Isaiah 36 - Zanniat Bible

Assyria Mite In Jerusalem Sim Tum I

¹ Kumpibawi Hezekiah in Judah ram a ukhnak kum hlaili kum ah Assyria ram kumpimangbawi Sennacherib in vingpui ai kulhhnak Judah ram khuate tawng ai tampui lang i.

² Cia hnuaah a kuthnia ai tlangsuak upa ber tu ralkap tampui thawn Judah kumpibawi Hezekiah heh remhnak bawnruai tuhin Lakhish in Jerusalem ah hlat i. Ciami a hlathnak bawi tu pontaktute naper hmun lampui, vumta tili in ti a langhnak tizir hiangah um i.

³ Ciafangin Judah mi upate pathum in tawk tlang i: Kumpibawi in napertute hotu Hilkiah ai fapa Eliakim, zung cazipui Sheba le laibu awhtu Asaph ai fapa Joah i.

⁴ Assyria ralbawi pa in, “Zaimanin kumpibawi Hezekiah tu amah le amah thupui ngai in um ini? ti khiah kin kumpimangbawi in ling nuam i.

⁵ Ponka menma in ralkap lam hathnak le thiamhnak heh aiawh thil tuh i tiin ruat dun i sim? Kaimah tawng tuhin aisu in i bawm tuh i tiin ruat i si?

⁶ Ling zo ing, Egypt in kin bawm tuh i tiin um i si. Ikhalselai Egypt rinsan heh zaibang i ling aw i sim? Faikiang tuhin phaipeng kuang hmang bang i, ek ai na kut na at zel i. Egypt kumpibawi ning rinsan fangin tu ciatih tuh ṭiode i.

⁷ “Ihlahle Bawipa ning Pathian rinsan i aw i sim? Hezekiah in puleng pakhat lek ah Pathian bia tuh i si tiin Judah le Jerusalem mite thupe ai a dang biakinn le pulengte hmuahhmuah a bal sekhnak khiah ning Pathian biakinn le pulengte nakhaw maw!

⁸ Ilekhaw kin kumpimangbawi hming in thu ning tiam tuh ing! Siphuhte thawng hnih ning pe tuh ing, a totu tuhin minung ciazah hmu thil tuh i sim?

⁹ Kin Assyria ralkap bawi lakah ralbawi nauta ber rin kim lo na i si! Ciahlaiah Egypt in siphuhleng le siphuh vumto ralkapte kin kuat tuh i ti cop lai i si!

¹⁰ Ning ram tawng ai siat i suah heh Bawipa ai bawmhnak tel loin ruat i sim? Bawipa amah rori in ning ram tawng tuhin i ruai i,” tiin ti i.

¹¹ Ciafangin Eliakim, Shebna le Joah in ciami ralbawipa hnenah, “Kin hnenah tu Aramaic in pong tu! Ling hlen i ing. Hebrew in pong mah; Vingpui vumai a ummi zongzong in kin ngai i,” tiin ti tlang i.

¹² Assyria ralbawipa in, “Hemi i thurelhnak hmuahhmuah heh nangmah le ning kumpibawi hnen ian ah rel tuhin kin kumpimangbawi in i hlat ah ruat i sim? I lo i; vingpui vumai a totute hnenah hemi thu heh rel tuh ing; zaimantifangin ningmah inkhai ning bawn tuh bang thotho in anite inkhai amahte ek ai tuhai amahte zin ding tuh i,” tiin ti i.

¹³ Cen ralbawipa tu ding ai Hebrew in, a aw naih tawp in au ai, “Assyria Kumpimangbawi in ning hnenah a ponghnak heh ngai tu ih.

¹⁴ Hezekiah in ning zawl maseh, tiin ralringhnak ning pe i. Hezekiah incen ning o thil tuh lo i.

¹⁵ Bawipa rinsan tuhin a ning forhhnak heh sang mah ih; Bawipa in kin o tuhai kin khuapui tu Assyria ralkapte langruai tuh lo i, tiin sang nuam mah ih!

¹⁶ Hezekiah ai thu heh sang mah ih. Assyria Kumpimangbawi in tunah ning khuapui songin suak in remhnak bawn tuhin thu ning pe i. Ning cabit kuang ai cabit khiah ning ai siang tuh i; ning thaikung in thaihmin khiah ai tuh hlen ai ning tikhur ai ti tu ding tuh hlen i si.

¹⁷ Cen kin kumpimangbawi in ning ram thawn a bang dun ram rori ah ning umruai tuhai ciata ah cabitti ning ding thil tuhin cabit kuang um ve ai sang bawn tuhhnak fangcang um i.

¹⁸ Bawipa in kin o tuh hlen i, tiin ruat tuhin Hezekiah in ning thinlung tu ning molh hnelhno maseh. Assyria Kumpimangbawi in ram tampui a tawng fangin amahte ramai khuavangte in amahte ram o i, ti ling awng lo i sim?

¹⁹ Akonah Hamath le Arpad khuavangte um sio i? Akonah Sepharviam khuavangte um i? Aisu tal in Samaria ram o tuh i.

²⁰ Ram hezah ai khuavangte lakah khuavang pakhat talin amahte ram khiah Assyria Kumpimangbawi kut songin o awng aw im? O lo manin ningmah tang ning Bawipa in Jerusalem o tuh i tiin akontih in sang zel i si,” tiin ti dekdo i.

²¹ Ciafangin mizapui tu dapkhep i; Kumpibawi Hezekiah ai a rel cia bangin dapkhep ai zaikhai sawn tlang lo i.

²² Cen Eliakim, Shebna le Joah tu lungsia in amahte hnikpon zik tlang ai Assyria ralbawipa ai ponghnak hmuahhmuah heh amahte kumpibawi hnenah rel i.