Isaiah 53 - Zanniat Bible

¹ Ciafangin mizapui in, “Tunai kin relhnak tu a sangtu um awng hang ni im? Hemi thil ah Bawipa ai kut a hmu awngtu um awng hang ni im?

² Ikhalselai Bawipa ai daihhnak bangin a cengfa tu thingkung bangin po i, lai ro lakai thingniu bangin. Kin sik hiam thai in pianzia phathnak le mawihnak nai lo i. Kin thinlung le kin mit langtu tuhin mawihnak zaikhai nai hrimhrim lo i.

³ Amah tu kin zohsuamhnak le kin hnawlhnak i. Urhnak le harsahnak tuar i. Aisu inkhai a kian tal khai nuam tlang lo i. Zaikhai ilo i tiin um sanhnak menma i.

⁴ “Ikhalselai ani tu kin rimsuhnak a tuartu i, Kin urhnak phurtu khai i. A rimsuhnak le a tuarhnak tepawl tu Pathian ai cawhkuan i tiin ruat i ing.

⁵ Ikhalselai kinmah ai sualhnak manin maliamhnak tuar i, Thil pha lo kin bawnhnak manin vithnak tawk i. Cawhkuan a tuarhnak tu kin cakhnak i, Vit a tuarhnak tu kin caah nunohnak i.

⁶ Kin veksen in a paimi tuu bangin vakvai tlang ising, Kin nuamhnak lampui ṭen ah vak tlang ising. Ikhalselai Bawipa in cawhkuan a vumah hlengruai i, Kin tuar tuhhnak kin sualman cawhkuan khiah! a vumah hleng ruai i.

⁷ “Amahte in hnawmcan roh napui thindap niu in tuar i, kamkhat khai pong lo i. Rek tuhai fehpuihnak tuu faniu a hmul met tuhhnak tuu bangin a ka in ponkam zaikhai suah lo i.

⁸ Amah tu pom ai rek tuhin thukhan tlang i, A thi tuh aisu inkhai poi sah lo i. Kin minungte sual manin rek tuar i.

⁹ Thilsual bawn awng mi le thudonrel awng mi ilo napui, Mihrokhrawl pawl thawn hlanmual ah dah tlang i; Milian hnenah phum i,” tiin ti i.

¹⁰ Bawipa in, “A tuar tuh heh kaimah daihhnak i; A thihnak tu ngaithiamhnak a hlengruaitu hibawlhnak i. Ciatihin a tesinfate hmu tuh i; Kum raipui nung tuhai Amah songin i tumtekhnak tu khim tuh i.

¹¹ Harsahnak a tuar hnuaah anghnak tawk tuh i; A tuarhnak tu a lovang ilo i ti ling tuh i. Ani tu a dikcang mi kaimah naruaihtu i ai i ang i. Mi tampui tumrul in cawhkuan tuar tuhai anite tu a sualhnak ngaithiam tuh ing.

¹² Ciamanin amah tu upathnak pe tuh ing, Milian le mihatte lakah dah tuh ing. Lungkhim ngai in a nunhnak pe ai, hrokhrawl mite lakah siarcih zo i. Misualte ai sualman tuar ai, anite sualngaithiamhnak ngen sah i,” tiin ti i.