Hosea 2 - Zanniat Bible

¹ Ciamanin ning unau Israel mite tu “Pathian ai minung,” tiin le “Bawipa ai ithnak,” tiin ko tu ih.

Hlotlau Gomar, Hlotlau Israel

² I fate, ning nu heh rel tu ih; ani tu i nupui ilo im? Kai tu a pasal ilo ing im? A uire le hlotlau com tuhin rel tu ih.

³ Com hlah lekhaw a nu pum songin a suak laiah kawngkolh in a um bangin a hnikpon hawk sah tuh ing. Lai ro le lai car bangin bawn tuhai tihal in thi tuh i.

^4-5 A fate hnen ahkhai ninghiohnak nai tuh lo ing; anite tu zakthi hal lo hlotlau nu ai fate i! Ani in, “I daihtu hnenah feh tuh ing; ti le rong, tuuhmul le pon, olive thau le cabitti kin pe tuh pam ngawn i,” ti i.

⁶ Ciamanin a lampui khamhnak tuhin palkawng bawn tuhai hling le so in a cingkim in kulh tuh ing.

⁷ Amah a daihtute khiah a khel lamin hnawh tuh napui man tuh lo i. Si tuh napui hmu tuh lo i. Cen ani in, “Hmasa i pasal hnenah let tuh ing. Tunai tahin tun hlanah i nuam sawn i,” tiin ti tuh i.

⁸ A hnenah rong, cabit, olive thau le Baal biahnak ai a hmanghnak sui le ngun a petu heh kaimah ing ti khiah ling awng lo i.

⁹ Ciamanin i pe cia rong le cabit tu rongkhawm can ah lang leh tuh sal ing; a hnikpon hrang i tihnak tuuhmul le vopon khai lang leh tuh ing.

¹⁰ A hnikpon hawk sah tuhai a daihmi hmaiah kawngkolh in umruai tuh ing; i kut songin aisu in o thil tuh i.

¹¹ A nunnuamhnak puaite: kumsiar le hlasiar puaite, sabbath puai le biahnak lam puaite tu boruai tuh sio ing.

¹² “I daihtute ai pehnak,” a tihnak cabit vuan le a thaikungte siatsuah tuh sek ing. A cabit vuan le thingthai vuante tu ramkhing ah bawn tuh sio ai hampalak ramsate in siatsuah tuh sek i.

¹³ Kaimah i hai in Baal hnenah rimhmui tai ai a daih mite caah a khi le bilvuh vuh in a hlun hnelhno manin cawh tuh ing. Ciatihin Bawipa in rel zo i.

Bawipa In A Minungte Ithnak

¹⁴ Ciamanin amah tu nelrawn ah hoi leh tuhai ithnak ponkam thawn zawl tuh ing.

¹⁵ A cabit vuante tu pe leh tuhai Harsahnak Nelrawn tu umlamhnak dawngkham ah bawn tuh ing. A no lai Egypt in a suak lai bangin kaimah lam her leh tuh i.

¹⁶ Ciatihin “I Pasal,” tiin i ko leh tuhai, “I baal,” tiin i ko tuh nawn lo i.

¹⁷ Baal hming tu salruai tuh nawn lo ing.

¹⁸ Ciafangin tu i minungte tuahmawh lohnak tuhin laivum ramsa le van ai zuang vaniu le laipua ai bok vak pawl thawn thukhamhnak bawn tuh ing. Ral tawnghnak ralthuamte: ralvang le li le thal hmuahhmuah pairuai tuh sio ai i minungte tu lungmuang niu le himniu in khuasa tuh i.

¹⁹ Aw, Israel, i nupui tuhin na hoi tuh ing; Mifel le rintlak i tuh ing. A kho ngai ithnak le ninghiohnak Na vumah larruai tuhai Kumzangza in kaimah ai i tuh isi.

²⁰ I thukham khoruai tuhai, kaimah ai i tuh isi; Kai tu Bawipa ing ti khiah ling tuh isi.

^21-22 Ciafangin i minung Jezreel ai sawngenhnak ngai sah tuhai, Lai ah ruah siruai tuh ing. Cen laipua in rong le cabit le olive suakruai leh tuh ing.

²³ Ram songah i minungte tu kho ngai in umruai tuh ing. Khangso tuhai mi nainung ngai cang tuh i. “Lo-ruhamah,” tiin ko awng mite tu “Ninghio tuh ing,” cen, “Lo-ammi,” tiin ti awng mite tu “I minung i si,” ti tuh ing. Cen anite in “Kin Pathian isi” tiin i ti tuh i.