Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isaiah 27 - Zanniat Bible

1 Cia nia ah tifingriat songai a umtu rul tampui rek tuhin le a ngerh dun le kihkul Leviathan rul cawh tuhin Bawipa in a hat le a hmual nai ralvang hmang tuh i.

2 Cia nia ah Bawipa in cabit vuan nuam ngai ah,

3 “I cabit vuan heh kaimah in kil ai ti burh ṭiode ing. Aisu inkhai siatsuah lohnak tuhin a sun a zan in kil ing.

4 Tun tu i cabit vuan vumah thin i raw nawn lo i. Hling le so um lekhaw kaimah in tawng tuhai mai in tai tuh sek ing.

5 Ikhalselai i minung ai ralte in kaimah ai humhimhnak daih lekhaw kaimah thawn remhnak bawn tuseh. I, kaimah thawn remhnak thula bawn hmasa tuseh,” ti tuh i.

6 Cia nia ah Israel mite, Jacob ai tesinfate tu thingkung bangin hnuk hla tuh i; mawm tuhai par tuh i. Ciatihin laipua vumah a thai in dim tuh i.

7 Israel mite tu amahte ralte tlukin Bawipa in cawh sia lo i; a thitu khai amahte ralte zah in tam lo i.

8 Bawipa in a minungte tu saltanghnak ai kuathnak in cawh i. Nisuak lamin a zuanghnak hlisia hmutruai i.

9 Lawkite puleng ai a tianghnak lungtote tu miphiu vut bangin a rialcip hlanlo le Asherah pathian nu tumrul in thing birhnak le rimhmui taihnak pulengte a um song ahcen Israel sualhnak heh ngaithiam tuh lo i.

10 Vingpui ai kulhhnak khuapuite tu hnawmcan zo sek i! Hampalak ramkhing bangin lawng ai khing ruahro i. Sumhnam lenghnak ramah cang ai sumhnamte um ai rong ai tlang i.

11 Thingkakte khai ro ai tat sek i; nupangte in tih thing tuhin fom tlang i. Zaimantifangin minungte in zaikhai lingthiam tlang lo manin amahte semsuahtu Pathian in anite vumah ngaihharhnak le ninghiohnak zaikhai nai tuh nawn lo i.

12 Cia nia ah Bawipa in, Euphrates runpui in Egypt ramri tian a minungte pakhat hnua pakhat khawm tuhai fangcang le fanghi khan bangin khan tuh i.

13 Cia nia a hleng fangin Assyria le Egypt ramai saltang Israel mite ko tuhin thirhlung tum tlang tuh i. Kawi tlang tuhai Jerusalem khua, a mual thiang vumah Bawipa bia tlang tuh i.

Zanniat Bible © Bible Society of Myanmar, 2018.

Bible Society of Myanmar
ကြှနျုပျတို့နောကျလိုကျပါ:



ကြော်ငြာတွေ