Isaiah 62 - Zanniat Bible

¹ Jerusalem thathoruai tuhin rel tuh ing; ohnak a ngah hlanlo le zan ai detmai tleu bangin a nehhnak a tleu hlanlo dap niu in um tuh menma lo ing.

² Aw Jerusalem, nehtu na ihnak khiah miphun hmuahhmuah in hmu tuh i. A kumpibawite inkhai na songlawi zia sik tlang tuh i. Hmingthar in na ko tuh ihang. Bawipa amah rori in a pehnak hming in.

³ Bawipa caah a mawi ngai kumpibawi lukhuk bang i tuh isi.

⁴ “Hlum zomi,” tiin na ko tuh nawn lo i. “Mahnak nupui,” ti inkhai na ram khiah ko tuh nawn lo i. Na hmingthar tu “Pathian na vumah ang i,” ti i tuh i. Na ram tu “Ang ngai ai hoihnak,” ti i tuh i. Zaimantifangin na vumah Bawipa khiah ang ai na ram hrangah amah khiah pasal bang i tuh i.

⁵ Tlangval in fenu him a hoi bangin, nang khai na bawntu in na hoi tuh i. Mohoitu pa tu monu vumah a lungawi bangin, Pathian tu na vumah a lungawi tuh ve i.

⁶ Aw Jerusalem, na vingpui vumah ralviltute dah ing ai sun le zan in dap tuh lo i; Bawipa in amah ai thukham a hai pang lohnak tuhin Bawipa hnenah lingruaihnak thurel tuh ṭio i.

⁷ Bawipa in Jerusalem a nungruai leh hlanlo le laivum pumpuhluk porhtlak khuapui ai a cangruai hlanlo Bawipa in cawlumhnak can ning pe tuh lo i.

⁸ Bawipa in cukcam in thukham ai a hathnak in bawn tuh i. “Ning rong mu tu ning ralte caah i tuh nawn lo ai ning cabitti khai ramdang mi in ding tuh nawn lo i.

⁹ Cimu a cingtu le rong a khawmtu ningmah in rong khiah ai tuhai Bawipa thangphat tlang tuh i si. Cabit a seltu le a thai a loihtu ningmah in cabitti heh Bawipa ai biakinn songah ding tlang tuh i si,” ti i.

¹⁰ Aw Jerusalem mite, khua songin suak tu ilai a lettu ning minungte caah lampui cek tu ih! Lam kaupui bawn tu ilai lungto khai lon tusek ih! Laivum pumpuhluk ling thai in hnikhnaihhnak tar tu ih.

¹¹ Bawipa in, “Jerusalem mite khiah rel tu ih, Amah otu Bawipa kawi lai i; A hup zohnak minungte tu a hnenah kawipui i,” tiin miphun hmuahhmuah hnenah thuthan i.

¹² Nangmah khai “Pathian ai Mi Thianghlim,” Bawipa ai Ohnak Mite,” tiin ning ko tuhai Jerusalem tu, “Pathian zam lohnak khuapui,” tiin ko i tuh i.