Isaiah 39 - Zanniat Bible

Babylon In Palaite

¹ Cia can ah, Babylon kumpibawi Baladan ai fapa Merodach Baladan in kumpibawi Hezekiah fawi i ti za i; ciamanin lai pakhat le lehsawng pakhat kuat i.

² Hezekiah in Baladan ai palaite tu phatak ngai in sik ai a lianhnak hmuahhmuah hmuh sio i. A naihnak a sui le a ngunte, rimhmui le yihmuite, a ralkap le a ral thilthuamte hmuh i. A thilri dahhnak inn songah ituseh, a ukhnak song hmuahhmuah ah ituseh, a naihnak a hmuh lohnak pakhat khai um lo i.

³ Cen prophet Isaiah tu kumpibawi Hezekiah hnenah feh ai, “Hemite tu akonan kawi tlang i? Na hnenah ziang na rel tlang i? tiin zawt i. Hezekiah in, “Ram hlapui, Babylon ram an kawi tlang i,” tiin ti i.

⁴ Isaiah in, “Kumpibawi inn songah ziang hmu tlang pa? tiin a zawt fangin Hezekiah in, “Zaizongza hmu sio i. Thilri dahhnak inn songah i hmuruai lohnak zaikhai um lo i,” tiin ti i.

⁵ Ciafangin Isaiah in, “Cungnungber Bawipa in,

⁶ ‘Na inn songai a umhnak hmuahhmuah tunnia tianin na pupate ai khawl awnghnak thilri le hlawnthilte tu Babylon ramah a phur sek can hleng leh tuh i. Zaikhai tang tuh lo i.

⁷ Nangmah ai tesinfate rori khai Babylon ah fehpui tuhai Babylon kumpibawi inn ai ruaihtu tuhin anite til ret sah tuh sio i,’ ti i,” tiin rel i.

⁸ Ciami tu kumpibawi Hezekiah in a za fangin a nun songah cenin daphnak le humhimhnak um tuh i, tica i ti a sang manin Hezekiah in, “Bawipa hnenin a hlenghnak thu na relhnak tu pha i,” tiin sawn i.