Isaiah 14 - Zanniat Bible

Saltanghnak In Let Tlang I

¹ Bawipa in a minung Israel mite vumah ninghio thinpemhnak nai lehsal tuhai amah ai minung tuhin ril leh tuh i. Amahte ramah umruai leh tuhai anite hnenah ramdang mi khai um tuh i.

² Bawipa ai pehnak amahte ramah a let fangin miphun tampui in Israel mite tu bawm tuh i. Cen miphun tampui in sal bangin Israel ruaih tuh i. Israel mite sal ai a pom awngtute tu Israel in sal tuhin pom tuhai, anite a cawh awngtute tu Israel in uk tuh sio i.

Babylon Kumpibawi Mithi Khua Ah

³ Bawipa in Israel mite tu amahte rimsuhnak, amahte tuarhnak le naper har perhnak in cawlumruai ai com can bawn sah tuh i.

⁴ Ciami nia a hleng fangin Babylon kumpibawi heh hnihsan tuhai, “Mi ninghio nai lo kumpibawi tlok zo i! Aisu khai nauneh thil tuh nawn lo i!

^5-6 Amahte nehhnak le langhnak ram minungte cat lo ai a zohsuamtu le thinraw ai a naunehtu kumpibawi siava pawl tu amahte thil tibenhnak le huham thawn boruai sek i.

⁷ Tun tu laivum pumpuhluk ah daphnak le muanghnak um tuhai aisusu khai lungawi aipuang ngai in la sa tuh i.

⁸ Hemi kumpibawi a tlok zo manin Lebanon ramai farthing le cedar thingte tu aipuang tlang tuh ngai i. zaimantifangin amahte huatu kumpibawi um nawn lo i.

⁹ “Babylon kumpibawi hmuak tuhin mithi khua tu ralring cia i. Laivum a nun laiah upa i awngtute ai rauhla tu ralring ai, kumpibawite ai rauhla tu amahte tohkham in tho i.

¹⁰ Amahte veksen in au tlang ai, ‘Tun tu kinmah bangin na ṭawnṭai ve ihang! Kinmah bang thotho ihang si!

¹¹ Congcing awmawi thawn na lawm dehnak heh tun tu mithi khua Sheol hleng ve ihang si! Nang tu zang khuahluan ah mitmu ai pon na silhnak khai zang thotho i! tiin ti tlang i.

¹² Aw Babylon kumpibawi, vartin arsi, nang tu van in na tlok zo i! Tunhlan ahcen ram tampui neh isi, tun tu laivum ah vawnghnak tuar isi!

¹³ Van ah kai tum ai a sang ber arsi vumah na tohkham dah tum isi. Khuavangte tohnak sak lam tlang vumah kumpibawi bangin to tuhin ruat awng isi.

¹⁴ Khuanim vumah kai tuhai Cungnungber bangtu tuh ing, ti isi.

¹⁵ Ikhalselai a thuk ber hmun mithi khua ah nemhnak tuar isi.

¹⁶ Mithite in mitkhep lo le ka ka lo in na sik tlang tuhai, “Laivum a hlin siotu le ram tampui a hlawngruaitu khiah hemi pa heh im?

¹⁷ Khua tampui a siatsuahtu le laivum ramkhing ai a cangruaitu tu ani tu im? A sal pommi a hlat awng lomi le a inn ah a tlung siang lotu khiah ani tu im? tiin ti tlang tuh i.

¹⁸ Laivum kumpibawi hmuahhmuah a pha le a mawi ngai hlanmual ah phum tlang i;

¹⁹ Ikhalselai nang tu hlanmual nai lo ai na luang tu uih tuhin lonmi isi. Ral ai a rekhnak ralkapte luang thawn hmunkhat ah khukua songai lonmi isi ai fon tuar dekdo isi.

²⁰ Ning ram siatsuah ai na minungte na rek manin kumpibawi dang bangin songlawi bik ai phumhnak ngah tuh lo isi. Mihrokhrawl songkhat, na songkhatte aisu khai nung tuh lo i.

²¹ Rek tusek ih! Hemi kumpibawi ai fapate tu a pupate sualhnak manin thi tuh i. Amahte songkhat aisu inkhai laipua vumah miuktu cang tuh lo ai khua dintu khai um tuh lo i.

Pathian In Babylon Siatsuah Tuh I

²² Cungnungber Bawipa in, “Babylon tawng tuhai siatsuah tuh sek ing. I zuahmi aisu khai um tuh lo ai naupang khai zuah tuh lo i; aisu khai luat tuh lo i. Kaimah Bawipa in rel zo ing.

²³ Babylon tu cirhdup ah cang tuhai ciata ah simbu um tuh i. Babylon tu siatsuahhnak hmunphiah in phiak tuhai zaizongza phiat tuh sek i. Cungnungber Bawipa kaimah in rel zo ing.

Pathian In Assyria Siatsuah Tuh I

²⁴ Cungnungber Bawipa in cukcam ai, “I khuakhanhnak tu khim tuh i. I tumhnak hmuahhmuah bawn tuh sio i.

²⁵ Kaimah naihnak Israel ram songai Assyria mite tu siatsuah tuhai i tlang vumah parh sek in fon tuh ing. I minungte ai phurhnak Assyria hak tu hawk sah tuhai a thilrite tu hma sah tuh ing.

²⁶ Ciami tu laivum pumpuhluk caah i tumtekhnak i ai miphunte cawh tuhin i kut hmuh zo ing,” tiin ti i.

²⁷ Hemi bawnsuak tuhin Cungnungber Bawipa in tum rori i. A kut heh cawh tuhin er zo ai aisu inkhai kham thil tuh nawn lo i.

Pathian In Filistin Siatsuah Tuh I

²⁸ Kumpibawi Ahaz a thi kum ah hemi thu tu Pathian hnenin hleng i:

²⁹ Aw Filistin mite, ning vit tuarhnak fungkek tu tat zo ihang; ikhalselai ning lungawi duh mah ih! Rul pakhat a thi fangin a heng deuh rul dang pakhat suak i. Rul in a ti, ti ai a zuang thai rulhreng keuh i.

³⁰ Bawipa tu a minungte lakah mirimsu le mifarahte kilkhawltu i tuhai himniu in umruai tuh i. Ikhalselai ning Filistin mite vum ahcen a roh ngai in rian tlungruai tuhai pakhat khai ning luat tuh lo i.

³¹ Aw Filistin khuate, bawmhnak ngen in au tu ilai aihram tu ih! Ning veksen in thinlau in um tu ih! Sak lam an ralkap hlenghnak laikhu tu khuanim bangin hleng i, ciami ralkapte lakah ralhut pakhat khai um lo i.

³² Filistin ram an a hlengmi palaite tu akontih in sawn tuh i ing? Bawipa in Zion tu khoruai zo ai harsahnak a tuar ngiotu a minungte tu ciata ah humhimhnak ngah tuh i, tiin sawn tuh i ing.