Isaiah 49 - Zanniat Bible

Miphun Tampui Hnenah Tleuhnak

¹ Lamhlapui ai um ramte, i ngai tu ih! Khuatluang ai a umtute khai! I te hlanin Bawipa in i ril zo ai Amah na ruaihtu cang tuhin ṭuanvo i pe i.

² I ponkam tu ralvang bangin sandir i; A kut in i hup i. A sandir le hmang tuhai dahciahnak conkiang bang ah i bawn i.

³ Amah in i hnenah, “Aw Israel, nang tu kaimah na ruaihtu isi; Nangmah manin mi in thang i phat tuh i,” ti i.

⁴ Kaimah in, “Per hnelhno napui a lovang lek cang i, I thazang bo sek i; i persuakhnak Zaikhai um lo i,” ti ing. Ikhalselai Bawipa tu a pha lomi pharuaitu le a dik lomi dik tuh rori in a bawn thaitu i tiin sang ing; I perhnak manin amah in lehsawng i pe tuh i.

⁵ I te hlanin, Bawipa in ṭuanvo i zem zo i; A minungte fehpui leh tuhin le A piaksiohnak Israel mite letruai leh tuhin amah na ruaihtu in i bawn i. Bawipa in hmingthanghnak i pe i. Amah tu i hathnak a hampui i.

⁶ Bawipa in, “Kaimah cengfa, na ṭuanvo thupui amam um i; A tangsun Israel mite hnenah A hlan bangin hmingthanghnak na nairuai leh tuh lek ilo in, Laivum pumpuhluk ohnak a ngah ngahthilhnak tuhin Nang tu miphun tampui hnenah tleuhnak tuhin na bawn tuh ing,” i ti i.

⁷ Mi in zohsuamhnak, Miphun tampui ai huahnak, Uktu bawite ai hnenum pertu hnenah, A thianghlimmi Pathian, Israel otu in, “Miluat na i khiah kumpibawi inkhai na hmu tuhai upathnak larruai tuhin ding tuh i; Kumpibawi ai fapa le bawite inkhai na hmu tuhai upathnak in na hmaiah ut tlang tuh i,” tiin ti i. Bawipa, Israel ai Pathian Thianghlim in a na ruaihtu ril zo ai a thukhamte khimruai ngio manin a vumai bangin cang tuh ngaingai i.

Jerusalem Remmlehhnak

⁸ Bawipa in a minungte hnenah, “Ningmah ohnak nia a hleng fangin ning bawm tuh ing; Bawmhnak ning ngenhnak tu ngai tuh ing. Ning kil tuhai ning hup tuh ing; Ningmah songin mi zongzong hnenah thukhamhnak bawn tuh ing. Ning zamhnak ram songah ning umruai leh tuh ing.

⁹ Thawngtote hnenah, ‘Suak tuhang ih,” ti tuhai, Thimhnak songai a ummi hnenah ‘Tleuhnak songah kawi tuhang ih,’ ti tuh ing. Ciatihin tlang vumai hampa a aitu tuu bangin i tuh i.

¹⁰ Rikam tuh lo ai ti khai hal tuh lo i; Nisa le nelrawn niling in siatsuah tuh lo i. Zaimantifangin amahte ittu in kilkhawl tuhai, Cirhti umhnak ah fehpui tuh i.

¹¹ “Tlang vumah lampui bawn tuhai I minungte vakhnak lampui sel tuh ing.

¹² I minungte tu ram hlapui an kawi tlang tuh i; Sak lam le nitlak lam, Hlang lam Asuan khua inkhai kawi tuh i,” tiin ti i.

¹³ Aw! vante aw, la sa tu ih! Aw, lailung, lungawi in au tu ih! Tlangte khai lungawi in la sa tuseh! Bawipa in a minungte tu hnem tuhai, a tuarhar ze a minungte vumah ninghiohnak nai tuh i.

¹⁴ Ikhalselai Jerusalem mite in, “Bawipa in kin zangtak zo i, kin hai zo i,” ti i.

¹⁵ Ciamanin Bawipa in, “Nupang in a songsuak fa hai thil tuh im? A cawihnak a fa tu daih loin um thil tuh im? A nu in a fa tu hai khalselai, Kai incen ning hai tuh lo ing.

¹⁶ Aw Jerusalem, na hai thil tuh awng lo ing; I kutzapek vumah na hming ngan zo ing.

¹⁷ “Nangmah na dinlehtu tuh pawl tu hleng tuh vut ai, na siatsuahtute tu tlan tuh i.

¹⁸ Na hiangai thil a canghnakte heh sik tucuk! Na minungte kawi tlang let tlang laitak i. A nungmi Bawipa Kaimah in thu na kham ing; Mo in a hlawnthilte tu hmaihngal ngai in a sil bangin, he na minungte tu nangmah caah hmaihngal tlak hlawnthil bang i tuh i.

¹⁹ “Na ram tu hnawmborh pumhnak ah cang ai khing sukso i! Ikhalselai a umtute caah fip ze tuh i. Cen hnawmborh pumhnak ai a cangruaitute tu a hlapui ah dahhnak tuar tuh i.

²⁰ Saltanghnak ramai a suaktu na minungte in ‘Hemi ram tu a fip ze i, ram kau deuh kin daih i,’ tiin ni khatkhat ah na ti leh tuh i.

²¹ Ciafangin na thinlung niu in, ‘Aisu in he fate heh i te sah i? I fate thi ai nucing i cang zo i; Thawngtohhnak le hnawthnak ing, Aisu in he fate heh kilkhawl ini? Kaimah lek ai zamhnak ing, Akonan he fate heh kawi ini? tiin ti tuh isi,” ti i.

²² Bawipa Pathian in a minungte hnenah, “I kut hlir tuhai miphunte hnenah tintaihhnak larruai tuh ing; Ciatihin ning fate tu inn ah koihpui tuh i.

²³ Kumpibawite tu ningmah caah pa bang i tuhai, kumpibawinute tu ning tuamhlawmtu ning nu bang i tuh i. Ning hmaiah lu ut tlang tuhai ning kihzah tuh i; Ning hmaiah upathnak ning pe tuh i. Ciafangin kaimah heh Bawipa ing ti khiah i ling tuh i si; Kaimah ai bawmhnak i iangtute tu vansang tuh lo i,” tiin ti i.

²⁴ Ralkap ai langciahnak thil tu sut leh thil tuh i sim? Ninghiohnak nai lomi ai pomciahnak thawngtlate tu O thil tuh nawn i sim?

²⁵ Bawipa in, “I, cang thil lo ning tihnak tu cang tuh i; Ralkap hat ngai kut songai ral pom mite tu o tuhai, ninghiohnak nai lomi ai langciahnak thilri khai sut leh tuh i. Na tawngtu hmuahhmuah kaimah in tawng tuhai, ning fate tu o tuh ing.

²⁶ Ning naunehtute tu amahte veve rekdunruai tuhai, Mirek hiamhnak le thinrawhnak in ri tuh i. Ciafangin ningmah ning humtu le ning luatruaitu heh Bawipa kaimah ing ti khiah miphun hmuahhmuah in ling tuh i. Israel ai Pathian a hat ngai ing ti khiah ling tuh i,” tiin ti i.