Jeremiah 1 - Zanniat Bible

Jeremiah

¹ Benjamin ram Anathoth khua ai a ummi suangbawite lakai suangbawi pakhat Hilkiah tihnak ai fapa Jeremiah ai thurelhnakte tu hetihin i.

² Amon ai fapa Josiah in Judah ram kumpibawi a canghnak kum hlaithum kum ah Bawipa ai ponkam tu Jeremiah hnenah hleng i.

³ Josiah ai fapa Jehoiakim ai kumpibawi a cang fangin khai Bawipa ai ponkam tu a hnenah hleng awng lala i. Cia hnuaah Josiah ai fapa Zedekiah in kumpibawi a canghnak kum hlaikhat kum tian Bawipa ai ponkam tu a hnenah vel tampui hleng awng i. Ciami kum hla nga hla ah Jerusalem mite tu saltanghnak ah fehpui sek ihang.

Jeremiah Kohnak

⁴ Bawipa in i hnenah,

⁵ “Na nu pum songai na semruai hlanin na ling zo ai na te hlanin miphun tampui hnenah prophet cang tuhin na ril zo ing,” i ti i.

⁶ Ciafangin kai in, “Aw Cungnungber Bawipa, pong thiammi ilo ing; i sen ze lai i,” tiin ti ing.

⁷ Ikhalselai Bawipa in i hnenah, “I sen ze lai i ti mah; kaimah in na hlathnak misenpui hnenah feh tu sawn lai rel tuhin thu i pehnak bangin anite hnenah rel tu.

⁸ Lau mah, na hnenah um tuhai na hup tuh ing. Kaimah Bawipa in rel zo ing,” tiin i ti i.

⁹ Cen Bawipa in a kut suah ai i kahmur i dai hnuaah, “Ngai tu, na pong tuhhnak i thute khiah na ka songah dah zo ing.

¹⁰ Tunnia ah miphun hmuahhmuah le kumpibawi ukhnak ram tampui vumah phai thil le bal thil, siatsuah thil le lon thil, sa thil le tungding thil thu na pe zo ing,” tiin ti i.

Hmuhhnak Pahnih

¹¹ Cen Bawipa in, “Jeremiah, ziang hmu pa si?” tiin i zawt i. Kai in, “Amond thing kak hmu ing,” ti ing.

¹² Bawipa in, “Dik Ngai in hmu isi; i pongciahnak a khim tuhin a sik lai ing,” tiin ti i.

¹³ Cia hnuaah Bawipa in, “A dang tang ziang hmu pa si,” tiin i zawt lehsal i. Kai in sak lamah a so hluahhlo bel, he lamah a lai dun hmu ing.

¹⁴ Ciafangin Bawipa in, “Siatsuahhnak tu sak lamin tiso bangin he ram song mi zongzong vumah luang tuh i;

¹⁵ zaimantifangin sak lam ramte tu he ramah hleng tuhin ko zo ing. A kumpibawite tu Jerusalem khuapui kotka le a kulhhnak vingpui cingkim ah le Judah ram khua dangdang cingkim ah a bawi tohkham dah tuh i.

¹⁶ I minungte vumah i mi cawhhnak khiah hlengruai tuh ing; sual ai i zangtak tlang manin, khuavang dangdang hnenah hibawlhnak sel ai milimte amahte kut rori in bawn ai bia manin cawh tuh ing.

¹⁷ Ciamanin Jeremiah, ralring tu; feh tulai rel tuhin thu i pehnak hmuahhmuah amahte hnenah rel tu sio. Kih mah, ciahlahle amahte hmai na hleng fangin na kihruai tuh amam ing.

^18-19 Jeremiah, ngai tucuk! Hemi ram mite hmuahhmuah Judah ram kumpibawi le a kuthnia ai tlangsuakte le suangbawite le mi senpui in na ral tuh i. Ikhalselai anite tawng thil tuhin thazang na pe tuh ing; vingpui ai kulhhnak khuapui bang i tuh isi, thir khuam bang le dar ai bawnhnak bangkhang bang i tuh isi. Na hnenah um tuhai na hup tuh ing. Ciamanin aisu inkhai na neh tuh lo i. Bawipa kaimah in na rel zo ing,” tiin ti i.