Jeremiah 22 - Zanniat Bible

Judah Kumpibawi Inn Hrang Thucahhnak

^1-2 Bawipa in David ai tesinfa Judah kumpibawi inn ah feh in kumpibawi le a kuthnia tlangsuakte le Jerusalem mite hnenah a thurelhnak ngai tuhin rel tu, i ti i. Bawipa in,

³ Kaimah Bawipa in thu ning pe ing: thil ning bawnhnak heh dikcanglairelhnak le dikcanghnak thawn bawn tu ih. Amahte zawlhnak hnelhno mite tu a zawltu kut in hup tu ih. Ramdangmi ituseh, farah ngakṭah le hmaitongte hnawmcan mah ih. Hemi hmun thianghlim ah mawh nai lomi rek mah ih.

⁴ I thupeciahnak bangin bawn ngaingai le i sikhaw David ai tesinfate kumpibawi cang tuh ngio i. Anite tu amahte kuthnia tlangsuakte le a minungte thawn he kumpibawi inn ai kotka songin siphuh le siphuhleng thawn lut tuh suak tuh i.

⁵ Ikhalselai i thupeciahnak hlun hlah le i sikhaw, cukcam in thu ning kham ing, he kumpibawi inn tu inn rop ah cang tuh i. Kaimah Bawipa in rel zo ing.

⁶ Kaimah caah Judah kumpibawi inn tu Gilead ram le Lebanon Tlang bangin mawi i. Ikhalselai aisu khai um nuam lohnak hmunkhing ah bawn tuh ing.

⁷ A siatsuahtu tuhin mi hlat ing. Amahte haihpui awh in cedar khuam mawi ngai pawl heh vawng tuhai mai songah tai tuh ing.

⁸ Leh hnuaah ramdang mi tampui helam a kawi fangin zaimanin Bawipa in he a thawmlian khuapui vumah hebang bawn ini? tiin zawt tuh i.

⁹ Ciafangin Pathian thawn a bawnhnak thutiam zam tlang ai khuavang dangdang bia ai ruaih manin i,” ti i.

Johaz Thula Jeremiah Ai Thucah

¹⁰ Judah mite, kumpibawi Josiah heh kah mah ih. A thi manin ning lungsia mah ih. Ikhalselai a fapa Joahaz caah a roh ngai in kap tu ih. Amah khiah hoi tuh teu ai let tuh nawn lo i. A tehmun ram hmu tuh nawn lo i.

¹¹ Bawipa in Judah kumpibawi a cangtu, a pa Josiah roltu Joahaz thu ah hetihin rel i, “Ani tu heta in feh zo ai let tuh nawn lo i.

¹² Amahte hoihnak ramah thi tuhai he ram tu hmu tuh nawn lo i,” ti i.

Jehoiakim Thawn Pehpar in Jeremiah Ai Thucahhnak

¹³ Dik lohnak in a inn a satu le, nawhthuh aihnak in a inn kauruai deuhtu, Zaikhai pe loin a ram minung na a perruaitu le Hlawhman zaikhai a pe lotu heh a lampui pit i.

¹⁴ “Inn pha bik sa tuhai, Vumta khan ah khan lian ngaingai bawn tuh ing,” a titu heh a lampui pit i. Ciatihin tukvirh khamniu bawn ai a song thuah tu cedar thing in bawn i. Cia hnuaah sisan mat i.

¹⁵ Kumpibawi pha deuh i cuang isim? Cedar thing in inn sa ai, Midang inn tahin a pha deuh inkhai. Na pa tu misanpha i. Midikcang le mifel i. A bawnhnak hmuahhmuah ah hlawhtling i.

¹⁶ Mifarahte ai thu khai dikcang ngai in rel sah i. A lampui tluang ngai i. Bawipa ling tihnak tu ciami ihang.

¹⁷ Ikhalselai nang tu nangmah ai hnempuihnak lek hmu isi. Mawh nai lo minung rek ai, na minungte a roh ngai in cawh isi. Bawipa in rel zo i.

¹⁸ Ciamanin Bawipa Judah kumpibawi Josiah ai fapa Jehoiakim thu tu hetihin pong i, “A thi fangin aisu khai kap tuh lo i; ‘Aw i u, aw i nau aw,’ tiin aisu khai kap tuh lo i. ‘Aw i bawipa, i kumpibawi,’ tiin aisu khai mithli far in kap tuh lo i.

¹⁹ Laak thi ai a phum tluk fang i tuh i. A luang tu duk tlang tuhai, Jerusalem kotka pualam ah lon tuh i,” ti i.

Jerusalem Thula Jeremiah Relhnak

²⁰ Aw Jerusalem mite, Lebanon ramah feh tu ilai au tu ih; Bashan ramah feh tu ilai kap tu ih; Moab ram tlang vuman ko tu ih; Zaimanin ning ṭanpuitu le ning daihtu ram hmuahhmuah, ral sung zo i.

²¹ Mi nainung ning i laiah, Bawipa in thu na rel i; Ikhalselai ngai awng lo i si. Ning nun song ciatih ngiode i si. Bawipa thu tu ngai nuam awng lo i si.

²² Ning hotute tu khuahu in hmut tuh sio i. Ning ṭanpuitute tu ralpom mi cang tuh sio i. Ning khuapui zakthi le mualpho in um tuh i; ning thilsual bawnhnak manin.

²³ Lebanon in a hlenghnak cedar thing lakah lungmuang ngai in cawlum i si. Ikhalselai nupang nau nai ur tuar bangin nangmah caah ur tuh ze i, ninghiokul tuh isi, Urhnak in na net fangin!

Jehoiachin Vumah Pathian Thukhanhnak

²⁴ Bawipa in Judah kumpibawi Jehoiakim ai fapa Jehoiachin hnenah, “A nungmi Pathian ing ai, i kiahhan lamai hmingkhenhnak kutruk na ita inkhai na hawk tuhai,

²⁵ nangmah a rek nuamtu, na kih ngaihnak mite hnenah na pe tuh ing. Babylon kumpibawi Nebuchadnezzar le a ralkapte hnenah na pe tuh ing.

²⁶ Saltanghnak ramah nang tu na nu thawn na hnawt tuh teu ing. Na te lo hmun ramah ning nufa in feh kawm tuhai ciata ah ning pahnih in ning thi tuh i.

²⁷ Hemi ram heh na ngai tuh ze i, ikhalselai let tuh nawn lo i si,” ti i.

²⁸ Kaimah in, “Kumpibawi Jehoiachin tu bel khoi, aisu inkhai a daih nawn lohnak bel bangin cang zo i? Ciamanin maw amah le a fapate ling awng lohnak saltanghnak ramah hoi teu i?” ti ing.

²⁹ Aw lairam, lairam, lairam, Bawipa ponghnak heh ngai tu!

³⁰ “Hemi pa tu a fate pairal tuhin ruatciahnak mi i. Zaikom inkhai hlawhtling tuh lo pawl i. A tesinfate songin David roltu le, Judah ram uktu tuhin aisu khai um tuh lo i. Kaimah Bawipa in rel zo ing,” ti i.