Jeremiah 19 - Zanniat Bible

Bel Khoi

¹ Bawipa in lai bel lai tuhin i ruai i. Upate hrekkhat le suangbawi upa deuh pawl pawlkhat hoi tu iti i.

² Hlamphai kotka in Hinnom nelrawn ah feh tuhin Bawipa in i rel i. Ciata ah a relhnak thu phuang tuh ing.

³ Bawipa in hetihin rel tu iti i: “Judah kumpibawite le Jerusalem mite, Cungnungber Bawipa, Israel ai Pathian Kaimah ai relhnak ngai tu ih. Hemi hmunah bawngsiahnak a roh ngai in hlengruai tuhai a zatu hmuahhmuah mangbang in um tlang tuh i.

⁴ Hemi bang thil heh hlengruai tuh ing, zaimantifangin misenpui in i zangtak tlang ai khuavang hnenah hibawlhnak pe in ram heh ningrimtiar tlang zo i. Ciami khuavangte tu anite le amahte pupate in ituseh, Judah kumpibawi in ituseh, a ling tlang awng lohnak i. Hemi ram tu mawh nai lomi ai thisan in dimruai tlang ai,

⁵ amahte fate tu hibawlhnak mai in tai tuhin Baal khuavang caah puleng tiang tlang i. Hemi bang bawn tuhin thupe awng lo ing; a ruat rin ruat awng lo ing.

⁶ Ciamanin can hleng tuhai he hmun heh Topheth ihlahle Hinnom nelrawn tiin ti tuh nawn lo i. Ciami tumrul in Mirekhnak nelrawn ti tuh ihang.

⁷ Hemi hmunah Judah mi le Jerusalem mite ai tumtekhnak tu pelhruai tuh sio ing. Amahte ralte tu nehtu cangruai tuhai amahte ral in rek tlang tuh i. Amahte luangte tu vaniu le laivum ai ramsate aih tuhin pe tuh ing.

⁸ Hemi khuapui vumah a roh ngai siatsuahhnak hlengruai tuhai a hiangai a vaktu hmuahhmuah mangbang tlang tuh ze i.

⁹ Ralte in khuapui tu kulh tlang tuhai minungte heh rek tum tlang tuh i. Khuapui a kulhdan tu roh tuh ngai ai khua song um mite pakhat le pakhat amahte sa ai dun tlang tuhai amahte fanu le fapate ai sa tianin ai tlang tuh i,” tiin ti i.

¹⁰ Cen Bawipa in kaimah thawn a vaktu ve upate ai mithmuh ah lai bel heh seu tu, i ti i.

¹¹ Cen anite hnenah Cungnungber Bawipa in, “Hemi minungte le he khuapui tu kom thil nawn lo hemi bel khoi bangin seu tuh sek ing. Mite in a luangte tu Topheth hmunah phum tuh i. Zaimantifangin hmundang akonah khai anite phum hmun um tuh lo i.

¹² Hemi khuapui le khuasong mite khiah Topheth bangin bawn tuh ing, tiin ning tiam cia ing.

¹³ Jerusalem innte, Judah kumpibawi ai innte le inn dangdang, a vumah arsi hnenah rimhmui taihnak le a dang khuavangte hnenah hibawlhnak cabit bunghnak innte hmuahhmuah Topheth bangin a cianghlimlo ah cang tuh i,” tiin ti i.

¹⁴ Bawipa in a thurel tuhin i hlathnak hmun Topheth in feh leh ing. Biakinn songah ding ai misenpui hnenah a thu tu phuang ing.

¹⁵ Cungnungber Bawipa, Israel ai Pathian in anite hnenah, “Hlengruai tuh ing i tihnak cawhhnak hmuahhmuah he khuapui le a hiangai khuatenaute vumah hlengruai tuh ing; zaimantifangin mi lungruh i ai i relhnak ngai nuam lo i,” tiin ti i.