Ezra 1 - Zanniat Bible

Cyrus In Judah Mite Letruai I

¹ Persia Kumpimangbawi Cyrus in Kumpimangbawi a canghnak kum khathnak ah Bawipa in a thin thathoruai ai lai ngan in thu pakhat suah ai a ram song hmuahhmuah siar tuhin kuat i. Hemi tu prophet Jeremiah hmangin Bawipa ai thurelhnak khimruai tuhin i.

² A thusuahhnak ah hetihin ngan i: “Hemi tu Persia Kumpimangbawi Cyrus ai thupehnak i. Bawipa, Van ai Pathian in kaimah heh laivum pumpuhluk uktu tuhin i bawn zo ai Judah ram Jerusalem khua ah amah ca Biakinn sa tuhin ṭuanvo i pe i.

³ Pathian khiah a minung ning veksen hnenah um tu hram seh. Judah ram Jerusalem khua ah let tu ilai Jerusalem ai a ummi Pathian, Israel ai Bawipa Pathian Biakinn saleh tu ih.

⁴ Bawipa minung lakah hemi saltanghnak in let tuhin bawm a kulhnak tu a innhnente in bawm tlang tuseh. Sui le ngun, rong le thilri phurtu sumhnam le Jerusalem khua ah Pathian hnenah pe tuh hibawlhnakte khai sel tlang tuseh,” ti i.

⁵ Ciafangin Judah mi le Benjamin mi songkhat ai hotu suangbawite, Levi mite le Bawipa in Jerusalem ai Bawipa Biakinn sa tuhin thinlung thathoruaimi hmuahhmuah feh tuhin ralring tlang i.

⁶ A innhnente in thilri tampui pe i; a pehnak thilrite tu ngun hlengte, sui, rong, thil phurtu sumhnam, a dang thil mankhung le Biakinn ah hibawlhnak sel tuhhnak pawl i.

⁷ Kumpibawi Nebuchadnezzar in Jerusalem an lang ai a khuavangte biakinn songah a dah awnghnak hleng le khuatte tu Kumpimangbawi Cyrus in a hnenah pe leh i.

⁸ Hemi khuat le hlengte tu Judah uktu bawi Shehbazzar caah kumpibawi thilri kiltu upa ber Mithredath ai bawnhnak i. Cyrus in ciami khuat le hlengte heh Mithredath hnenah pe i.

^9-10 A pehnakte tu a hnia lamai pawl i: hibawlhnak hrang sui hleng 30 hibawlhnak hrang ngun hleng 1, 000 ngun hleng dangdang 29 Sui hleng cikniu 30 Ngun hleng cikniu 410 belhleng dangdang 1, 000

¹¹ A veksen in sui le ngun hlengte le khuat le bungbel dangdang thawn thawng nga le za li i ai Babylon an Jerusalem ah a let fangin Sheshbazzar in letpui i.