Isaiah 28 - Zanniat Bible

Sak lam Ukhnak Hrang Ralring Pehnak

¹ Israel ukhnak tu a bo ihang! A songlawihnak tu amahte hotu zurite ai lu vumah, papar ai bawnhnak kumpibawi lukhuk a vawi bangin, vawi i. A hngal ngai amahte lu tu pha bik in rimhmui mat napui thidawn in zuri tlang manin tlu zel i.

² Bawipa in anite tawng tuhin a hat ngai le huham a nai roh mi pakhat ril zo i. Ciami pa tu rial tla bangin tla tuh i, hli le ruah bangin kawi tuh i, thil siatsuahtu tilawi bangin kawi tuhai neh tuh i.

³ Amahte hotu zurite ai hngalhnak tu ke in foncihhnak i tuh i.

⁴ Amahte hotu mihngalte ai hmingthanghnak tu thaihmin hmasaber loih in ai manin a bo bangin bo tuh sek i.

⁵ Can hleng tuhai cia nia ah Bawipa tu a minung a nungsunte caah papar ai bawnhnak kumpibawi lukhuk bang i tuh i.

⁶ Cungnungber Bawipa in amahte thukhantute hnenah dikcanghnak thinlung pe tuhai amahte khuapui kotkate a tawngtu a ralte a hnawttu hnenah ralphahnak pe tuh i.

Isaiah Le Zuri Prophette

⁷ Prophet le suangbawite rin zuri tlang ai sawn tlang diamdo i. Cabit zu le zureu tam ze ding tlang ai nuamhmuncang ah lu am in sawn ai buai tlang ngai i. Prophette tu zu ri ze manin Pathian ai larhnak a hmuruaihnak rin a sullam ling tlang lo i; Suangbawite khai zu ri ze ve ai amahte hnenah a hlenghnak thurel tuh rin ling tlang lo i.

⁸ Amahte tohnak cabuai rin amahte awk in dim sio ai a cianghlim hmun tlawmniu tal khai um lo i.

⁹ Kaimah vumah phuncam tlang ai, “Hemi pa tu aisu zirh ing tiin ruat dun ini? A thurelhnak tu hnawihlat sawng nauniu ca lek ah pha ngawn ilo im?

¹⁰ A kin zirh fangin a pongfang a pongfang in, a tluan a tluan in le a thu pakhat hnua pakhat in kin zirh fawn i!” kin ti i.

¹¹ I thurelhnak a ngai ning nuam hlah lekhaw Pathian in ramdang pong ling lomi hmang in ning zirhruai tuh i.

¹² Amah in cawlumhnak le nunnuamhnak ning pe napui a thu ngai nuam tlang lo isi.

¹³ Ciamanin i Bawipa in a pongfang a pongfang in, a tluan a tluan le thu pakhat hnua pakhat in a zirh tumhnak khiah! Cen kal khat ning suan cang fangin ning bah tuh i. Ma liam tuh i si, thang in ning awk tuhai ralpom mi ning cang tuh i.

Zion Hrang Inn Ning Lungpui

¹⁴ Jerusalem an he minungte a uktu ningmah mipuarthaute, Bawipa ai thurelhnak ngai tu ih!

¹⁵ Ningmah in, “Thihhnak thawn thukhamhnak nai zo ai mithi khua Sheol thawn lungkhimhnak laikhen bawn zo i ing,” tiin tluangkhawng dekdo i si. Thil pha lo poimawh a hleng fangin kin luat tuh i tiin um ai thudonrelhnak le mi zawlhnak ning rinsan manin kin him tuh i, tiin ruat tlang i si.

¹⁶ Ikhalselai Bawipa in, “Zion ah a kho ngai innham pan ai, ciami innham ahcen inn ning ca tiangcihhnak lungpui dah ing. Ciami inn ning lungpui vum ahcen, ‘A kho ngai sanghnak tu a thinsau i,’ tiin ngan ing.

¹⁷ Inn ham cang maw cang lo tehhnak tuhin felhnak hmang tuh ing. Ikhalselai ning rinsanhnak thudon tepawl tu hlisia le rial in siatsuah tuh sek ai ning himhnak tu tilawi in siatsuah tuh sek i,” tiin ti i.

¹⁸ Thihhnak thawn thukhamhnak ning bawnhnak tu bal tuh sek ai mithi khua Sheol thawn lungkhimhnak laikhen ning bawnhnak khai phiat tuh sek i. Thil pha lo poimawh a hleng fangin tilawi bangin ning khuk tuh sek i.

¹⁹ Ciami thil poimawh heh hemi ṭumkhat lek i tuh i, ning ti sawng fangin a dang hleng tuh nengno i. Zingkhat hnua zingkhat hleng tuh i. A sun a zan in tuar tlang tuh i si. Pathian thu a thar in hleng tuhai tihikkul tuh amam i.

²⁰ Thufim ah, “Ithmun khuahluan le a com ze i, sil tuhhnak pon le a cik ze i,’ tihnak pa bang i tuh i si.

²¹ Bawipa ai thil bawn a tumhnak tu thil phundang ngai bang khalselai bawnsuak tuh i; Perazim tlang le Gibeon phairawn ah a tawng dekdo zo bangin a kul fangin tu tun inkhai ning tawng tuh i. A hampan zohnak a naper heh khimruai tuh i; ciami a naṭuanhnak tu ling thil lohnak thil ngaihsunurkul i tuh i.

²² Na hnenah ralringhnak thu a relhnak heh hnihsahnak ah ruat in hnihsan menma mah. Hnihsan menma lesikhaw na luathnak tuhin har tuh amam i. Cungnungber Bawipa in hemi ram siatsuah tuhin a ruatciahnak heh ling zo ing.

Pathian Ai Fimhnak

²³ I relhnak ngai tu ilai ning hnenah i phuanghnak heh pha bik in ruat tu ih!

²⁴ Aisu bang lovai pa inkhai a lailethnak song rong cinghnak ah tiin catloin lovai awng kel lo i.

²⁵ A lailethnak tu phatak ngai in a sel hnuaah zira le rimhmui ci vorh i. Sangvut le barley sangvut pawi ai a hiangah rong dangdang cing i.

²⁶ Lo naperdan thiam i, zaimantifangin Pathian in a zirhhnak i.

²⁷ Zira ci le rimhmui ci lang nuam in tumbel lianpui in seu lo i; tumbel tu a cateng tuh fungkek hmang i.

²⁸ Sangvut a lang fangin a hnawm sio tianin catloin rial awng lo i. Sangvut mu rial ngah tuh loin ralring in a kawlpawleng in cil ai a cateng niu in cil thiam i.

²⁹ Hebang fimhnak le thiamhnak heh Cungnungber Bawipa ai pehnak i. Pathian khuakhanhnak tu fimhnak in khuakhanhnak i ai hlawhtlinghnak um ṭiode i.