Jeremiah 15 - Zanniat Bible

Judah Mite Lampui Pit I

¹ Bawipa in kaimah hnenah, “Moses le Samuel rin heta ah ding in i ngen hnelhno khalselai, he minungte vumah cen ninghiohnak nai tuh lo ing. Tlan tlang tuseh; i mithmuh ah um tlang maseh.

² Akonah feh tuh ising tiin ning zawt lekhaw kaimah ai ponghnak bangin rel tu: Mihrek tu urhnak in thi tuh i; Ciata ah feh tlang tuseh. Midang tu raltawnghnak ah thi tuh i; Ciata ah feh tlang tuseh. Mihrek tu rong loin thi tuh i; Ciata ah feh tlang tuseh. Mihrek tu salpomhnak tuar tuh i; Ciata ah feh tlang tuseh.

³ Kaimah Bawipa in amahte vumah a hleng tuhhnak thil pali ruatcat zo ing. Raltawnghnak ah rekhnak tuar tuh i. Amahte luang tu uico in thiar tuh i; vaniu in ai tuhai a valhnak tu ramsa in ai tuh i.

⁴ Jerusalem ah Hezekiah ai fapa Manasseh in Judah kumpibawi a cang laiah thilsual a bawnhnak manin he tih bangin bawn tuh ve ing ti khiah laivum mi hmuahhmuah in a hmu fangin kih le mangbang in um tlang tuh i,” ti i.

⁵ Bawipa in, “Aw Jerusalem mite, Aisu in ning ninghio tuh i? Aisu in lung ning siapui tuh i? Com rori in, “Akontih in um i si? ning titu aisu tal um nitur?

⁶ Ningmah sawn in i hnawl ai zang i tak tlang zo isi. Ciamanin i kut suah ai ning hnawmcan ing. Thinsup in ningmah daw hlelhlo heh i zuam nawn lo ihang.

⁷ Ramsong khuahacang ah fangcang kungro bangin, Hli lakah ning lon ing. I minungte kaimah in ning siatsuah ing. Ning fate tianin rek ing, thilsual bawn com tlang cuang lo manin.

⁸ Ning ram songah hmaitong khiah tifingriat kam runsiat tahin tam sawn i. Ning tlangvalte a dawn lai in rek ai a nute tuar ngaingai i; Mangrin loin donharhnak le thinlauhnak amahte hnenah hlengruai ing.

⁹ A fapate pasarih ai thih sanhnak nupang nu tu a lungmit in sawn i, Haihawh tuh si i. Sun lakah amah caah khuathim i, Mualpho in um ai thin urhnak in dim i, A nungsun ningmah khai rek tuhin, ning ralte kut ah ning pe tuh ing. Kaimah Bawipa in rel zo ing,” tiin ti i.

Bawipa Hnenah Jeremiah Phuncam I

¹⁰ Laivum ah i nu in i te heh mi bawngsia ngaingai ing! Ramsong mi zongzong in i hua ai i heng tlang i. Paisa pu awng lo ing, midang paisa khai pu awng lo ing; ikhalselai aisusu inkhai cuk i cam tlang i.

¹¹ Aw Bawipa, nangmah phatak niu in ruaih lo ai i ralte harsahnak le mangbanghnak a tawk tlang fangin anite caah na hnenah na ngen lo ilengkhaw na cukcamhnak heh khim tuseh.

¹² Aisu inkhai thir heh ek ben awng lo i, sak lam ram an a hlenghnak thir hrimhrim tu, zaimantifangin dar thawn a roihhnak i.

¹³ Bawipa in kaimah hnenah, “Hemi ram songai i minungte sualhnak bawn tlang manin cawhkuan pehnak ah a thilri le sumsaw suttu tuhin ral hlat tuh ing.

¹⁴ A ling awng lohnak ram, a ralte ai ramah ralte ruaihtu tuhin bawn tuh ing. I thinrawhnak tu mai bang i ai kumzangza in ko tuh i,” ti i.

¹⁵ Ciafangin kaimah in, “Aw Bawipa nang cenin kin ling isi. I ling tu ngio lai, i bawm tu. I reemtute vumah phuzulhnak um tu hram seh. Amahte vumah na thinsau nawn mahang, kin rek pang tuh ngaingai i. Nangmah manin zohsuam i tuarhnak heh hih tu ngio law.

¹⁶ Kaimah hnenah pong ai na ponkam kamkhat khai ling sio ing. Aw Cungnungber Bawipa Pathian, na hming in kohnak ing; na minung ing ai na ponkam in i thinlung heh anghnak le thinnuamhnak in i dimruai isi.

¹⁷ Midang thawn zingdunhnak le hnihsarelhnak tuhin i can hmang awng lo ing. Na thupeciahnak ngai in kaimah hlanlam niu in um ai thinrawhnak in i dim i.

¹⁸ Zaimanin i tuarhnak heh tawp awng lo i ni? Zaiman i hmaihma heh lawm awng lo ini? Cak thil tuh nawn lo ini im? Khuakhal can ai runpui ti a kang bangin i ruathnak boruai tuh isim?” tiin ti ing.

¹⁹ Cen Bawipa in, “Let leh lesikhaw na lang leh tuhai i cengfa na cang leh tuh i. Thulovang menma pong loin thungai le thudik phuang lesikhaw i prophet na cang leh tuh i. Mipui hnenah feh kul tuh lo isi, anite sawn na hnenah kawi tlang tuh i.

²⁰ Na tawng tlang ita inkhai na neh tuh lo i. Dar ai bawnhnak bangkhang bangin na bawn tuhai na ti thil tuh lo i. Na hnenah um tuh ing, na hup tuhai na o tuh ing.

²¹ Misual le hrokhrawl mite kut songin na o tuh ing. Kaimah Bawipa in rel zo ing,” tiin ti i.