Jeremiah 14 - Zanniat Bible

Ruah Si Loin Rocar I

¹ Bawipa in ruah si lohnak thu hetihin i rel i,

² “Judah tu lungsia in um i. A khuate car cuahco i; A minungte lungsia in laipua ah bok tlang i, Jerusalem khai bawmhnak ngen in au i.

³ Miliante in ti cawi tuhin a salte hlat i; Tikhur ah feh tlang i, ikhalselai ti um lo i; A tibel lawngpui thawn let tlang i. Thinnau le mangbang in hmai hup tlang i.

⁴ Ruahsi lo ai laipua car sio manin lovai mite tu thinpit tlang i. Lungsia in hmai hup tlang i.

⁵ Hampalak ah kiho in a faniu hlum i, hampa um lo manin.

⁶ Hampalak ai laak tu tlang phundir ah ding i; Mehleng bangin a haihawh tuh si in ha liaklo i; A mit khuahmu thil lo i, Rong ngah lo manin.

⁷ I minungte i hnenah au tlang i, ‘Kin sualhnak in mawh kin hluk khalselai, Na thukham bangin, Aw Bawipa, i bawm tu hram law. Na hnenin vel tampui tlan zo i ing, na vumah kin sual ze zo i.

⁸ Nangmah ian heh Israel ai umlamhnak isi. Nangmah ian hnawmcanhnak in kin humtu isi. Zaimanin kin ram songah ramdang mi bangin le, Zankhat ian a camtu mikhual bangin um isi?

⁹ Zaimanin thinlauhnak a naitu bangin um isi? Zaimanin mi a bawm ben lotu ralkap bang isi? Aw Bawipa, nang tu kin hnenah um ai, Kin tu na minung i ing; Kin zam lio malaw,’ i ti i,” tiin ti i.

¹⁰ Bawipa in hemite thu rel ai, “Hemite tu kin hnenin tlan nuam tlang ngai i. Amahte veve uk dun ben lo i. Ciamanin amahte vumah lung i awi lo i. Thil phalo bawnhnak tu hih tuhai amahte sualhnak manin cawh tuh ing,” ti i.

¹¹ Bawipa in i hnenah, “Hemi minungte bawm tuhin tu i ngen nawn mah.

¹² Rongul in bawmhnak i ngen inkhai ngai sah tuh lo ing. Maitai hibawl i sel ai rong hibawlhnak khai i pe inrin anite vumah lung i awi tuh cuang lo i. Raltawng, rian tlung le urhnak in siatsuah tuh thotho ing,” tiin ti i.

¹³ Ciafangin kaimah in, “Aw Cungnungber Bawipa, he ramah tawngdunhnak le rian tlung tuh nawn lo i, zaimantifangin Bawipa ai daphnak ian um tuh ihang tiin thu i kham zo i, tiin prophette in misenpui hnenah amahte ponghnak za hlen ing, tiin ti ing.

¹⁴ Ikhalselai Bawipa in, “Prophette kaimah hming in thudonrel i. I hlathnak ilo i; amahte hnenah pon kamkhat pong tuhin i ruaihnak khai um lo i. Amahte relhnak murhmo thular hmuhhnak tepawl tu kaimah hnenin hlenghnak ilo i; hmai lam thu amahte relciahnak tepawl tu thulovang, amahte ai thinlung ruathnak menma i.

¹⁵ Kaimah Bawipa in ciami i hlat lohnak prophette, kaimah hming sal in he ramah raltawnghnak le rian tlung tuh lo i, a titute vumah ziang bawn tuh ing ti na rel tuh ing; raltawng le rian tlung in siatsuah tuh ing.

¹⁶ Amahte thu a ngaitute khai ciabang thotho in siatsuah tuh sek i. Amahte luang tu Jerusalem khuapui lampui ah lon tuhai aisu inkhai phum tuh lo i. Amahte lek ilo in a nupuite, a fanu le fapate khai ciatih thotho in bawn tuh i. Amahte sualman a roh ngai in kuan tuh i,” tiin ti i.

¹⁷ Bawipa in i lungsiahnak heh misenpui hnenah phuang tuhin thu i pe ai hetihin rel ing, “Sun le zan in mithli i luang tuṭio seh, Mithli i hul nia um maseh; Zaimantifangin i minungte a roh ngai in, tuahmawhhnak tuar tlang ai amahte hmaihma roh ngai i.

¹⁸ Hampalak ah i vak fangin, ral rekhnak mi luang hmu ing. Khuapui song i feh fangin rikam in a thitute hmu ing. Prophet le suangbawite in amahte naper per tlang i, Ikhalselai ziang bawn i ing ti ling tlang lo i,” ti i.

Misenpui In Bawipa Ngen I

¹⁹ Aw Bawipa, Judah tu hnawl isim? Zion mite tu na hua ngaingai im? Zaimanin hetih rori in tuahmawh isi? I hmaihma i lawm thil nawn lo i. Daphnak iang tlang napui phathnak zaikhai hleng lo i. Cakhnak umlam napui thinlauhnak sawn hleng i.

²⁰ Aw Bawipa, na vumah kin sual ngaingai zo i. Na hmaiah kin sualhnak le, Kin pupate ai sualhnak khai phuang i ing.

²¹ Na hming zarto in kin nautat hram malaw; Na songlawihnak tohkham Jerusalem vumah cen, Mualphohnak hlengruai hram malaw. Kinmah thawn na bawnhnak na thukham heh bal hram malaw.

²² Ramdang mite ai bawnhnak milimte in ruahsiruai thil lo i. Van in amah thu in ruah farkhat khai tlaruai thiam lo i. Aw Bawipa kin Pathian, I umlamhnak tu na hnenah dah zo ing. Hemi thil hmuahhmuah a bawntu Nangmah ian isi.