Isaiah 38 - Zanniat Bible

Kumpibawi Hezekiah Urhnak Le Cakhnak

¹ Cialai ah kumpibawi Hezekiah tu ur ai thi dawn i. Amoz ai fapa prophet Isaiah in fan ai, “Bawipa in a panhlahhnak hmuahhmuah bawn in rel tu sio seh, nung tuh lo i na ti i. Ciamanin thi tuhin ralring tu,” tiin ti i.

² Ciafangin Hezekiah tu bangkhang lamah her ai sawngen i.

³ Aw Bawipa, i cak song hmuahhmuah ah nangmah rinsan le rinsantlak in na ruaih zo ai bawn tuh na daihsahhnak ian bawnsuak tum ṭio khiah hih tu hram law,” tiin ti i. Cen a rohpui in kap dekdo i.

⁴ Cen Bawipa in Isaiah hnenah,

⁵ Hezekiah hnenah feh tulai ‘Bawipa Kaimah, na pu David ai Pathian in na sawngenhnak heh ngai ai na mithli hmu zo ing. Tun hnua kum hlainga na nungruai rih tuh ing.

⁶ Nangmah le he khuapui tu Assyria Kumpimangbawi kut songin na luatruai tuhai he khuapui tu hup tuh ngiode ing, ti i’ tiin rel tu,” ti i.

⁷ Isaiah in, “Bawipa in a thukhamhnak khimruai tuh i tihnak ah tintaihhnak na pe tuh i.

⁸ Kumpibawi Ahaz in a bawnhnak ni tehhnak tu sun hnuaah Bawipa in nihlim khiah khel lamah kal hra letruai tuh ing,” tiin ti i. A tihnak bangin nihlim heh khel lamah kal hra let i.

⁹ A urhnak in Hezekiah a cak leh fangin thangphathnak la ngan i.

¹⁰ I san pha laitak ah mithi khua hleng tuh ihang ing, ti ing. Hlombawr in nung tuh loin ruat dun ing.

¹¹ Midang a nungmi aisu khai, Minung umhnak he ramah cenin, Bawipa tawk leh tuh nawn lo ing tiin ruat ing!

¹² I nunhnak tu a balhnak hlam bangin sat ai bo zo i. Thiam tlang in tanhnak pon bangin. Pathian in i nunhnak boruai ihang, ti ing.

¹³ Zankhuavar rori i ur tuar in kap in ai ing; Chintit in i ruh hmuah i ek sah sek selai ciatih bangin. Pathian in i nunhnak i boruai i ti ing.

¹⁴ I aw tu a thuniu ze manin za thil nawn lo ihang; Khuro bangin ai ve menma ing. Vancung lam i hlirhnak ah i mit cawl sek i; Aw Bawipa hebang harhnak songin i o tu.

¹⁵ I relthilhnak zai um i? Bawipa ai bawnhnak sio i! I thin ur ze manin mitmu thil lo ing.

¹⁶ Aw Bawipa, nangmah caah nung tuh ing, Nangmah ca ian ah nung i nuam i. I cakruai tulai i nungruai tu hram law.

¹⁷ I thin urhnak tu daphnak ah cang tuh i; I nunhnak tu kihkulhnak songin o isi. I sualhnak hmuahhmuah i ngaithiam sio isi.

¹⁸ Mithi khua an aisu inkhai na thangphat tuh lo i; Mithite in rinsantlak na ihnak tu ring thil tuh lo i.

¹⁹ Na thangphattu khiah minungte i; Tunah kaimah in thang na phat bangin. Rinsantlak na ihnak tu pate in a fate hnenah rel i.

²⁰ Aw Bawipa, nangmah in i cakruai zo isi; congcing tum tuhai Nangmah thangphathnak ah la sa tuh ing. I nun song hmuahhmuah ah nangmah thangphathnak Na biakinn songah sa tuh ṭio ing.

²¹ Isaiah in kumpibawi khiah, “Thaihmin a vut in rial tulai na uihlut ma ah bet tu; cen na cak tuh i,” tiin ti i.

²² Ciafangin kumpibawi Hezekiah in, “Biakinn ah feh thil leh tuh ing, ti hmuhhnak ah ziang hnikhnaihhnak um i?” tiin zawt i.