Hosea 5 - Zanniat Bible

¹ “Ningmah suangbawite hemi heh ngai tu ih. Ningmah Israel mite, phatak niu in ngai tu ih! Dikcanghnak thawn thukhantu tuh inapui i si ai ning vumah thukhanhnak hleng tuh i. Mizpah ah thang ah ning cang zo i; Tabor tlang ah mi awktu sur ah ning cang ai,

² Akhesia khua ah mi tlokhnak khur thukpui ah ning cang zo i. Ciamanin ning veksen in ning cawh tuh ing.

³ Israel thula tu ling sio ing; i hnenin thup dun thil tuh lo i. Rintlak lo i zo ai a minungte tu kaimah bia tuhin tlak lo i,” tiin ti i.

Hosea In Milim Bia Ralringhnak Pe I

⁴ Mipui in thil sual bawn manin Pathian hnenah a let tuhhnak kham i. Amahte thinlung ah hlotlau per nuamhnak dim ai Bawipa ling nawn lo i.

⁵ Israel mite ai puarthauhnak khiah amahte mawhphurhtu ber i. Amahte sualhnak in bahruai ai tlu i; Judah mite khai amahte hnenah tlu ve i.

⁶ Amahte tuute le kawlpawte hibawlhnak tuhin Bawipa hnenah sel i, ikhalselai amahte caah hnempui lo i. Bawipa hmu thil lo i, amahte hnenin tlan zo i.

⁷ Bawipa ai hmaiah rintlak loin cang zo i; amahte fate Bawipa ai i nawn lo i. Ciamanin amahte ram tu siatsuah cing tuh ihang.

Judah Le Israel Tawng dun I

⁸ Gebeah ah raltawnghnak thirhlung tum tu ih! Ramah ah ralringhnak thirhlung tum tu ih! Bethel ah raltawng saphnak au tuh dekdo ih! Benjamin mite, raltawnghnak ah feh tu ih!

⁹ Cawhhnak nia hleng dawn ihang; Israel tu siatsuah tuh i. Israel mite, he thil heh cang tuh tengteng nakhaw.

¹⁰ Bawipa in, “Judah in Israel tawng ai a ram sut manin thin i raw i. Ciamanin cawhhnak tu amahte vumah tilian bangin burh tuh diamdo ing.

¹¹ Israel tu naunehhnak tuar i; zai pe tuh khai nai lomi hnenah bawmhnak ngen in feh ṭiode manin amah ai ram rori sung zo i.

¹² Israel vumah siatsuahhnak hlengruai tuhai Judah mi vumah hnawmralhnak hlengruai tuh ing.

¹³ Israel in a ur luardan a hmu fangin le Judah in a hmaihma a rohdan a ling fangin, Israel tu a hat ngai Assyria Kumpimangbawi hnenah bawmhnak ngen tuhin feh i; ikhalselai a urhnak ituseh, hmaihma ituseh cak thil lo i.

¹⁴ Israel le Judah tu chintit in sumhnam a dawp bangin dawp tuh i. Kaimah rori in hlai tuh sek ai hlum tuh ing. I duk diamdo fangin aisu inkhai o ben tuh lo i.

¹⁵ “Amahte sualhnak manin a cateng dung tuar ta ai kaimah i si leh hlanlo i minungte heh zangtak tuhlai ing. Amahte tuarhnak manin kaimah heh i si tum thai pang i,” tiin ti i.