Hosea 13 - Zanniat Bible

Israel Vumah Hnuataber Thukhanhnak

¹ Hlanlai ahcen Epharaim hinte a pong fangin hin dangte in kih awng de i. Israel hinte in Epharaim hin khiah a sang ngai in sik awng de i. Ikhalselai Baal khuavang biahnak in sual tlang ai ciamanin anite tu thi i.

² Sual amam ai bia tuhin thir in milim bawn i. Minung thinlung in suai fawmhnak ngun milimte minung kut in bawn i. Cen, “Ciami milim hnenah hibawlhnak sel tu ih,” tiin ti i. Akontih in minung in kawlpawcang hmel cuang in a bawnhnak kawlpaw lim heh thut thil ini!

³ Ciamanin he minungte tu zing lam mawk kai bangin pairal tuh i, nai tla bangin pairal tuh sek i. Fangcilhnak pum songin hlivua ai a hmuthnak fanghi bang i tuh i; maikhu suahhnak in a suakmi maikhu bang i tuh i.

⁴ Bawipa in, “Egypt in ning hoitu heh kaimah, Bawipa ning Pathian ing. Kaimah siarlo Pathian dang nai lo i si. Kaimah ian heh ning otu ing.

⁵ Ramkhing le ramcar ah phatak niu in ning kilkhawl ing.

⁶ Ikhalselai ram pha songah ning lut fangin rong ning kham ai lung ning muang i; cen ning puarthau manin kai tu i hai tlang i si.

⁷ Ciamanin chintit bangin ning zoi tuh ing. Tlavang bangin ning fehhnak lampui in ning bawh tuh ing.

⁸ A faniu sut tuarmi vompui bangin ning bot tuhai ning hlai tuh dekdo ing. Chintit bangin ning hmun rori ah ning kial tuh sek ai sahrang bangin cipdiak in ning zik tuh sek ing.

⁹ “Aw Israel mite, Kaimah in ning siatsuah tuh ing! Aisu in ning hup ben tuh i?

¹⁰ Kumpibawi le konghoitu ngen i si. Ikhalselai tun tu akonah um tlang i? Akontih in ram pumpuhluk hup ben tuh i?

¹¹ I thinraw in kumpibawi ning pe zo ing ai i thinraw in lang leh zo ing.

¹² “Israel ai sualhnak le mawhhnak tu laihnahzual vumah phatak niu in ngan i ai phatak niu in khum ai dah liang i.

¹³ Israel tu nung thil can pha nai i, ikhalselai a voi manin ciami can pha heh a langdan thiam tlang lo i; amah tu a te dawn nauniu a nu pum songin suak nuam loin a letlehtu bang i.

¹⁴ Hemite tu mithi khua Sheol in o tuh lo ing, thihhnak kut songin khai o tuh lo ing. Aw thihhnak na pultlung urhnak keng tucuk lai! maw Sheol, na mi siatsuahhnak thawn kawi tu! Hemite vumah ninghiohnak zaikhai nai thil nawn lo ing.

¹⁵ Israel tu phaikung bangin dawn hluanghlo khalselai nelrawn in nisuah lam hlivua sa zuangruai tuhai a cirhti le tikhurte tu car tuh sek i. Amahte thil mankhung hmuahhmuah hnawm tuh sek i.

¹⁶ Pathian a engsan manin Samaria tu cawhhnak tuar tuhai piak tuh sek i. A minungte tu ralkut in thi tlang tuh i. A fate tu laipua ah sep in thi tuhai a nupang naupai laite tu pum raihnak tuar tlang tuh i,” tiin ti i.