Isaiah 60 - Zanniat Bible

Jerusalem Songlawi Tuhhnak

¹ Aw Jerusalem tho tulai ni bangin tleu tu; Bawipa ai songlawihnak tu na vumah tlang i.

² Miphundang hmuahhmuah thimhnak in khuk tuh i, Ikhalselai Bawipa ai tleuhnak tu na vumah tlang tuh i. Amah ai songlawihnak tu na hnenah um tuh i.

³ Miphun hmuahhmuah in na tleuhnak ben tuhai Kumpibawite in na nisuah thar aai tlang tuh i.

⁴ Na hiang hlir tulai sik tucuk! Na minungte tlung tuhin taikhawm i. Na fapate tu lamhlapui in kawi tuh i. Na fanute tu nauniu bangin cawi tuh i.

⁵ Ciami na hmu fangin na ang tuhai Na ang ze in na ngor tuh thliahthlo i. Tipui khat lam ral in amahte lianhnak koih tuhai, Miphun tampui ai lianhnak tu amahte hnenah koih tuh i.

⁶ Midian ram le Ephah ram an kalauk a rual in kawi tuh i. Sheba ram an kawi tlang tuhai sui le rimhmui koih tuh i. Pathian ai thil bawnhnak thuthangpha tu mi in phuang tuh i.

⁷ Kedar le Nabaioth mite ai tuu hmuahhmuah khiah, Na hnenah hibawlhnak tuhin koih tuhai Bawipa anghnak ah puleng vumah hibawlhnak bawn tuh i. Bawipa ai biakinn tu thawmlian amam in bawn tuh i.

⁸ Khuanim bang le a inn lam ben in a zuangtu khuro bangin a kawitu tangphawlawngte tu ziang lawngte ini?

⁹ Lamhlapui in kawi ai Pathian ai minungte a phurtu lawngte i. Israel ai Pathian Thianghlim, Amah ai minungte upathnak petu tuhin miphun hmuahhmuah a bawntu Pathian ai hmingthanghnak le upathnak petu tuhin sui le ngun phur i.

¹⁰ Bawipa in Jerusalem hnenah, “Ramdangmi in amahte vingpui sa tuhai a miukte in nangmah na ruaih tuh i. I thinraw in ning cawh zo ing; Ikhalselai tunai panin i mithmai pha hmu tuhai na vumah ninghiohnak nai tuh ing.

¹¹ Sun le zan in na kotkate tu hong tuhai Miphun cangcang kumpibawite in amahte lianhnak koih tuh i.

¹² Ikhalselai nangmah na ruaih lotu miphunte tu bo tuh sio i.

¹³ “Lebanon tupui songai thing pha ber pawl farthing, hualthing le tufar thingte tu, Jerusalem nangmah salehhnak ah, I biakinn mawiruaihnak tuhin le I khuapui songlawiruaihnak tuhin koih tuh i.

¹⁴ Nangmah na naunehtu ai fapate tu Upathnak in na hmaiah ut tuh i. Zoh na suam awngtute tu na keham ah bok tuhai, ‘Bawipa ai khuapui,’ Israel ai Pathian Thianghlim ai khuapui Zion,’ tiin na ko tuh i.

¹⁵ “Hnawthnak le huahnak i tuh nawn lo i si, Hlumhnak le a khing ruahro khua i tuh nawn lo i si. A thawmlian le a mawi ngai in na bawn tuhai, Kumzangza in a kumzangza tian nunnuamhnak khuapui ah na cang tuh i.

¹⁶ Miphun tampui le kumpibawite in na kilkhawl tuh i; Nu in a fate a kilkhawl bangin. Bawipa kaimah in na o zo ai Israel ai Pathian Cungnungber in ning luatruaihnak heh ling tuh i si.

¹⁷ “Dar ca in sui na sum tuh ing; Thir ca in ngun na phurh tuhai zanthing ca in dar na ken tuh ing. Lungto ca in thir nai tuh isi. Na uktute in na cawh tuh nawn lo i; Dikcanghnak le daphnak thawn na ukruai tuh ing.

¹⁸ Rekdunhnak thawmvang tu za tuh nawn lo ai siatsuahhnak tu na ram songah hleng tuh nawn lo i. Vingpui bangin kaimah rori in na hup in na ṭan tuhai, Na o zo manin i thangphat tuh ngio isi.

¹⁹ “Sun fangin ni tu na tleuhnak i tuh nawn lo ai, zan ah khai hlapui heh na tleuhnak i tuh nawn lo i. Bawipa Kai tu kumzangza in na tleuhnak i tuhai, I songlawihnak huham tleu tu na vumah tlang tuh i.

²⁰ Na lungsiahnak tikcucan bo tuh ihang. Bawipa Kai tu kumzangza in na tleuhnak i tuhai Ni le hlapui tahin a raipui rai tuh i.

²¹ Na minungte in a hman bawn tuhai he ram tu a kumzangza in khur tuh i. A veksen hnenah i thawmlianhnak larruai tuhin I birhnak le i bawnhnak mite i.

²² Na minung lakai a cik ber le a nauta ber innsang rin laipua vumai a hat ber miphun tluk in thawmlian tuh i. Hemi thil hmuahhmuah can a khim fangin a rang ngai in khimruai tuh ing. Kai tu Bawipa ing!” tiin ti i.