Isaiah 9 - Zanniat Bible

A Hleng Tuhhnak Kumpibawi

¹ Zebulun miphun le Naphtali miphunte ram tu zakthi in um awng zo i; ikhalselai hmai lamah hemi ramte tu ram songlawi ah cang tuh i. Mediterranean in nisuah lamah Jordan khat lam ral tian, cen ramdang mi umhnak Galilee tian ram songlawi ah cang tuh sio i.

² Khuathim lakah a vaktute in a lian ngai tleuhnak hmu tlang zo i; thihhnak hlim hnia ai a umtute vumah tleuhnak hleng zo i.

³ Aw Bawipa, anghnak lian ngai pe zo isi; Anite thin nuamruai isi. Na naperhnak vumah ang tlang ngai i. Mi in rong a khawm can ah lungawi tlang bangin le, rallonghnak thilri a zem tlang bangin.

⁴ Anite thilrit phurhnak hamri tu tan sah zo isi; Anite kodar ai hak khai khoiruai zo isi. Aw Bawipa na minungte a naunehtu le a zohsuamtu heh neh zo isi. Hlanlaipui ah Midian ralkap na neh zo bangin.

⁵ Na minung tawngtute ai kedawl le thisan mathnak hnikponte hmuahhmuah heh mai in tai tuh sio i.

⁶ Kin hnenah nauniu te zo i; Kin caah fapa kin pe zo i; Ani tu kin uktu tuh i. Ani tu “Ngaihsunurkul, Remruattu,” “A hat ngai Pathian,” “Kumzangza ai Pa,” “Daphnak Kumpibawi,” tiin ko tuh i.

⁷ A kumpibawi ukhnak le huham tu khangso tuh amam i; A ukhnak songah catloin daphnak um tuh i. Kumpibawi David sawngtu in uk tuh i; Dikcanghnak le thuhman thawn uk tuhai tun le a san tong tian in uk tuh i. Cungnungber Bawipa in hemi hmuahhmuah bawn tuh i.

Bawipa In Israel Cawh Tuh I

⁸ Bawipa in Israel ukhnak le Jacob ai tesinfate vumah thukhanhnak pe zo i.

⁹ Hemi tu Israel mite hmuahhmuah le Samaria khuapui ai a ummi zongzong in ling tlang tuh i. Tun tu hngal le puarthau in um tlang i.

¹⁰ Anite in “Ukkhe innte min zo sek i; ikhalselai lungto in sa tlang leh tuh ngawn ising. Thaikung ai bawnhnak sulra tan tlang sek i; ikhalselai cedar thing pha ber in rol tuh pam ising,” ti tlang i.

¹¹ Ciamanin Bawipa in amahte ralte tu raltho tuhin le anite tawng tuhin forh i.

¹² Nisuah lamah Syria le nitlak lamah Filistin mite in Israel thon tuh sek in a ka kau ngai in ka i! Cia inrin Bawipa ai thinrawhnak tu lawm lai lo i; a kut tu mi cawh tuhin tung cia in um lai i.

¹³ Israel mite a sualsir lai lo i; Cungnungber Bawipa in dantat napui amah hnen let lai cuang lo i.

¹⁴ Ni ni khat songah Bawipa in Israel hotute le mizapui tu cawh tuh i; amahte lu le a mai cem sah tuh i.

¹⁵ Mi upa le upat tlak mite tu a lute i; thudon lek mi zirhtu prophette tu a maite i.

¹⁶ Hemite hoitute in hoisual tlang ai buai zo sek i.

¹⁷ Ciamanin Bawipa in a minote tu pakhat khai luatruai tuh lo i; hmaitongte le ngakṭahte hnen ahkhai ninghiohnak nai tuh lo i; zaimantifangin he minungte tu Pathian ling lo le mihrokhrawl ciang i ai, amahte relhnak tu thupha lo ciang i. Cia hnuaah rin Bawipa ai thinrawhnak tu dap lai lo i; cawh tuhin a kut tung cia in um lai i.

¹⁸ Hemite ai phatlohnak tu hling le so a kang siotu mai bangin ko lai thliahthlo i. Hampa le tusong thing tianin kang ai a khu tu hangbel in van ah kai ngualngo i.

¹⁹ Cungnungber Bawipa a thinraw manin a thinrawhnak tu a ram songah mai bangin kang ai minungte tu tihnak thing bangin cang i. Aisu khai amahte ca ṭen nung i; unau domtu pakhat khai um lo i.

²⁰ Rong a hmuhnak hmuahhmuah hnawh in ai tlang i; ikhalselai rikam lawm cuang lo i. Amahte songsuak a fate tian rin ai i!

²¹ Manasseh le Epharaim mite tawng dun i; anite pahnih ṭang ai Judah tawng kawm i. Cia hnua ahkhai Bawipa ai thinrawhnak tu dap lai lo i; cawh tuhin a kut tung cia in um lai i.