Galati 6 - Zanniat Bible

Ning Thilrit Sawng Dun Tu Ih

¹ U le naute, ningmah lakah pakhatkhat in sualhnak bawn ngah pang ning hmu fangin ningmah songai rauhla mi deuh pawl in lampui dik ah hoi leh tu ih. Ciatihin ning bawn fangin thinnemhnak thawn bawn tu ih. Cen ningmah lala khai ciami sualhnak ah tlok pang tuh ve loin ralring tu ih.

² Pakhat le pakhat ning thilrit sawng dun tu ilai ciatihin Khrih ai dan khimruai tuh i si.

³ Mi pakhatkhat zaikhai inapui hang lo ai mi ngai bangin a ruatduntu heh amah veve zawl dun i.

⁴ Aisusu khai mah ai ziaza ṭen vumah thukhan dun tuh i si. Pha lekhaw midang ai ziaza thawn teh dun kul hnelhno loin ningmah hlanlam lung ning hmui tuh i.

⁵ Zaimantifangin aisusu khai mah ai thil ṭen phur tuh i.

⁶ Pathian thuzirh cia mi in thil pha a cohnakte heh amah zirhtu hlawm tuh ve i.

⁷ Nangmah le nangmah zawl dun mah. Aisu inkhai Pathian zohsuam thil lo i. Minung in amahte vorhhnak bang cekci in khawm tuh i.

⁸ Tisa daihhnak ai a vorhtu in thihhnak khawm tuh i. Rauhla daihhnak vorh tu in kumkhua nunhnak khawm tuh i.

⁹ Ciamanin a pha bawn heh com zel hlah sing ih; com lo niu in per lesingkhaw a can a khim fangin rong khawm tuh ising.

¹⁰ Ciamanin a remcang can hmuah ah aisusu hnen ahkhai thilpha bawn ngasing. A tumce in sanghnak lamai kin songkhatte hnenah bawn ngasing.

A Tawphnak Thucah

¹¹ Hemi laikuat heh ning hnenah i kut rori in ngan ai cafang lian ngaingai in i nganhnak heh sik tucuk ih:

¹² ning zarhtan tu ih tiin ning ruai hnelhnotute tu a pualam thil vumah a uarduntute le porhduntute i. Ciatih ai tihnak heh zai dang manin ilo i, Khrih thinglamteh manin cawhhnak tuar ngam tlang lo manin i.

¹³ A ngaingai in ti fangin zarhtanhnak a hluntute lala inrin dan heh hlun cuanglo i. Ning zarhtanruai amahte daihhnak heh zarh ning tan manin taksa lamin amah hluntu ning cang manin amahte uar dun thil tuhin i.

¹⁴ Kai ca cenin kin Bawipa Jesuh Khrih thinglamteh siarlo uar tuh dang zaikhai nai lo ing. Zaimantifangin Khrih thinglamteh manin laivum heh kai caah khenbet zo ai kai khai laivum caah khenbet ve i.

¹⁵ Mi pakhatkhat zarhtanmi le tan lomi heh thupui lo i; a thupuihnak tu semtharmi ihnak sawn i.

¹⁶ Ciami thu nisiar in a nunpui cihtute tu Pathian ai daphnak le ninghiohnak co tu hram seh; Pathian ai minung veksen Israel mite hnen ahkhai um tu hram seh.

¹⁷ A tawphnak ah i rel nuamhnak tu: aisu inkhai hnaihnokhnak i pe mahang seh; zaimantifangin i taksa vumai hmaihma pot a umhnak in Jesuh ai sal i ihnak larruai zo i.

¹⁸ U le naute, Bawipa Jesuh Khrih ai ninghiohnak tu ning hnenah um tu hram seh. Amen.