Daniel 6 - Zanniat Bible

Chintit Khawk Songah Daniel

¹ Dairus in a ram pumpuhluk uktu tuhin ramkulh uktu bawite za le kul dah i.

² Ciami bawite siktu le hotu ah bawi upate pathum dah ai cia lakah Daniel tu pakhat i ve i; ramkulh uktu bawite za le kul tu a kuthnia ah um tlang i. Anite in kumpibawi ca thil thupui le a kulhnak tepawl ruat sah de i.

³ A rai hlanah Daniel heh a dang hotute pahnih tahin le ramkulh uktu a dang bawite tahin a naṭuan pha deuh khiah lar i. Ciatihin midang tahin a lar deuh manin kumpibawi in a ram pumpuhluk uktu tuhin Daniel khiah dah tuhin ruat i.

⁴ Cen a dang hotute pahnih le ramkulh uktu bawite in Daniel heh sualhnak le khelhhnak nai nitur im tiin si tlang dekdo i; ikhalselai a sualhnak hmu tlang lo i, zaimantifangin Daniel tu mifel rintlak ngai i ai thilsual le sangtlak lo thil zaikhai bawn lo i.

⁵ Ciafangin amahte veve khiah, “A biahnak thu ah ti siar lo Daniel mawh kin hlukthilhnak zaikhai hmu tlang tuh lo ising,” tiin ti dun tlang i.

⁶ Ciamanin kumpibawi tawk tuhin feh tlang ai a hnenah, “Dairus kumpibawi, na nunkhua sau tuseh!

⁷ Na ram uktu bawite, hotute, ramkulh uktu bawmtu bawite le bawi dangdang kin veksen thinlung khatniu in thil pakhat na ngen tlang i ing. Thupe tulai na thupehnak bangin hlun tuhhnak ngaisung tu. Ni sawmthum songah aisu inkhai kumpibawi pa nangmah hnen siarlo zaibang khuavang le zaibang minung hnenah sawngenhnak le ngenhnak nai maseh. Hemi thupehnak a hlun lotu heh chintit khumhnak songah lon tuseh.

⁸ Kumpibawi nangmah in he thu heh suah tulai na hming khen tu. Cen mi zongzong in hlun tuh sio in ngaisung tu; aisu inkhai thleng thil lohnak Media mi le Persia mite ai dan suahhnak ah cang tuseh,” tiin ti i.

⁹ Amahte tihnak bangin Dairus in thupe ai a thupehnak vumah a hming khen i.

¹⁰ Kumpibawi in a hming khen zo i, ti khiah Daniel in a ling fangin a inn ah tlung i. A inn vumta khan ah Jerusalem lam hoi in tukvirhte um i. Ciata ah a bawn ṭiode bangin tukvirhniu honghnak pakhat hiangah a khuk caicin in ni khat ah vel thum Pathian hnenah sawngen i.

¹¹ Daniel in Pathian hnenah sawngen ṭiode thotho i ti khiah a huatute in a hmu fangin,

¹² Daniel mawhhluk tuhin amahte veksen in kumpibawi hnenah feh tlang i. Anite in, “Aw kumpibawi, tunai panin ni sawmthum song kumpibawi nangmah hnen siarlo aisu inkhai khuavang le zaibang minung hnen ahkhai sawngenhnak le ngenhnak nai maseh, tiin thupe zo isi,” tiin ti tlang i. Kumpibawi in, “I, Aisu inkhai el thil lo thupehnak i. Aisu inkhai thleng thil lohnak Media mi le Persia mite ai dan suahhnak i,” tiin ti i.

¹³ Ciafangin anite in kumpibawi hnenah, “Judah ram an salpomhnak pakhat Daniel in kumpibawi nangmah na upat lo ai na thusuahhnak khai hlun lo i. Nisiar in ni khat ah vel thum sawngen de i,” tiin ti tlang i.

¹⁴ Ciami thu heh kumpibawi in a za fangin a thinnuam lo ai Daniel othilhnak tuhin lampui a phunphun si i. Sunnivui si napui a humthilhnak lampui hmu lo i.

¹⁵ Daniel a engsantute tu kumpibawi hnenah kawi ai, “Kumpibawi, Media le Persia dan a i bangin kumpibawi ai a peciahnak thu tu thleng thil nawn lo i, ti khiah nangmah in ling isi,” tiin ti tlang i.

¹⁶ Kumpibawi in Daniel pom tuhin thupe ai a pom tlang hnuaah chintit tampui khumhnak khawk songah hla i. Daniel hnenah kumpibawi in, “Rinsantlak ngai in na ruaihmi na Pathian in na o tu hram seh,” tiin ti i.

¹⁷ Aisu inkhai o thil tuh loin lungto lianpui pakhat thawn chintit khumhnak khawk khiah kham tlang ai kumpibawi hmingkhenhnak tacik le a bawi upate ai tacik khen tleuh i.

¹⁸ Kumpibawi tu a inn ah tlung leh ai cia zan tu zanvar in it lo i, rong khai ai lo ai nuamhnak zaikhai bawn loin um i.

¹⁹ Zingniu in tho ai chintit khur ah rang ngai in feh i.

²⁰ A hleng fangin thinhar ngai in, “Aw Daniel, a nungmi Pathian naruaihtu! Rintlak ngai ai na ruaihmi na Pathian in chintit ka songin na hup ben awm?” tiin auh i.

²¹ Cen Daniel in, “Aw Kumpibawi, na nunkhua sau tu hram seh!

²² Pathian in chintitte ai ka huptu tuhin a vancungmi hlat ai pakhat inkhai i siatsuah lo i. Sualhnak zaikhai nai lo ai kumpibawi na vumah mawhhnak zaikhai i nai lo manin i,” tiin ti i.

²³ Ciafangin kumpibawi tu a ang ze in Daniel heh chintit kua songin suah tuhin thupe i. A suah tlang fangin tuahmawhhnak zaikhai um lo i ti khiah hmu tlang i. Pathian a rinsan manin him i.

²⁴ Cen kumpibawi in Daniel mawh a hluktute a nupuite le a fate thawn pom in chintit khumhnak songah hla tuhin thupe i. A thupehnak bangin pom ai chintit khumhnak khawk songah a hla fangin laipua rin a hleng man hlanah chintit in bot ai a ruhte tianin hlai berh i.

²⁵ Ciafangin Kumpibawi Dairus in phunkhim, hinkhim le pongkhim a pongtu laivum mi zongzong hnenah lai ngan i: “Ning vumah daphnak um tuseh!

²⁶ I ram song mi zongzong in Daniel ai Pathian khiah upat tuh le kihzah tuhin thupe zo ing. “Amah khiah a nungmi Pathian, Kumzangza in a khomi Pathian i. A ukhnak tu siatsuah tuh awng lo ai a huham tu bo tuh awng lo i.

²⁷ “Mi otu le mi humtu i. Lai le van khuahacang ah, Mangbangkul le khuaruahharkul bawn i. Chintit ka songin Daniel hup i,” ti i.

²⁸ Daniel tu Dairus uk song le Persia mi Cyrus uk songah nainung ngai in um i.