Jeremiah 16 - Zanniat Bible

Jeremiah Ca Bawipa Ai Tumtekhnak

¹ Bawipa ai ponkam tu kaimah hnenah hleng ai,

² “Nupui hoi malai hebang khua le ram ahcen fanu fapa khai nai mah.

³ Hemi ramai fate a naitute vumah zaibang thil hleng tuh i, ti na rel tuh ing. A tetu a nu le pate vum ahkhai ziang hleng tuh i, ti na rel tuh ing.

⁴ Urhnak a phunphun in thi tuhai kahtu khai nai tuh lo i; phumtu khai nai tuh lo i. Amahte luang laipua vumah ekdawm bangin piak tuh i. Cen raltawnghnak ah thi tuh i, rong loin thi tuh i; amahte luang tu vaniu le ramsate ai rong cang tuh i.

⁵ “Mithi ngaihnak inn ahcen lut tuh lo isi. Aisu ca ahkhai na lungsia mah. I minungte tu daphnak thawn hmuifu pe tuh nawn lo ing. Amahte vumah ithnak le ninghiohnak khai nai tuh nawn lo ing.

⁶ Hemi ramah milian ituseh, mifarah ituseh thi tlang tuhai phumtu aisu khai nai tuh lo i. Kahtu khai nai tuh lo i. Lungsia larruaihnak tuhin aisu inkhai vangniu in at dun tuh lo ai sam khai met tuh lo i.

⁷ Amahte ithnak a thi fangin hnemhnak tuhin tiin aisu inkhai ti le rong aipui dingpui tuh lo i. Amahte nu le pa a thi inrin aisu inkhai topui tlang tuh lo i.

⁸ “Amahte rong ai puai bawnhnak inn songah lut tuh lo isi. Ai tuh le ding tuhin amahte hnenah to tuh lo isi.

⁹ Cungnungber Bawipa, Israel ai Pathian kaimah ai ponkam heh ngai tu: Nangmah na nun songah le na mithmuh rori ah, anghnak le aipuanghnak thawmvang le mocanghnak puai ai auaw thawmvang tu he ram songah heh dapruai tuh sio ing.

¹⁰ “Ciatihin na rel ben fangin, ‘Zaimanin ciatluk lawmlam ai cawh tuhin Bawipa in thuruat ini? Zaibang mawhhnak nai tlang ai zaibangtluk thilsual Bawipa kin Pathian vumah bawn ini ing?’ tiin na zawt tuh i.

¹¹ Ciafangin kaimah Bawipa in i relhnak heh rel salawn tu: ‘Ning pupate in i zangtak ai a dang khuavangte bia ai ruaih tlang i. I zam ai i thuzirhhnak hlun tlang lo i.

¹² Ciahlaiah ning tu ning pupate tahin ning luar sawn i. Ning veksen in milungruh le misualral i si ai i thu ngai tlang lo i si.

¹³ Ciamanin he ram an ning lon tuhai ningmah in ituseh, ning pupate in ituseh, ning ling awng lohnak ramah ning kuat tuh ing. Ciata ah sun le zan in a dang khuavangte ruaih tuhai ning vumah ninghiohnak zaikhai nai tuh lo ing,’ tiin rel tu,” ti i.

Saltanghnak In Letlehhnak

¹⁴ Bawipa in, “Can hleng tuhai mi in Egypt ram an Israel mite a hoisuaktu Pathian ai nunhnak sal in cukcam in thukham tuh nawn lo i.

¹⁵ Sak lam ram an le i piakruaihnak ramte an Israel mite a hoisuaktu Pathian nunhnak ko in thukhamhnak bawn tlang tuh sawn i. Amahte ram, a pupate hnenah i pehnak ramah letruai tuh ing. Kaimah Bawipa in rel zo i,” tiin ti i.

Cawhkuan Hleng Tuh I

¹⁶ Bawipa in, “Nga pomtu tampui ko tuhai minungte pomruai tuh ing. Cen tlangsang le tlangniam ah ituseh, khukua le lungkhu songah ituseh, a situ le hnawttu tuhin sakap thiam tampui sawm tuh ing.

¹⁷ Amahte bawnhnak hmuahhmuah hmu sio ing. Kaimah hmaiah a thup thilhnak zaikhai um lo i; amahte sualhnak i hmu lohnak zaikhai um lo i.

¹⁸ Amahte sualhnak le phatlohnak tu a let hnih in kuanruai leh tuh ing. Zaimantifangin mithi luang bang nunhnak nai lo milim in i ram tu ningrimtiar ai zaikhai a ilomi khuavang in dimruai i,” ti i.

¹⁹ Aw Bawipa, nangmah in kin hup ai hathnak i pe isi. Harsahnak can ah i bawm isi. Vanham tong in miphun tampui kawi tlang tuhai na hnenah, “Kin pupate in thudon khuavang siar lo zaikhai nai tlang lo i; amahte naihnak tu zaikhai hnempui lo milim lek i.

²⁰ Mihing in amah niu in Pathian bawn thil tuh im? Bawn thil hlah; a bawn thil ita inkhai pathian ngaingai i tuh lo i,” ti tlang tuh i.

²¹ Cen Bawipa in, “Ciatih ilekhaw kumtluan hrangah i huham le i hathnak tu miphunte lingruai tuh ing; Bawipa ing ti khiah ling tlang tuh i” tiin ti i.