Isaiah 6 - Zanniat Bible

Pathian In Isaiah Prophet Tuhin Ko

¹ Kumpibawi Uzziah a thi kum ah Bawipa hmu ing. A kumpibawi tohkham vumah songlawi le huham nai roh in to ai songlawihnak ponfual tu Biakinn songah dim sio i.

² A cingkim ah mai ko bangin Seraphim vancungmite um tlang ai kote paruk ṭen nai i. Kote pahnih in amahte hmai hup dun i; a dangte pahnih in a ruangpui hup dun ai a dangte pahnih in zuang i.

³ Pakhat le pakhat ko dun ai: “Thianghlim, Thianghlim, Thianghlim! Cungnungber Bawipa tu thianghlim i! A songlawihnak tu laivum ah dim i,” ti tlang i.

⁴ Anite awthawm tu a cawm ze manin Biakinn ham tianin hlin sek i. Cen Biakinn tu maikhu in dim sio i.

⁵ Ciafangin kaimah in, “Kin bo ihang! Kin umlamhnak zaikhai um nawn lo ihang. Kin kahmur ai suakhnak ponkam hmuahhmuah a sual ponkam lek i; misual lakah um ai hmurka cianghlimlo lakah leng ing. Tun tu i mit rori in kumpibawi, Cungnungber Bawipa hmu ing,” tiin ti ing.

⁶ Cen Seraphim pakhat tu puleng ai mailing khiah caicep in cep ai ciami koih in i hnenah zuang i.

⁷ Ciami mailing in i kahmur tok ai, “Sik tucuk, na kahmur tok zo i; tunai panin na mawhhnak bo sek ai na sualhnak tu ngaithiam zo i,” tiin i ti i.

⁸ Cen Bawipa in, “Aisu hlat tuh ing? Aisu kin palai tuh i?” a ti za ing. Ciafangin kaimah in, “Kaimah feh tuh ing! I hlat tu!” ti ing.

⁹ Cen ani in, “Feh ta tulai i minungte hnenah: ‘Zaitlukin ning ngai ta inkhai ling tuh lo i si. Zaitlukin ning sik ta inkhai hmu tuh lo i si,’ ti tu.

¹⁰ Hemi minungte ai thinlung tu molhruai tulai amahte naa khai ngongruai in a mit khai cawruai tusek law; ciatihin hmu maseh, ling maseh, lingthiam tlang maseh. Hmu in, za ai lingthiam lekhaw kaimah lamah hoi leh tuhai cak pang fangin,” tiin ti i.

¹¹ Ciafangin kaimah in, “Bawipa, ciatihin tu zaikom tian i tuh i?” ti ing. Ani in, “Khuapuite siatsuah sek ai a khing sukso tian; Aisusu inkhai amahte inn a zam sek tian; he ram heh zam tlang ai a khing sukso tian i tuh i.

¹² Hemi minungte heh lamhlapui ah kuat tuh sek ai a ram tu ramkhing cang tuh i.

¹³ Minung sawmkhat songah pakhat he ram songah a hlum ta inkhai ani khai siatsuah cih tuh thotho i; ani tu a vawngciahnak hlokhli kunghmui bang i tuh i,” ti i. (Kunghmui tu Pathian ai minungte hampanhnak thar tica i).