Ezra 6 - Zanniat Bible

Cyrus Thusuahhnak Hmu Leh I

¹ Ciamanin Kumpimangbawi Dairus in Babylon acuzah thu khumhnak laibupui songah ciami thu heh si tuhin thupe i.

² Cen Media peng, Ecbatana khua ah laihnahzual pakhat hmu ai a songah:

³ “Kumpimangbawi a cang kum khathnak ah, Kumpimangbawi Cyrus in hibawlhnak ah le maitai hibawlhnak ah Jerusalem Biakinn heh saleh tuhin thusuah i. Ciami Biakinn tu pi sawmkua sang tuhai pi sawmkua kau tuh i.

⁴ A bangkhangte tu lungto le thing in bawn tuhai lungto thuah khat ah thing thuah khat tuh i. Inn sa ai a bohnak hmuahhmuah acuzah tangka songin pe tuh i.

⁵ Kumpibawi Nebuchadnezzar in Babylon ai a dahhnak sui, ngun le belhlengte tu khirh tuh sio ai Jerusalem Biakinn ai a dah hmun awng ah dah leh tuh sio i si,” tiin a ngan awnghnak hmu tlang i.

⁶ Ciafangin Kumpimangbawi Dairus in hetihin lairul i: “Euphrates Nitlak lamai peng uktu Mangki bawi Tattenai, Shethar Bazenai le Euphrates Nitlak lamai peng ai ummi bawi upate: “Biakinn hiangah khai um tlang mah ih;

⁷ amahte naper khai hnaihnok tlang mah ih. Judah peng uktu bawi le Judah mi hotute in Pathian Biakinn tu a ding awng hmun kelah sa tlang tuseh.

⁸ Amahte kulhnak hmuah bawm tlang tu sawn ih. I thusuahhnak tu hetihin i: Com loin na anite perthilhnak tuhin Euphrates Nitlak lamin acuzah caah amahte pehnak siah songin inn sahnak ah a bohnak hmuahhmuah rang ngai in anite pe tu ih.

⁹ Jerusalem ai suangbawite in ning ngen fangin anite hnenah nisiar pelh loin a kulhnak pawl: kawlpawcang, tuu ihlahle tuuniute van ai Pathian hnenah maitai hibawlhnak pe tlang tuhin sangvut, ci, cabitti le olive thaute khai pe tuh i si.

¹⁰ Van ai Pathian hnenah a cotlak in hibawlhnak sel ai kaimah le i fapate ca khai saw kin ngen sah thil tuhin a vumai i thupehnak heh bawn tuh tengteng i si.

¹¹ Hemi i thupehnak a hlunlotu heh a inn in luangkiang pui phok sah tu ilai ning zum hnuaah ani tu dawt tlang tuh i si.

¹² Jerusalem heh amah ai biahnak hmun tuhin a riltu Pathian in hemi i thupehnak a eltu le hemi Biakinn siatsuah a tumtu kumpibawi le miphun heh siatsuah tuseh. Kaimah Dairus in hemi thu suah ing. I thusuahhnak heh a khimliang in hlun tuhhnak i,” ti i.

Biakinn Pathian Hnenah Aphnak

¹³ Euphrates Nitlak lam ram uktu Mangki bawi Tettenai le Shethar Bozenai le a dang bawi upate in Kumpimangbawi Dairus thupeciahnak bangin thasuah in bawn tlang sio i.

¹⁴ Judah mi hotute in Biakinn khiah sa tlang ai prophet Haggai le prophet Zechariah thuphuanghnak thawmin amahte naper tluang ngai i. Cen Israel ai Pathian le Persia Kumpimangbawi Cyrus, Darius le Artaxerxes ai thupe cia zo bangin ben tlang i.

¹⁵ Dairus in kumpibawi a cang kum rukhnak Adar hla ni thum nia ah Biakinn heh sa ben tlang i.

¹⁶ Ciafangin Israel mite, suangbawite le Levi mite le Babylon saltanghnak in a lettu hmuahhmuah in lungawi ngai in Biakinn heh Pathian hnenah ap tlang i.

¹⁷ Cia nia ah Pathian hnenah hibawlhnak tuhin kawlpawcang lu zakhat, tuucang lu zahnih le tuuniu lu za li sel tlang i; ciahlaiah Israel miphunte hlaihnih ca sualhlat hibawlhnak tuhin mete lu hlaihnih sel tlang i.

¹⁸ Moses laibu songai bawn tuhhnak dan a um bangin Jerusalem biakinn songai naruaihtu tuh suangbawite le Levi mite tu a bur a bur in khan tlang i.

Kansuak Puai

¹⁹ Babylon saltanghnak in a lettute in hlakhathnak hla ni hlaili nia ah Kansuak Puai bawn i.

²⁰ Suangbawite hmuahhmuah le Levi mite hmuahhmuah in cianghlimhnak bawn tlang ai cianghlim tlang sio i. Levi mite in saltanghnak in a lettute ca le suangbawite le amahte caah Kansuak Puai hrang hibawlhnak sumhnamte ro tlang i.

²¹ Hibawlhnak ai a selhnak sa tu a lettu Israel mite hmuahhmuah le Judah ram songai a umtu khuavang biatute ai biahnak a zamtute le Bawipa Israel ai Pathian bia tuhin a kawitute in ai tlang i.

²² Ni sarih song, Col tello Sang Puai heh lungawi aipuang ngai in bawn tlang i. Bawipa in Assyria Kumpimangbawi tu Judah mite vumah thinlung pha nairuai ai Israel ai Pathian Biakinn sa lehsal naperhnak ah tampui in bawm manin a hlaiah lungawi cuang i.