Isaiah 61 - Zanniat Bible

Luathnak Thuthangpha

¹ Bawipa ai rauhla tu i hnenah um ai hathnak in i dimruai i. Bawipa in i ril ai mifarah hnenah thuthangpha rel tuhin, Thinlung a khoimi cakruai tuhin Ral pom mite hnenah luathnak thu reltu tuhin le thawngto mite hnenah luathnak thuthan tuhin i hlat i.

² Bawipa in a minungte o tuhai a ralte nehhnak can hleng zo i, tiin thuthantu tuhin i hlat i. Lungsia mite hnem tuhin le

³ Zion ai lungsia in a um mite hnenah thinhnawmhnak tumrul in lungawi thinnuamhnak, thasiahnak hrang thangphathnak la hlenpuitu tuhin i hlat i. Bawipa amah in a birhnak thingkung bang i tuh i. Amahte veksen in a hmanmi bawn tlang tuhai Pathian tu a thil bawnhnak manin thangphathnak ngah tuh i.

⁴ Kum raipui hnawmborh pumhnak ai a cang zo khuapuite khiah saleh tuh i.

⁵ I minungte ramdang mi in na ning ruaih tuh i. Ning tuurualte kilkhawl tuh i; Ning lo ning vai sah tuhai ning cabit vuan sel tuh i.

⁶ Cen ning tu Bawipa ai suangbawi tihnak i tuh i si; Miphundangte ai lianhnak khiah ai tlang tuhai ning in zarto tuh i si.

⁷ Ning zakthihnak le ning mualphohnak tu bo tuh i. Ningmah ram songah um tuhai ning lianhnak tu a let hnih in khang tuh i. A kumzangza in ning ang tuh i.

⁸ Bawipa in, “Dikcanghnak tu i daih ai puarthauhnak le thisan luanghnak tu i hua i. I minungte tu fel ngai in a perman pe tuhai amahte thawn kumzangza in a khomi thukhamhnak bawn tuh ing.

⁹ Miphun hmuahhmuah lakah a hmingthang tuh i; A hmutu hmuahhmuah in Kaimah ai hmuifu i pehnak miphun i tiin ling tuh i,” tiin ti i.

¹⁰ Bawipa ai thil bawnhnak manin Jerusalem tu a lungawi i. Hoidunhnak puai hrang a thuamduntu mo bang i. Pathian in ohnak le nehhnak thawn thuam zo i.

¹¹ A hnawmhnak um loin a pomi le a khangmi hlaici bangin, Bawipa in a minungte tu o tuh i. Ciatihin Bawipa khiah miphun hmuahhmuah in thangphat tlang tuh i.