Hebru 7 - Zanniat Bible

Suangbawi Melkhizedek

¹ Melkhizedek tu Salem khua kumpibawi i ai Cungnungber Pathian ai suangbawi i. Abraham in raltawng ai kumpibawite pali a neh hmunin a let fangin Melkhizedek in hmuak ai hmuifu pe i.

² Cen Abraham in ral hnenin a suthnak thil seu hra seu khat heh Melkhizedek pe i. (Melkhizedek hming ai sullam pakhat tu “Dikcanghnak Kumpibawi,” tihnak i; cen ani tu Salem khua kumpibawi imanin a hming ai sullam tu “Daphnak Kumpibawi,” ti khai i).

³ Melkhizedek ai nu le pa thu le pi le pu ai thu nganhnak zaikhai um lo i. Amah ai tehnak ituseh, a thihnak thu ituseh, nganhnak zaikhai um lo i. Pathian ai Fapa bang i; ciamanin kumzangza in suangbawi i.

⁴ Ciamanin zaitlukin mi thupui i, ti ling tlang i si. Mi hmingthang le kin phun sentu Abraham in ral hnenai a suthnak thil hmuahhmuah ai seu hra seu khat pe i.

⁵ Cen Levi miphun ai tesinfa suangbawi a pertute in Israel mizapui hnenin seu hra seu khat lang tuhin dan in ti i. Ciami Israel mizapui tu Levi mite bangin Abraham ai tesinfate inapui seu hra seu khat pe tlang thotho i.

⁶ Melkhizedek tu Levi ai tesinfa ilo i; ikhalselai Abraham hnenin seu hra seu khat lang ai Pathian thukhamhnak a cotu Abraham heh hmuifu pe i.

⁷ Hmuifu a petu heh hmuifu pehnak a cotu tahin lian deuh i ti khiah fiang i.

⁸ Levi ai tesinfa suangbawi thu ah, seu hra seu khat heh a thi leh tuh minung in lang i; ikhalselai Melkhizedek thu ah, Lai Thianghlim in a tihnak bangin, seu hra seu khat heh a nungmi in co i.

⁹ Cen Abraham in seu hra seu khat a pe fangin (Levi tesinfate khai seu hra seu khat a petute i ai) Levi inkhai pe ve i ti thil i.

¹⁰ Zaimantifangin Levi tu te lai lo napui amah a cawi tu Abraham heh Melkhizedek in a tawk fangin Abraham ai pum songah um zo i, ti thil i.

¹¹ Levi miphun suangbawi phun ihnak sirhsan in dan heh Israel mite hnenah pe i. Cen Levi mite in suangbawi perhnak a semkhimmi ita selai suangbawi phundang, suangbawi Aaron hin ilo in suangbawi Melkhizedek phun suak kul tuh lo i.

¹² Suangbawi ihnak a thleng dun fangin dan khai thleng dun kul ve i.

¹³ Hemi thu hmuahhmuah in a sawh nuamhnak tu kin Bawipa tu a hin dang ai a phunpui songin aisu khai puleng ah suangbawi a pertu um awng lo i.

¹⁴ Amah tu Judah hin songin a te awng mi i ti khiah mi zongzong ai linghnak i; cen Moses in suangbawi thula a rel fangin Judah phun thu tu telh awng lo i.

Suangbawi Dang Pakhat

¹⁵ Hemi thu tu fiang amam i; Melkhizedek bang suangbawi dang pakhat suak zo i.

¹⁶ Amah tu minung ai bawnhnak nunphung le dan in suangbawi canghnak ilo i; bo nia nai lo nunhnak ai huham thawmin a canghnak i.

¹⁷ Zaimantifangin Lai Thianghlim in, “Nang tu Melkhizedek suangbawi dan bangin kumzangza suangbawi tuh isi,” tiin ti i.

¹⁸ Ciamanin dan hlun heh santlai lo ai hnempui nawn lo manin hnawl i.

¹⁹ Zaimantifangin Moses dan in zaikhai semkhim in a bawnthilhnak um lo i; cen tun ahcen Pathian kin nong thil tuhin a pha deuhmi umlamhnak kin pe zo i.

²⁰ Ciahlaiah Pathian ai thutiamhnak um lai fawn i. Midang suangbawi i awng laiah ciabang tiamkamhnak um awng lo i.

²¹ Ikhalselai Jesuh tu tiamkamhnak thawn suangbawi cang ai a hnenah Pathian in, “Bawipa ai thukhamhnak kho ngai in bawn ai a thu heh thawn tuh lo i; ‘Nangmah heh kumzangza in suangbawi tuh isi,” tiin ti i.

²² Hemi bang ai a dangdunhnak in Jesuh tu a pha deuhmi thutiamhnak ai amahkhan ah cang ruai fawn i.

²³ Cen amahte dangdunhnak phun khat um lala i: ciami tu ziang i tifangin, suangbawi dang tu tampui um napui thi sekso manin amahte naper peh thil nawn lo i.

²⁴ Ikhalselai Jesuh tu kumzangza in nung ai kumzangza in suangbawi i.

²⁵ Ciamanin tun le kumzangza in amah songin Pathian a kawitute khiah o thil i; zaimantifangin kumzangza ai a nung manin Pathian hnenah ngen sah ṭiode i.

²⁶ Ciamanin Jesuh tu kin kulhnak a khimruaitu Suangbawi Sang i. Amah tu a thianghlimmi i; sualhnak le mawhhnak nai lo i; misualte hnenin a tumce in khan ai van vumah cawisang zo i.

²⁷ Ani tu suangbawi dang bang ilo i; nisiar amah ca hmasaber ah sualhlat hibawlhnak sel in cia hnuaah mizapui caah hibawlhnak sel ti bang kul lo i. Amah ai nunhnak a pe fangin kumzangza hrang in hibawl vel khat lek sel i.

²⁸ Moses dan in mi semkhim lo pawl heh Suangbawi Sang ah bawn i. Ikhalselai Moses dan hnua ai a hlenghnak tiamkamhnak thawn bawnhnak Pathian thukhamhnak in kumzangza in a semkhim ai bawnhnak a Fapa heh Suangbawi Sang tuhin ril i.