Ezra 5 - Zanniat Bible

Biakinn Sa Pan Tlang Leh I

¹ Cen prophette pahnih Haggai le Iddo ai fapa Zechariah in Israel Pathian thu tu Judah le Jerusalem ai a umtu Judah mite hnenah phuang betbo i.

² Anite thuphuanghnak tu Shealtiel ai fapa Zerubbabel le Jehozadak ai fapa Joshua in a za kawm fangin Jerusalem Biakinn sa heh pan tlang lehthio i. Cen ciami prophette pahnih in bawm kawm i.

³ Ciafangin Euphrates Nitlak lamai ram uktu Mangki bawi Tattenai le Shethar Bozenai le a kuthnia bawi dangdangte tu Jerusalem ah feh tlang ai Biakinn satute heh, “Hemi Biakinn sa tuhin le a song thilrite bawn tuhin aisu in thu ning pe i,” ti tlang i.

⁴ Ciafangin Biakinn sa a bawmtute hmuahhmuah ai hming khai zawt sio i.

⁵ Ikhalselai Pathian in Judah hotute tu sik ai kilkhawl ngio i; Cen Persia bawite in Kumpimangbawi Dairus hnenah laikuat ai a lairulhnak a ngah hlan song tu zaikhai khamhnak bawn lo i.

⁶ Kumpimangbawi Darius hnenah amahte thuthanhnak tu hetihin i:

⁷ “Kumpimangbawi, na ukhnak songah daphnak um tu hram seh!

⁸ Kumpimangbawi na ling tuhhnak ah kin ruathnak tu: Judah peng ah feh tlang ai Judah mite in a thawmlian Pathian ai Biakinn sa lehthio i; lungto lian puipui in sa tlang ai a bangkhang ahkhai thingah lian puipui rolh i. Tha naih tawp suah in fel ngai in sa tlang ai amahte naper heh hlanlim roh i.

⁹ “Aisu thunaihnak in hemi Biakinn heh sa tlang leh ai a song thilri khai bawn tlang lianglo i si, tiin zawt i ing.

¹⁰ Amahte hotu aisu i, ti na linghnak tuhin hemi naperhnak ai hotute hming khai zawt i ing.

¹¹ “A thusawnhnak tu, ‘Van le laivum ai Pathian cengfa i ing ai a hat ngai Israel kumpibawi in Biakinn sa awng ai a songai thilrite khai bawn sio i; ciami Biakinn heh saleh i ing.

¹² Ikhalselai kin pupate in Van ai Pathian tu thinrawtiar tlang awng manin ciami Pathian in Babylon kumpibawi Nebuchadnezzar nehruai i. Biakinn tu siatsuah sek ai minung tu Babylon ah sal tuhin fehpui sio i.

¹³ Cen Kumpimangbawi Cyrus in Babylon Kumpimangbawi a cang kum khathnak ah hemi Biakinn saleh tuhin thusuah awng i.

¹⁴ Ciahlaiah Nebuchadnezzar in Jerusalem Biakinn in lang ai Babylon Biakinn ai a dahhnak sui le ngun le bungbelte heh Kumpimangbawi Cyrus in Judah peng uktu tuhin a rilmi Sheshbazzar hnenah pe i.

¹⁵ Ciami thilrite heh Jerusalem Biakinn ah fehpui leh tuhin Biakinn tu a hlanai a umhnak awng kelah saleh tuhin Kumpimangbawi in ani heh ruai awng i.

¹⁶ Cen Sheshbazzar tu Judah peng ah hleng ai Biakinn saleh tuhin a ham lungphum khai phum i; ciami ai panin tun tian Biakinn sa naper heh per tlang i, ikhalselai ben lai lo i ing,’ kin ti i.

¹⁷ “Ciamanin Kumpimangbawi lung na khim lekhaw Babylon ai Kumpibawi thula khumhnak laibupui songah si tulai hemi Biakinn saleh tuhin Kumpimangbawi Cyrus in thu a suah awng ngaingai le suah ngaingai lo sik tu ih; cen hemi thu heh kin than leh tu hram law,” tiin ti i.