Hosea 12 - Zanniat Bible

¹ Zingniu in zan lam tian Israel mite ai a bawnhnak tu thil hnempui lo le siatsuahhnak lek i. Amahte lakah mi zuarhnak le thisan suahhnak pungzai amam i. Assyria thawn ralremhnak bawn ai Egypt thawn pursumhnak bawn tlang i,” tiin ti i.

² Bawipa in Judah mite mawhhluk tuh nai i; Israel mite khai a nundan pha lo manin cawh tuh ing. Amahte vumah phuzul tuh ing.

³ Amahte pu Jacob tu a upa Esau thawn a nu pum songah a um kawm laiah tawng dun awng i; upa a khang fangin Pathian thawn ruangtawng fawn i.

⁴ Vancungmi thawn ruangtawng kawm ai neh i. Jacob tu kap ai hmuifu ngen i. Pathian tu Bethel ah Jocob hnenah kawi ai thu rel i.

⁵ Ani tu Cungnungber Bawipa Pathian i; Bawipa tihnak tu a hming i.

⁶ Ciamanin Jacob ai tesinfate, ning Pathian rinsan tu ilai tunah amah hnenah let tu ih. Rintlak le dikcang niu in nung tu ilai, ning Pathian naṭuan tuh heh thinfual in iang tu ih.

Thukhanhnak Ponkam

⁷ Bawipa in, “Israel mite tu Canaan mite bang thotho in hrokhrawl i. Amahte thil laitu khiah a dik lo cuaitehhnak in zawl nuam i.

⁸ Kin lian ngah zo i, nai ngah zo i ing. Aisu inkhai thil dik loin lianhnak ngah i si tiin mawh kin hluk thil tuh lo i,’ ti i.

⁹ Ikhalselai kaimah heh Egypt ram an ning hoitu Bawipa ning Pathian ing. Nelrawn ai ning hnenah i kawi laiah ponhlam songah ning um awng bangin ning umruai leh tuh ing.

¹⁰ “Prophette hnenah thurel ai larhnak tampui umruai ing. Prophette hmang in i minungte hnenah ralringhnak pe ing.

¹¹ Gilead ah milim bia tlang ai a biatu hmuahhmuah thi tuh i. Gilgal ah kawlpawcang in hibawl tlang i; ciamanin pulengte tu hampalak ai lungto pumhnak ah cang tuh i,” tiin ti i.

¹² Kin pu Jacob tu Aram ramah tlan i; ciata ah nupui hlawhhnak in tuukhal i.

¹³ Israel mite Egypt saltanghnak an suah tuhin le kilkhawl tuhin Bawipa in prophet pakhat hlat i.

¹⁴ Israel mite in Pathian tu a roh ngai in thinrawtiar i; amahte sualhnak manin thi tlak i. Pathian vumah thangsiahhnak hlengruai manin amah in cawh tuh i.