Jeremiah 21 - Zanniat Bible

Jerusalem Neh Tuh Thu Relciahnak

¹ Judah kumpibawi Zedekiah in Malchiah ai fapa Pashhur le Maasaiah ai fapa suangbawi Zephaniah tu kaimah hnenah hlat ai hetihin i ngen kawm i,

² “Kinmah tumrul in Bawipa hnenah kin pong sah tu. Zaimantifangin Babylon kumpibawi Nebuchadnezzar in a ralkapte thawn kin khuapui kulh sio i. Bawipa in a hlanai a bawn dehnak bangin ngaihsunurkul thil pakhatkhat bawn in Nebuchadnezzar tu khel ah a letruai khai i thaipang i,” tiin ti i.

³ Cen Bawipa ai ponkam khiah i hnenah hleng ai Zedekiah in a hlathnak mite hnenah,

⁴ Bawipa, Israel Pathian ai ponka khiah Zedekiah hnenah rel tuhin phuang ing. Bawipa in, “Zedekiah, Babylon kumpibawi le a ralkapte tu kaimah in tawng tuhai neh tuh ing. Na ralkapte ai ralthuamte tu khuapui laiteng ah pum tuh bial ing.

⁵ Nang tu i ban thahathnak hmuahhmuah le i thinrawhnak le i thintokhnak hmuahhmuah thawn na tawng tuh ing.

⁶ Hemi khuapui songai a ummi zongzong rek tuh sio ing. Minung ituseh, ramsa ituseh, ursia in thi tuh i.

⁷ Ikhalselai nangmah le na kuthnia ai tlangsuakte tu, raltawnghnak, rian tlung le urhnak in a luattu misenpui thawn nangmah na rek nuamtu kumpibawi Nebuchadnezzar le na ralte na pomruai tuhai Nebuchadnezzar in na rek tuh i. Aisu khai ning zuah tuh lo i. Ninghiohnak le zawnruathnak zaikhai ning vumah nai tuh lo i. Kaimah Bawipa in rel zo ing,” tiin ti i.

⁸ Cen misenpui hnenah rel tuhin Bawipa in i ruai i, “Ngai tu ih, kaimah Bawipa in ril tuh pahnih ning pe ing: Nunhnak lampui le thihhnak lampui i.

⁹ Hemi khuapui songai a umtute tu raltawnghnak ah thi tuh i. Ihlahle rong loin le urhnak in thi tuh i. Ikhalselai he khuapui a tawng hnelhnotu Babylon mi hnenah feh in kin sung i tiin a peduntu cenin ning rek tuh lo i; a nunhnak tal tu luat tuh i.

¹⁰ Hemi khuapui khiah zuah tuh loin ruatcat zo ing; siatsuah tuh ing. Babylon kumpibawi hnenah pe tuhai riap rori in tai tuh i. Kaimah Bawipa in rel zo ing,” tiin ti i.

Judah Kumpibawi Innsang Thukhanhnak

^11-12 Bawipa in David ai tesinfa Judah kumpibawi ai innsang ah rel tuhin hetihin i rel i: “Kaimah Bawipa in i relhnak heh ngai tu ih! Nisiar in thudik in thurel tu ih. Zawl ai naunehmi pa tu a naunehtu kut in hup tu ih. Ciatihin bawn hlah le i sikhaw thilsual ning bawnhnak in i thinrawhnak tu mai bangin koruai tuhai aisu inkhai hmit thil tuh lo i.

¹³ Jerusalem nang tu phairawn vum hmunsang ah to isi, zawllai lakai lungto sang bangin. Ikhalselai nangmah na tawng tuh ing. ‘Aisu inkhai i tawng thil tuh lo ai pha ngai in ṭanghmun i khuarhnak ahcen aisu khai lut thil tuh lo i,’ ti isi.

¹⁴ Ikhalselai na thil bawnhnak manin na cawh tuh ing. Na inn phapha tu mai in tai tuhai a hiangai zaizongza kang tuh sio i. Kaimah Bawipa in rel zo ing,” ti i.