Jeremiah 13 - Zanniat Bible

Vori Ai Takhnak Diar

¹ Bawipa in, “Feh tulai vori ai takhnak diar comniu pawl lai tulai feng tu; ikhalselai ti khingruai mah,” tiin i ti i.

² Ciamanin diar comniu khiah lai ai Bawipa ai ruaihnak bangin feng ing.

³ Cen Bawipa tu i hnenah pong lala ai,

⁴ “Feh tulai Euphrates Runpui na hleng fangin lungto kua songah ciami diar heh thup tu,” tiin i ti i.

⁵ I ruaihnak bangin feh ai Euphrates Runpui hiangah thup ing.

⁶ Can a rai hnuaah Bawipa in Euphrates Runpui ah feh tuhin le diarte lang leh tuhin i ruai i.

⁷ Feh ai i thuphnak hmun i hleng fangin co leh ing; cen i sik fangin mot sio ai hmang tlak lo khiah hmu ing.

⁸ Cen Bawipa ai ponka tu i hnenah hleng lala ai,

⁹ “Hemi diar bangin Judah ai hngalhnak le Jerusalem ai puarthauhnak a roh ngai khiah hnawmruai tuh ing.

¹⁰ Hemi misualralte in i thu ngai nuam hrimhrim lo i. Tun hlan bang thotho in amahte thinlung ruh ai sualral thotho i; khuavang dangdang ruaih ai bia tlang i. Ciamanin he diar bangin hnawm tuhai hmang tlak lo ah cang tuh i.

¹¹ Mi el ah diar comniu khiah kho ngai in a pen bangin Israel mite le Judah mite tu kaimah hnenah kho ngai in a bethnak cang tuhin i daih i. Ciatihin anite tu i minung i tuhai i hmingthanghnak le songlawihnak a suakruaitu canghnak tuhin i daih i. Ikhalselai i thu hlun nuam lo i,” tiin ti i.

Cabitti Bel

¹² Bawipa Pathian in, i hnenah, “Jeremiah, cabitti bel hmuahhmuah cabitti in dimruai tuh sio in Israel mite rel tu. ‘Cabitti bel hmuahhmuah cabitti in dimruai tuh khiah ling sio i ing,’ tiin na sawn tlang tuh i.

¹³ Cen kaimah Bawipa in he ram songai a ummi zongzong David ai tesinfapar kumpibawi a cangtute ituseh, suangbawi le prophette ituseh, Jerusalem ai a um mite tianin cabitti in dimruai tuh sio ai cabitti ri tuh sio i. Ciami khiah rel tu.

¹⁴ Cen upa naupang ti loin pakhat hnua pakhat cabitti bel bangin vit ai khoiruai tuh sek ing. Zawnruathnak, ngaihharhnak le ninghio thinpemhnak um loin rek tuh sek ing. Ziang inkhai i kham thil tuh lo i,” tiin ti i.

Jeremiah In Ralringhnak Pe I

¹⁵ Aw Israel mite, Bawipa in rel zo i; Ning thinlung nemruai tu ilai a thu ngai tu ih.

¹⁶ Bawipa ning Pathian khiah upat tu ih. Thimhnak hlengruai ai tlang vumah ning bah ning sawn hlanah le, Ning umlamhnak tleuhnak tu khuathim sah bingbol in a cangruai hlanah amah kihzah tu ih.

¹⁷ Ciami thu ngai ning nuam hlah lekhaw, ning hngalhnak manin a thupniu in kap tuh ing. Kap tuhai i mithli a roh ngai in luang tuh i; Zaimantifangin Bawipa minungte khiah sal tuhin a pomhnak cang zo sio i.

¹⁸ Bawipa in i hnenah, “Kumpibawi le a nu khiah rel tu; kumpibawi tohkham in tolh tuseh, zaimantifangin a kumpibawi lukhuk mawi ngai heh amah lu vuman tlok zo i.

¹⁹ Judah ram hlang lamai khuapuite tu ralte in kulh sek zo i; pit ngai in kulh tlang ai pah thil lo ihang. Judah mite tu saltanghnak ah hoi zo sek ihang,” ti i.

²⁰ Aw Jerusalem, sik tu! Na ralte sak lamin kawi i. Nangmah kilkhawl tuhin a pehnak minungte tu akonah i? Na uar ngaihnak minungte tu akonah i?

²¹ Na rualpui ai na ruathnakte in na neh ai na uk fangin ziang pong leh tuh isi? Nupang nau nai bangin a ur tuar tuh isi.

²² Zaimanin hebang thil heh i vumah hleng ini? Zaimanin i hnikpon i zik sah sek ai i zohsuam ini? ti lesikhaw na sual ze manin i!

²³ Mihang phun Ethiopia mi in a vun hang thleng thil tuh im? Tlavang in a nganhnak thleng thil tuh im? Thleng thil lekhaw thilpha zaikhai bawn loin sualhnak lek a bawntu ning inkhai thilpha bawn zir thil tuh i si!

²⁴ Nelrawn khuahu in fangcang kuangro a hmut teu bangin Bawipa in ning piakruai tuh sek ve i.

²⁵ Hebang thil tawk tuh i si tiin ning rel zo ing. Hemi tu lairelciahnak i. Zaimantifangin amah hai ai zaikhai a ilomi khuavang ring sawn i si.

²⁶ Bawipa amah rori in ning hnikpon ning hawk sah tuh sek ai kawngkolh in zakthi in ning dah tuh i.

²⁷ A huahnak thil ning bawnhnak hmu zo i. Lenpal lakah ituseh, tlang vumah ituseh, a dang khuavangte si i si; pasal hlotlau in midang nupui daih i, a hiam in siphuhcang hur in siphuh pui a hnawh bangin a dang khuavangte ning hnawh betbo hmu zo i. Aw Jerusalem mite, ning lampui a pitdan aw! Zaikom fangin a cianghlim in um leh tuh i si?