Ezra 8 - Zanniat Bible

Saltanghnak Hmun In A Lettute

¹ Artaxerxes kumpimangbawi a cang laiah Babylon ram saltanghnak in Ezra thawn Jerusalem ai a lettute, amahte hin ai luber pawl laibu tu a hnia lamai bangin i:

^2-14 Phinehas hin in Gershom, Ithmar hin in Daniel, David hin in Shekaniah ai fapa Hattush, Parosh hin in Zechariah le a hinpui minung za le sawmnga thawn, (amahte tehnak hnikhnaihhnak laibu um ṭen i). Pahath Moab hin in Zerahiah ai fapa Eliehoenai, minung zahnih thawn, Zattu hin in Jahaziel ai fapa Shekaniah, minung za thum thawn; Adin hin in Jonathan ai fapa Ebed, minung sawmnga thawn; Elam hin in Athaliah ai fapa Jeshaiah, minung sawmsarih thawn. Shephatiah hin in Mikhael ai fapa Zebadiah, minung sawmriat thawn. Joab hin in Jehiel ai fapa Obadiah, minung zahnih le hlairiat thawn. Banin hin in Josiphiah ai fapa Shelomith, minung za le sawmruk thawn. Bebai hin in Bebai ai fapa Zechariah, minung kul hluanriat thawn. Azgad hin in Hakkatan ai fapa Jonathan, minung za le pahra thawn. Adonikam hin in Eliphelet, Jeuel le Shemaiah, minung sawmruk. (Lehhnua deuh ah a lettute i). Bigvai hin in Uttai le Zakkur, minung sawmsarih thawn Jerusalem ah let tlang i.

Ezra In Levi Mite Si I

¹⁵ Ahava khua ai a luanghnak runti kamah mizapui tu kokhawm tlang ai ciata ah ni thum song cam tlang i ing. Mizapui lakah suangbawi um napui Levi mite pakhat khai um tlang lo i.

¹⁶ Ciamanin hotute pakua: Eliezer, Ariel, Shemaiah, Elnathan, Jarib, Elnathan, Nathan, Zechariah le Meshullam le zirhtu sayate pahnih Jiarib le Elnathan ko tlang ai,

¹⁷ Casiphia khua ai luber Iddo hnenah, amah le a bawmtute le Biakinn satute tawk tuhin le Biakinn songai Pathian naruaihtu minung kuat tuhin a vumai upate hlat ing.

¹⁸ Pathian ninghiohnak in, Mahli hin Le Levi mi, thiltithai Sheberah i kuat ai a fapate le a unau songin minung hlairiat thawn kawi tlang i.

¹⁹ Cen Merari hin Hashabiah le Jeshaiah khai amahte songkhat minung kul thawn i kuat i.

²⁰ Ciahlaiah Levi mite bawmtu tuhin kumpibawi David in a pupate naper a pe awnghnak Biakinn napertu minung zahnih le kul khai tel tlang i. Amahte veksen laibu songah hmingkhum tlang sio i.

Sawngen Ai Rong Ul Tlang I

²¹ Ciami Ahava runti hiangah kin veksen in Pathian hmaiah rong ul tuhin le kin thin nemruai tuhin kaimah in forh ai kin lampui ah kinmah le kin fate kin naihnak thilrite kin hup sah tuhin ngen tlang i ing.

²² Kin fehhnak lampui ah ralte kut in kin kiltu tuhin kumpibawi hnenin siphuh vumto ralkapte ngen tuhin zak i thi lawnsi i, zaimantifangin kin Pathian tu amah rinsantu heh hmuifu pe ai amah a zangtaktu vum ahcen a lungawi lo i, tiin kumpibawi hnenah rel awng zo ing.

²³ Ciamanin rong ul tlang ai kin huphim tuhin Pathian hnenah sawngen tlang i ing; cen kin sawngenhnak tu kin ngai sah i.

Biakinn Hrang Lehsawng

²⁴ Cen suangbawi upate songin Sherebiah, Hashabiah le a dang pahra ril ing.

²⁵ Cen kumpimangbawi ruathnak petute, a kuthnia ai a dang tlangsuakte le Israel mite in Biakinn ah hmang tuhin amahte pehnak sui le ngun le bungbelte tu cuai teh ai suangbawite hnenah pe ing.

^26-27 I pehnakte tu a hnia lam aite i: Ngun cuai thawng hlairuk le zahnih le sawmnga; ngun belhleng zakhat, ngun cuai sawmnga man; Sui cuai thawng hnih le za nga; Sui hlengkum kul, sui cuai li man; Darhleng pha bik pahnih, suihleng tluk ai a man khung i.

²⁸ Amahte hnenah, “Ning tu ning pupate ai Pathian Bawipa hnenah mi cianghlim i si ai a hnenah thatho ngai ai anite in pe awnghnak sui le ngun bungbelte khai a cianghlim i.

²⁹ Biakinn ning hlengpui hlanlo ralring ngai in kil tu ih. Ciata ah suangbawite ai khan ah cuai teh tlang tu ilai Jerusalem khua ai a ummi Israel hotute, suangbawi upate le Levi mi upate hnenah pe tu ih,” ti ing.

³⁰ Ciatihin sui le ngun le bungbelte tu Jerusalem Biakinn ah dah tuhin suangbawite le Levi mite in lang tlang i.

Jerusalem Ah Let Tlang I

³¹ Jerusalem tu hla khathnak hla, ni hlaihnih nia ah feh tuhin Ahava runti in suak tlang i ing. Kin lampui tluan ah Bawipa tu kin hnenah um ai ral simhnak le damiah in thupruk in bawhhnak tawk loin kin huphim i.

³² Jerusalem kin hleng fangin ni thum song cawlum tlang i ing.

³³ Cen ni lihnak ah Biakinn ah feh tlang ai sui le ngun le bungbelte tu cuai kin teh hnuaah Uriah ai fapa suangbawi Meremoth hnenah pe ing. Meremoth thawn ciata ah Phinehas ai fapa Eleazar le Levi mite pahnih, Jeshua ai fapa Jazabad le Binnui ai fapa Noadiah khai um kawm i.

³⁴ A veksen cuai teh tlang ai a siar ben tlang fangin khim niu in laibu songah khum i.

³⁵ Cen Babylon saltanghnak in a lettu hmuahhmuah in Israel Pathian hnenah maitai hibawlhnak sel tlang i. Amahte pehnakte tu kawlpawcangte lu hlaihnih, tuucangte lu sawmkua le lu ruk, tuuniute lu sawmsarih le pasarih, le sualhlat hibawlhnak hrangah mecangte lu hlaihnih i. Hemi sumhnamte khiah maitai hibawlhnak in Bawipa hnenah sel i.

³⁶ Kumpimangbawi ai lainganhnak amahte kenghnak tu Euphrates Nitlak lam peng ai ram uktu mangki bawi le a dang bawite hnenah le Biakinn song Pathian biakinn hrangah bawmhnak pe tlang i.