Jeremiah 20 - Zanniat Bible

Jeremiah Le Suangbawi Pashhur

¹ Ciami thute i phuanghnak tu Biakinn uktu Immer ai fapa suangbawi Pashhur in a ling fangin,

² i vit ai thir cikcin in i khit hnuaah Biakinn song a vum lam Benjamin kotka hiangah i dah i.

³ A thangha fangin i thir cikcin tu i hawk sah ai i hlat fangin a hnenah, “Bawipa in Pashhur tiin hming na bawn lo ing. Hming na bawnhnak ngaingai tu, ‘Khuahacang ah thinlauhnak,’ i.

⁴ Bawipa amah rori in ‘Nang tu nangmah le na rualpui caah thinlauhnak ah na bawn tuhai a ralte in vang thawn na rualpui rek berh khiah hmu tuh isi. Judah mi zongzong Babylon kumpibawi kuthnia ah hlengruai tuh sio ing. Ani in a hrekkhat tu a ramah sal tuhin hoi tuhai a hrekkhat tu rek tuh i.

⁵ Hemi khuapui lianhnak hmuahhmuah, a sumsaw le hlawnthilte, Judah kumpibawi ai thilri le hlawnthil tianin a ralte in sut tuhai Babylon ah fehpui tuh sio i.

⁶ Cen nang Pashhur, nangmah le na songkhatte khai ning pom tuhai Babylon ah ning hoi tuh i. Ciata ah na thi tuhai vel tampui na zawlhnak ṭio na rualpuite thawn na phum tuh i,” tiin rel i.

Bawipa Hnenah Jeremiah Phuncam I

⁷ Bawipa, nangmah in i zawl ai, na zawlhnak ing! Nang tu kaimah tahin na hat ai i neh isi. Aisusu inkhai hnihsahnak in i hmang ai sunnivui in hnih i san tlang i.

⁸ I pong cang fangin au kongin, “Mi vithnak, Hnawmcanhnak,” tiin roh ngai in au ing. Bawipa, mi in hnih i cip tlang ai catloin nau i tat tlang i. Nangmah ai thu i phuang manin.

⁹ Ikhalselai, “Bawipa khiah hai tuh ihang ing; A hming in thurel tuh nawn lo ing,” i ti fangin, Na thu tu mai bangin i songah ko dekdo i; I ruh songah kalh ngio i; Dapthen in um tum meng napui ing ai, um thil hrimhrim lo ing.

¹⁰ Mi zongzong in a thupniu in i rel tlang i, “Khuahacang ah thinlauhnak um i; Bawi upa hnenah he pa ai thu heh rel tuh ing,” a tihnak ling ing. I ngamhnak i rualpuite in rin i tlu tuh khiah umlam tlang ngai i. “Zawl thil tuh ngawn ising, Pom thil lesingkhaw phuzul tuh ising,” ti tlang i.

¹¹ Ikhalselai Bawipa, nang tu kaimah lamah ṭang isi, Mihat le mithawmlian isi. Kaimah i reemtute tu sung tuh i; kumzangza mualpho in um tuh i; Zaikom inkhai hlawhtling thil tuh lo i, Amahte zakthihnak tu hai thil tuh lo i.

¹² Cungnungber Bawipa, nang in dik ngai in mi cu de isi. Mi ruathnak le thinlung songah, ziang um i ti ling isi. Ciamanin i ralte vumah phu na zulhnak tu i hmuruai tu hram law. Zaimantifangin i thula tu na kut songah na pe ing.

¹³ Bawipa hnenah la sa tu ih! Bawipa khiah thangphat tu ih! Mihrokhrawl pawl kut songin, nauneh mite o i.

¹⁴ I te nia khiah cukcam in um tuseh! I nu ai i te nia tu hai in um tuseh!

¹⁵ I pa angruaitu, Thuthang koih ai, “Pasal niu i! Fapa nai isi!” a titu heh cukcamhnak tawk tuseh.

¹⁶ Bawipa in ninghiohnak nai loin, a siatsuahhnak khuapui bang cang tuseh! Zing lamah ur tuar aihramhnak a zatu, Sun ah raltawnghnak thirhlung aw a zatu cang tuseh!

¹⁷ I te hlanin i rek lo manin, I nu ai pum song khiah i phumhnak hlankua ah cang lo i!

¹⁸ Zaimanin i nu pum songin i suak ini? Harsahnak le lungsiahnak tuar ai, Zakthi in i nunhnak ni liam tuhin maw?