Daniel 8 - Zanniat Bible

Daniel In Tuu Le Me Hmu I

¹ Belshazzar in kumpibawi a cang kum thumhnak ah a vel hnihhnak larhnak hmu ing.

² Ciami larhnak i hmuhnak ahcen Elam peng lungdawl in kulhhnak Susa khuapui ah um bangin ling dun ing. Ulai Runpui hiangah ding ing ai,

³ ciami Runpui hiangah tuucang pakhat, a saupui kite pahnih a naimi hmu ing; a ki pakhat tu a khatta tahin sau ai thar deuh fawn i.

⁴ Ciami tuucang in nitlak lam, sak lam le hlang lam a khi thliahthlo khiah sik ing. A dang ramsate in kham thil lo i; A nuamnuam in zaizongza bawn hluahhlo ai hngal ngai i.

⁵ Ciami ai sullam mangbang in i ngaisung hnelhno laitak ah nitlak lamin mecang pakhat a dawp dekdo hmu ing; a dawp cak ze ai a ke in laipua khing lo i. A mit le a mit karlak ah a lar ngai ki pakhat nai i.

⁶ Runpui kamah ding ai i hmuhnak tuucang hnen lamah feh ai tuucang khiah a tha naihtawp in nem i.

⁷ Tuucang a nem le a tawng laitak khiah sik hlen ing. A thinraw ze ai tuucang tu a roh ngai in a kite pahnih ek rori in khi i. Tuucang in khi tuh vehnak thazang zaikhai nai lo i. Lai ah leu ai mecang in fon dekdo i; a othaitu aisu khai um lo i.

⁸ Ciami mecang tu puarthau amam ai a hat roh laitak ah a ki tat ṭhak i. Ciami a ki tumrul in a lar ngai kite pali suak i; a kite pali in sak lam, hlang lam, nisuah lam le nitlak lam hoi ṭen i.

⁹ Kite pali lakai pakhat songin ki cikniu pakhat tawt ai a huham hathnak in hlang lam, nisuah lam le Thukhamhnak Ram lam feh i.

¹⁰ Van ralkap, arsite tawng tuh tlak in hat ai tawng dekdo ai a hrekkhat tu lai ah a lon hnuaah fon cih i.

¹¹ Van ralkapte hotu bawi rin ralcai i; nisiar in a hnenah a selhnak hibawlhnak heh kham ai Biakinn ningrimtiar i.

¹² Ciata ah nisiar in hibawlhnak a sel tumrul in minungte in sualhnak bawn tlang i; biahnak dik heh lai ah lon teu i. A bawnhnak hmuahhmuah ah ciami ki heh hlawhtling i.

¹³ Cen vancungmi pakhat in a dang vancungmi hnenah, “Hemi hmuhnak songai a larhnak khiah zaikom tian rai tuh i? Hebang tihikkul sualhnak in zaikom tian nisiar hibawlhnak aiawh tuhlai i? Zaikom tian van ralkapte le Biakinn tu fonhnak tuar tuhlai i? tiin a zawt khiah za ing.

¹⁴ Ciafangin ciami vancungmi in, “Hemi thil heh zan lam le zing lam thawng hnih le za thum song rai tuhai cia songah zing lam le zan lam hibawlhnak zaikhai um tuh lo i. Cia hnuaah Biakinn tu a hlan bangin um leh tuh i,” tiin ti i.

Larhnak Tu Gabriel In Fiangruai I

¹⁵ Ciami larhnak ai a sullam i ruat laitak ah mangrinlo in mi pakhat i hmaiah ding i.

¹⁶ Ulai Runpui vuman aw pakhat in auh ai, “Gabriel, a hmuhnak a sullam heh a hnenah relfiang tu,’ ti i.

¹⁷ Gabriel khai kawi ai i hiangah ding i; I lau ze manin lai ah bok ing. Ani in i hnenah, “Minungpa, he thu heh lingthiam tu. Na hmuhnak heh laivum bohnak thawn pehzom dun i,” tiin ti i.

¹⁸ Ciatihin i pong hnelhno laitak ah i tlu ai zaikhai ling lo ing. Ikhalselai ani in i tho ai i dingruai ai,

¹⁹ “Pathian thinrawhnak in zaibang thil suakruai tuh ing ti khiah na hmuh ing. Na hmuhnak larhnak heh can hnuataber thawn pehdunhnak nai i.

²⁰ “Kite pahnih a naimi tuucang na hmuhnak tu Media le Persia ukhnak tica i.

²¹ Mecang tu Greek ukhnak tica i ai, a mit le a mit karlak ai a lar ngai ki tu a kumpibawi hmasaber tica i.

²² Ki pakhat a ek hnuaah kite pali a suakhnak tu a ram a khek dun hnuaah a suak tuhhnak ukhnakte pali tica i; he ukhnakte pali tu hmasa ukhnak tlukin hat tuh lo i.

²³ “Ciami ukhnakte bo dawn cuahco hang ai amahte siava ze manin cawhhnak can a khim cuahco fangin milungruh, misualral le mizawl thai kumpibawi pakhat suak tuh i.

²⁴ Ani tu hat tuh amam i, ikhalselai a hathnak tu amah ai thil tibenhnak manin i tuh lo i. Siatsuahhnak a roh ngai in suakruai tuhai a bawnhnak hmuahhmuah ah hlawhtling tuh i. Mi hat ngaingai le Pathian ai minungte vumah hnophnak tampui hlengruai tuh i.

²⁵ Mileple imanin zawlhnak in thiltiben tuh betbo i. Amah veve sang dun tuh ngai ai mangrinlo in mi tampui hnawmcan tuh i. Kumpibawite lakah kumpibawi thawmlianber rin ralcai tuh i; ikhalselai amah tu minung hathnak tel loin siatsuahhnak tawk tuh i.

²⁶ Na hnenah a fiang ngai in rel cia zing lam le zan lam hibawlhnak thu ai larhnak na hmuhnak heh khim tuh ngaingai i. Ikhalselai thuthup ah dah tu, zaimantifangin a khimhnak tuhin can rai tuhlai i,” tiin ti i.

²⁷ I thinhar in ni tampui song i ur i. Cia hnuaah tho ai kumpibawi ai ruaihnak naper per ben leh ing. Ikhalselai i hmuhnak in mul i tingruai ai i lingthilhnak ilo i.