Jeremiah 24 - Zanniat Bible

Thaihmin Bawm Hnih

¹ Bawipa in Biakinn hmai ai dahhnak thaihmin bawm hnih i hmuh i. Ciami tu Babylon kumpibawi Nebuchadnezzar le Jehoiakim ai fapa Judah kumpibawi Jehoiachin khiah Jerusalem an Babylon ah Judah ram hotute, pumsu thiam le kutzungthiamte thawn hmunkhat ai salpomhnak ah a hoi hnuaah i.

² Bawm pakhat songah a thai hmasaberhnak a hmin pha bik um i; a dang bawm song ahcen thaihut, ai tlak lo thaihmin um i.

³ Bawipa in i hnenah, “Jeremiah, ziang hmu isi?” tiin i zawt i. “Thaihmin hmu ing, A pha pawl tu pha bik i; a hnawm pawl tu hnawm ngaingai i, ai tlak lo i,” tiin ti ing.

⁴ Ciafangin Bawipa in,

⁵ “Kaimah Bawipa, Israel ai Pathian in Babylon ah a fehpui mite tu he thaihmin pha bangin i ruathnak i; Ciamanin amahte vumah ninghiohnak nai tuh ing.

⁶ Phantak ngai in sik tuhai he ramah letpui leh tuh ing. I balhnak ilo in i sahnak cang tuh i. I phaihnak ilo in i birhnak cang tuh i.

⁷ Bawipa ing ti khiah amahte in ling nuamhnak thinlung pe tuh ing. Ciatihin kaimah minung cang tuhai kai tu amahte Pathian cang tuh ing. Zaimantifangin amahte thinlung veksen thawn kaimah hnenah let tuh i.

⁸ “Ikhalselai Judah kumpibawi Zedekiah le a kuthnia tlangsuak upate le Jerusalem mite tu, he ram songah a umtu ituseh, Egypt ramai a tlantu ituseh, kaimah Bawipa in he thaihut, a hnawm ze in ai tlak lomi thaihut bangin bawn tuh ing.

⁹ Amahte vumah hnawmcanhnak a roh ngai in hlengruai tuhai laipua vum miphun hmuahhmuah thinlau tuh sio i. Mi in zinghnak ah le hnihsahnak ah ning hmang tuh i. Nautat tlang tuhai amahte hming tu a piakhnak hmuncang ah cukcamhnak ah hmang tuh i.

¹⁰ A pupate le amahte hnenah i pehnak ram songah cenin pakhat khai tang nawn lo tianin a borul sek hlanlo amahte vumah raltawnghnak, rian tlung le urhnak hlengruai tuh ing,” tiin ti i.