Filipi 4 - Zanniat Bible

Thuzirhhnak

¹ I ithnak u le naute, ning ngai ze ing. Ning tu i hnemtu i si ai i hmaihngalhnak sui lukhuk khai i si. I ithnak u le naute, he bangin Bawipa songai ning nunhnak ahhen kho ngai in ding tu ngio ih.

² Euodias le Sintekhe, ninghio ning ngen ing: Bawipa ai daihhnak hlun in thinlung hmunkhat tuhin zuam kawm tu ih.

³ Cen nang rinsantlak i naperpui, he nupangte pahnih heh bawm tu law, ti i daih ve i. Zaimantifangin kaimah thawn napertute i; Clement le Pathian nunhnak laibu songai hming khumhnak i naperpui hmuahhmuah thawn Thuthangpha zairuai tuhin kaimah thawn a rohpui in napertute i.

⁴ Bawipa thawn pawlkomhnak ah ang tu ṭio ih; not leh tuh ing: ang tu ih!

⁵ Mi zongzong hnenah ning thin nem tu ih. Bawipa hleng cing tuh i.

⁶ Ziang thula ahkhai donhar in um mah ih; saw ning ngen cang fangin ning kulhnak Pathian hnenah ngen tu ilai lungawi aipuang in ngen tu ih.

⁷ Ciatihin minung ai ruat ban lohnak Pathian ai daphnak in ning thinlung le ning ruathnak tu Khrih Jesuh ah himniu in kilkhawl tuh i.

⁸ Thutawphnak ah, u le naute, a pha, thangphat tlak, a hmanmi, upat tlak, a dikmi, a thiang, a daihkul le hmingphahnak a petu thilte thawn ning thinlung dimruai tu ih.

⁹ I hnenin ning ngahhnak le ning zirhnak bangin hlun tum tu ih, i ponkam ituseh, i bawnhnak ituseh, i hmuhhnak hlun tu ih. Ciatihin daphnak kin petu Pathian tu ning hnenah um tuh i.

Lehsawng Vumah Anghnak

¹⁰ Kaimah zawn ning ruathnak tu can raipui hnuaah larruai leh ai kin Bawipa thawn kin pawlkomhnak manin i ang ze i. Hetihin i ti fangin i ruat nawn lo i si, i ti nuamhnak ilo i; a larruai can ngah lo man sawn i si.

¹¹ I zangtak zo ihang, tiin ruat manin i relhnak khai ilo i. Thungai in ti fangin i naihnak zah niu thawn lungkhim ngai in um tuhin thiam zo ing.

¹² Hlawhsam ai um khai thiam ai nai roh ai um khai thiam zo ing. Ciatih ai umdan thupniu heh zir ngah zo manin a konteng hmun ahkhai le zaikom inkhai ri i kam in ituseh, tampui i nai inkhai ituseh, thinnuam in um thiam zo ing.

¹³ Hathnak i petu Khrih songah zaizongza ti ben ing.

¹⁴ Ikhalselai harsahnak i tawk can ah i bawm bentute tu thilpha bawn i si.

¹⁵ Ningmah Philipi khua mite in ling zo i si. Thuthangpha phuang in naper i pan sawng dung ah Macedonia peng in i feh fangin i bawmtu pawlpui tu ningmah lek i si. I sunghnak le i miathnak ah ningmah heh i lingpuitu ber i si.

¹⁶ Thessalonica khua in bawmhnak i kul fangin bawmhnak vel khat tah tam i kuat i si.

¹⁷ I daihhnak tu ning lehsawng ngah lek ihang lo i; ning cazin songah miathnak um tu ve seh ti khiah hmu i nuam i.

¹⁸ Tunai ning pehnak hmuahhmuah ngah ing tihnak ngan ing. Ning pehnak tu i kulhnak tahin a hlai tianin i pe tlang i si. Ning lehsawng hmuahhmuah Epafroditus in i phurh ai tun tu i kulhnak hmuahhmuah khim sio ihang. Hemi ning lehsawngte tu Pathian ai anghnak le hibawlhnak, a rimur rimhmui bang i.

¹⁹ Cen zaizongza a semkhim in Khrih Jesuh songin i Pathian in ning kulhnak cangcang ning pe tuh i.

²⁰ Kin Pa Pathian hnenah thangphat songlawihnak kumzangza in um tu ngio selaw. Amen.

A Hnuataber Hnuksathnak

²¹ Pathian ai minungte, Khrih Jesuh ai naihnak mite, pumpak ṭen in hnuk ning sat ing. Kaimah thawn a ummi Khristian unau dangte inkhai hnuk ning sat i.

²² Heta ai a ummi Pathian ai minungte veksen le, a hlaice in kumpibawi inn ai a um mite in hnuk ning sat tlang i.

²³ Bawipa Jesuh Khrih ai ninghiohnak khiah ning veksen vumah um tu hram selaw.