Hosea 8 - Zanniat Bible

Bawipa In Israel Mawhhluk I

¹ Bawipa in, “thirhlung tum tu ih! I ram songah ralte tu muvanlai bangin zuang i. I minungte in amahte thawn i thukhamhnak bal sek ai i thuzirhhnak daih lo i.

² Kin Pathian i, kin tu amah minung i ing ai amah tu ling i ing, ti napui,

³ Thil pha zangtak sio i. Ciamanin a ralte in hnawh tuh i.

⁴ “I minungte in kumpibawi ril i, ikhalselai amahte thu in ril i. Hotu khai ril tlang i, ikhalselai kaimah ai lungkhimhnak tel lo i. Amahte sui le ngun suah tlang ai milim bawn i; amahte siatsuah dun tuhhnak hrangah!

⁵ Samaria khuapui song mite in sui kawlpawcang a biahnak heh i hua i! Amahte vumah thin i raw ze i. Milim heh zaikom tian bia tuh ini? Zaikom fangin com tuh ini?

⁶ Amahte milim tu Israel mite kutzungthiamte ai bawnhnak i; Pathian ngaingai rin ilo i! Samaria ai amahte biahnak sui kawlpawcang heh seu ai khoi tuh sek i.

⁷ Hlivua pawi tuhai khuahu khawm tuh i! A vui um lo rongkung in rong suah thil tuh awng lo i. Rong a suah thil inrin ramdang mi in ai tuh i.

⁸ Israel tu thonhnak miphun ihang; miphun dang pakhat bangin cang zo ai bel keh bangin hmang tlak lo ihang.

⁹ Hampalak laak bangin a lung ruh ai amah daihhnak lampui ian hlun i. Assyria bawmhnak ngen nuam in tlan i. Miphun dang ai humhnak daih in a daihhnak hnenah paisa pe i.

¹⁰ Miphun dang hnenah zuar dun napui tun tu khawm leh tuh ing. A rai hlanah Assyria Kumpimangbawi in nauneh tuhai harsahnak a roh ngai in tuar tuh i.

¹¹ “Israel mite in amahte sual thianfaihnak tuhin puleng tam amam in bawn i; ikhalselai ciami pulengte tu amahte sualhnak hmunah cang i.

¹² Mipui caah a siar in siar cawk lo thuzirhhnak ngan ing, ikhalselai lamdangpui i, tiin hlun nuam lo i.

¹³ Hibawlhnak sel tu hiam ngai i, hibawlhnak sa khai duh ngai i. Ikhalselai kaimah a Bawipa tu amahte vumah lung i awi lo i. Amahte sualhnak hih tuhai ciami sualhnak manin cawh tuh ing. Cen Israel ramah let tuh i.

¹⁴ “Israel mite in inn phapha sa i, ikhalselai amahte bawntu heh hai i. Judah mite in vingpui ai kulhhnak khuapui tampui din i. Ikhalselai amahte khua le inn phapha pawl kang tuh sio in mai hlat tuh ing,” tiin ti i.