tuh i.

³¹ A thawm tu vanham tong tianin dim tuh i. Bawipa in miphunte vumah amahte mawhhnak thu rel tuh nai i. Aisusu khai amahte thu rel sah tuh i. Misualte tu rek tuh i. Bawipa in rel zo i,’ ti tu,” tiin ti i.

³² Cungnungber Bawipa in, “Ramkhat hnua ramkhat ah hnawmcanhnak hleng tuh i,” ti i; vanhamtong ah khuahu tho tuh i,” ti i.

³³ Cia hnuaah Bawipa ai a rekhnak mite ai luang tu khat lam vanhamtong in khat lam vanhamtong tian leu tuh linglung i. Aisu inkhai kah tuh lo i; luangfuntu nai lo le phumtu nai tuh lo i. Laivum ah ekdawm bangin leu tuh bial i.

³⁴ Aw ningmah hotute, i minung a khaltute, kap tu ilai roh ngai in au tu ih. Mithi ngai in kap tu ilai laivut lakah leu tu dekdo ih. Ning thihnak can hleng zo ai tuu bangin rekhnak tuar tuh i si. Bungbel tlokhnak bangin ning khoi tuh i.

³⁵ Ning luatthilhnak lampui um tuh lo i.

^36-37 Kap tu ilai vansang in au tu ih, zaimantifangin Bawipa a thinraw in ning miphun siatsuah zo ai a dap ngai le a him ngai ning ram khiah hnawmborh pumhnak cangruai zo i.

³⁸ Chintit in a kua a hlum bangin Bawipa in a minungte hlum zo i. Tihikkul raltawnghnak le Bawipa ai thinrawhnak in he ram tu nelrawn ramkhing ah bawn zo i.