Jeremiah 18 - Zanniat Bible

Bel Bawntu Inn Ah Jeremiah Feh I

¹ Bawipa in Jeremiah hnenah,

² “Bel bawntu inn ah feh tulai ciata ah thu na rel tuh ing,” tiin ti i.

³ Ciamanin feh ai bel bawntu pa tu bel bawnhnak lengkual thawn naper a per thliahthlo khiah hmu ing.

⁴ Bel a bawn fangin laisawr hual ai a bawnhnak pha hlah lekhaw bel dang a daihhnak ah bawn leh i.

⁵ Ciafangin Bawipa in kaimah hnenah,

⁶ “Bel bawntu in laisawr in a daihdaih a bawn bangin Israel mite ning vumah bawnthilhnak nai ve lo ing maw? Laisawr tu bel bawntu kut ah a um bangin ningmah khai kaimah kut songah um i si.

⁷ Vai khatkhat ah miphun pakhat ihlahle ukhnak pakhat phai tuh lio ing, khoi tuh sio ai siatsuah tuh ing i ti hnuaah,

⁸ cia miphun tu thilsual a bawnhnak in let lekhaw bawn tuh ing i tihnak tu bawn leh tuh lo ing.

⁹ Ikhalselai vai khatkhat ah miphun phunkhat ihlahle ukhnak pakhat dingruai tuhai khangsoruai tuh ing i ti hnuaah,

¹⁰ Cia miphun in i thu i hlun lo ai sualhnak bawn lekhaw bawn tuh ing i tihnak tu bawn leh tuh lo ing.

¹¹ Tun in Judah mi le Jerusalem mite khiah rel tu: amahte caah a pha lomi bawn tuhin tumhnak nai ai anite cawh tuhin a ralring ihang ing. Amahte ziaza pha lo heh com tuhang seh; amahte nundan le thil bawnhnak heh ṭhin tuhang seh.

¹² Anite in, ‘Zaiman ṭhin tuh i ing? Kin daihhnak bangin milungruh le mihrokhrawl i tuh hlen i ing,’ ti tuh i,” tiin ti i.

Misenpui In Bawipa Hnawl I

¹³ Bawipa in, “Hemi bang heh, akon ram tal ah cang awng aw im? Miphun hmuahhmuah zawt tu ih. Israel mite in thil poimawh bawn i.

¹⁴ Lebanon ram lungto tlang sang puipui vumah vur tla loin um awng aw im? A daphnak tlangsang vuman runpui luanghnak zaikom talah kang awng aw im?

¹⁵ Ikhalselai i minungte in i hai i, Milim hnenah rimhmui tai i. Amahte vak tuhhnak lampui ah vak ai bah i, Lampui hlun ah vak nawn lo i; Sel lohnak lampui sawn hlun tlang i.

¹⁶ Hemi ram khiah tihikkul in cangruai i, Kumzangza in zohsuam tuhin. A hiangai a vaktu le a hmutute ngaihsunur kul tuh i. Khuaruahhar in amahte lu thing tuh i.

¹⁷ I minungte tu amahte ral hmaiah, piakruai tuh sio ing; Nisuah lam khuahu in runsiat a hmut sek bangin. Zam tuh ing; Bawngsiahnak a hleng fangin bawm tuh lo ing,” ti i.

Jeremiah Engsan I

¹⁸ Cen misenpui in, “Jeremiah heh akontih tal in engsan tuh ising. Kin zirhtu tuhin suangbawite le thuzawt tuhin mifimte le Pathian thu phuangtu tuhin prophette um tuh ngiode i. Ikhalselai a vumah thu bawn ngasing khaw a thurelhnak ngai tuh nawn lo ising,” tiin ti i.

¹⁹ Ciamanin hetihin sawngen ing, “Aw Bawipa, i ponghnak heh ngai tu hram lai i salte ai relhnak heh ngai sah tu hram law.

²⁰ Phathnak tu phatlohnak in rul tuh im? Ikhalselai i tlokhnak tuhin khur co tlang zo i. Na hnenah kawi in na thinraw ai na hnawmcan lohnak tuhin i ngenhnak ponkam ling hlen isi.

²¹ Ikhalselai aw Bawipa, na fate tu rong loin thi tlang tuseh, ral kut in thi tu ngawn seh. Nupangte khai amahte pasalte le fate in thihsan tu sio seh. Amahte pasalte tu ur in thi tlang tu selai amahte tlangvalte tu raltawnghnak in thi tlang tuseh.

²² Mangrin loin amahte inn rok tuhin miburpui hlat tulai thinlau in au tlang tu dekdo seh. Kaimah tlokhnak tuhin khur co tlang ai kaimah awk tuhin thang toh tlang zo i.

²³ Ikhalselai aw Bawipa, engsanhnak le i rek tumhnak ling sio hlen isi. Amahte phatlohnak tu ngaithiam malaw; amahte sualhnak khai hlat sah malaw. Na mithmuh ah sawnruai tulai na thinraw laiah siatsuah tu sio law,” ti ing.