Galati 1 - Zanniat Bible

¹ Galati pawlpuite hnenah nalang Paul in lai ning kuat ing. Thuthangpha phuang tuhai nalang cang tuhin minung ai rilmi le hlatmi ilo ing; Jesuh Khrih thihhnak in a thoruaitu Pa Pathian le amah Jesuh Khrih ai rilhnak le hlathnak ing.

² Hemi hmunai um u le naute thawn Galati ai pawlpuite hnuk ning sat ing.

³ Kin Pa Pathian le Bawipa Jesuh Khrih in ninghiohnak le daphnak ning pe tu hram seh.

⁴ Tun san, san sia songin kin luatruai tuhin Khrih in Pa Pathian daihhnak hlun in kin sualhnak manin a nunhnak pe zo i.

⁵ Pa Pathian hnenah songlawihnak kumzangza in um tu ṭio seh! Amen.

Thuthangpha Pakhat

⁶ Zaicam lo ah Khrih ninghiohnak thawn ning kotu heh zangtak ai Thuthangpha dang hlun tlang zual i hmu fangin ngaihsun i ur ze i.

⁷ ‘Thuthang pha a dang,’ um ngaingai manin i tihnak ilo i; ning thinlung hnaihnoktu le Khrih Thuthangpha thleng a tumtu hnelhno minung um manin i tihnak i.

⁸ Kinmah ituseh, vancungmi khai ituseh ning hnenai kin phuangciahnak Thuthangpha ilo in a dang thuthangpha phuangtu um lekhaw cukcam in um tuseh.

⁹ Ning rel awng zo napui tunin ning rel leh tuh thio ing: ning pomciahnak Thuthangpha siarlo thuthangpha dang a reltu heh cukcam in um tuseh.

¹⁰ Hetih in i ti fangin minung lungkhimhnak si hnelhno i bang awm? I tumhnak tu minung ai lungkhimhnak ilo i; Pathian ai lungkhimpuihnak sawn i. Minung ai thangphathnak si ing im? Mi hmai ai hmingthanghnak si ilengkhaw Khrih ai cengfa i tuh lo ing.

Khrih Ai Nalang Canghnak

¹¹ U le naute, Thuthangpha i phuanghnak heh minung ai panhnak ilo i, ti khiah ning hnenah i larruai nuamhnak i.

¹² Minung hnenin i ngahhnak ilo i; minung aisu ai zirhhnak khai i fawn lo i. Jesuh Khrih amah in i hnenai a phuanghnak i.

¹³ I nuncan heh ling sio isi. Judah biahnak i hlun laiah Pathian ai pawlpuite reem ai cihmit tuhin zuam awng dekdo ing.

¹⁴ Judah biahnak hlun lam ahcen i khukpuite lakah a fek bermi ing. Kin pupa dan hlun lamah a hlaice in rinsantlak taktak ing.

¹⁵ Ikhalselai Pathian ninghiohnak thawmin i te hlan inrin i ril zo ai amah ai naruaihtu tuhin i ko i.

¹⁶ A Thuthangpha Gentile mite hnenah phuang tuhin, a Fapa i hnenah a larruai fangin minung aisu khai thuron tuhin feh lo ing.

¹⁷ Jerusalem ai a ummi i hlanai nalangte hnenah feh lo ing. Rang ngai in Arabia sawn ah feh ai Damascus ah let ing.

¹⁸ Kum thum hnua fang ian in Peter tawk tuhin Jerusalem ah feh ai a hnenah zarh hnih um ing.

¹⁹ Kin Bawipa ai naupa James siarlo, a dang nalangte aisu khai tawk lo ing.

²⁰ Hetih ai i nganhnak heh thudik i, thudon ilo i ti khiah Pathian in ling i.

²¹ Cia hnuaah Syria le Cilicia ramah feh ing.

²² Cialai ah Judea ram Khristian in pumpak in i ling lai lo i.

²³ “Kin reemtu hnelhno in tunah siatsuah a tum awnghnak kin sanghnak thula phuang dekdo i,” tiin mi ai relhnak za tlang ai,

²⁴ Ciatihin kaimah manin Pathian thangphat tlang i.