Hosea 10 - Zanniat Bible

¹ Israel tu a thai ha ngai cabit kung bang i. A nainung amam fangin puleng tam amam tiang i. A ram an rong tam amam a suak fangin amahte puleng lungto khuam cianghlim pawl khai mawi amam in bawn i.

² Amahte thinlung tu mi zawlhnak in dim ai amahte sualhnak manin tuar tuh i. Pathian amah rori in a pulengte bal tuhai a khuam cianghlim pawl khai ekruai tuh sek i.

³ A rai hlanah he minungte in, “Bawipa kihzah tlang lo manin kumpibawi nai lo ising. Ikhalselai kumpibawi in ziang kin ti sah ben tuh cuang i?

⁴ Amahte cukcam thukhamhnak heh ponkam menma i, thulovang khamdunhnak le tiamdunhnak lek i. Dikcanghnak tu diklohnak ah cang ai lailethnak songai a ru nai hampa bangin po diamdo i,” tiin ti tuh i.

⁵ Samaria khuapui songai a umtute tu thinlau tuhai Bethel ai amahte sui kawlpawcang a pai lio manin lungsia tuh ngai i. Amahte le suangbawite in ciami kawlpaw lim heh kah tlang tuh i. A mawiruaihnak sui hmuahhmuah a lang sek fangin kap in au tuh i.

⁶ Ciami kawlpawlim tu Assyria Kumpimangbawi hnenah siahkhuai in pe tuh i. Kawlpaw lim bia tuh thu hlun tlang manin Israel tu zakthi le mualpho in um tuh i.

⁷ Samaria le a kumpibawi tu ti vumai a langhnak thingheu bangin lan tuh teu i.

⁸ Israel mite ai biahnak Aven tlang phundir ai milimte tu siatsuah tuh sek i. Amahte puleng vumah hampa le hlingkung po tuh i. Misenpui in tlangsang hnenah, “Kin thup tu,” ti tlang tuhai mual niu hnenah, “Kin khuk tu,” tiin ko tuh i.

Bawipa In Israel Thukhan I

⁹ Bawipa in, “Israel mite Gibeah ai amahte sualhnak a panpah in tun tian ah i vumah sual heh com lai lo i. Ciamanin ral in Gibeah ah man tuh i.

¹⁰ Hemi misual phun heh kaimah in tawng tuhai cawh tuh ing. Miphun tampui in bur tlang tuhai amahte sualhnak tampui manin cawhhnak tuar tuh i.

¹¹ “Israel tu hlanlai ahcen phatak ngai ai a hnar retmi kawlpawcang niu fangcil nuammi bang awng i. Ikhalselai naper har per ben tuhin a hak mawi ngai a hawng ah khaih ing. Judah in ṭhe duk ai, Israel inkhai ṭhun duk ai lairawi kawm i.

¹² ‘Ning caah lo thar vai tu ih; dikcanghnak bir tu ilai i hnenah ning ṭang man hmuifu vui khiah at tu ih. Ning Bawipa i hnenah ning let camcu khim zo ihang; kawi tuhai ning vumah hmuifu ning burh tuh ing.’ ti ing.

¹³ Ikhalselai ning pawihnak tu phatlohnak i ai phatlohnak vui at i si. Ning thudonrelhnak thai ai zo i si. “Ning siphuhlengte le ning ralkap tampui ning rinsan manin,

¹⁴ Ning minung hnenah raltawnghnak hleng tuhai ning ralṭanghnak hmuahhmuah siatsuah tuh sek i. Ciami nia heh kumpibawi Shalman in raltawng ai Betharbel khua siatsuah ai nupang le naupangte a rek berh nia bang i tuh i.

¹⁵ Thil pha lo ning bawnhnak a tam ze manin ciabang thotho in ningmah Bethel minung vum ahkhai cang tuh ve i. Raltawnghnak a pan sawng fangin Israel kumpibawi tu thi tuh i,” tiin ti i.