Daniel 3 - Zanniat Bible

Nebuchadnezzar In Milim Biaruai I

¹ Kumpibawi Nebuchadnezzar in, a sang pi sawmkua a kau pi kua milim lianpui khiah sui in bawn ai Babylon peng Dura zawllai ah dah i.

² Cen kumpibawi in a kuthnia ai tlangsuak upa hmuahhmuah: ramkhan uktu bawite, ram uk bawite, ram uktu bawi bawmtute, mangki bawite, tangka awhtute, thukhantute le a dang bawite hmunkhat ah suak tuhin thupe i. Kumpibawi Nebuchadnezzar in sui milim bawnhnak ap hmunah kawi tuh sio i.

³ Bawi hmuahhmuah sui milim ap hmunah kawi tlang ai sui milim hmaiah a ding tlang fangin,

⁴ thuthantu pakhat in aw cawm ngai in, “Phunkhim le hinkhim le pongkhim hmangtu minungte, ngai tu ih!

⁵ Thirhlung tum za tuhai cia sawng fangin titilu, lemlawi, baya, congcing le a pau thai hmuahhmuah a tumhnak khai za tuh i si. Ciatihin awmawi a tum sawng fangin ning lu ut tu ilai kumpibawi Nebuchadnezzar ai a bawnhnak sui milim heh bia tuh i si.

⁶ A lu a ut lotu le a bia lotu heh cia sawngpah in mai songah hlak tuh i,” tiin ti i.

⁷ Ciamanin tumhnak aw a za sawng fangin phunkhim, hinkhim le pongkhim a hmangtute tu amahte lu ut tlang ai kumpibawi Nebuchadnezzar ai sui milim khiah bia tlang dekdo i.

Daniel Ai Rualpuite Mawhhluk I

⁸ Cia can ah Babylon mite in Judah mite thangsiat tuhin can remcang i.

⁹ Anite in kumpibawi Nebuchadnezzar hnenah, “Aw kumpibawi, na nunkhua sau tu hram seh.

¹⁰ Bawipa nangmah in thupe ai awmawi a tum sawng fangin aisusu khai lu ut tuhai sui milim bia tuh i.

¹¹ Lu a ut lotu le sui milim a bia lotu heh mai songah hlak tuh i, tiin ti isi.

¹² Babylon peng uktu le hotu tuhin ṭuanvo na pehnak Judah mite Shadrak, Meshak le Abednego in kumpibawi na thupeciahnak el tlang i. Na Pathian bia tlang lo i, milim na bawnhnak hmai ahkhai ut tlang lo i,” tiin ti i.

¹³ Ciafangin kumpibawi tu a thin raw ze ai ciamite pathum heh a hmaiah koih tuhin thupe i.

¹⁴ A kawi fangin, “Shadrak, Meshak le Abednego, i khuavang bia ning nuam lo ai i sui milim bawnhnak hmai ahkhai ut awng lo i, a tihnak heh thupeu im?

¹⁵ Tun in thirhlung, titilu, lemlawi, congcing le a pau thai hmuahhmuah tum tuhai ciami ning za sawng fangin ning lu ut tu ilai milim heh bia tuh i si. Bia ning nuam hlah lekhaw cia sawngpah in mai songah ning lon tuh i. Ning hup bentu Pathian um i tiin um i sim? ti i.

¹⁶ Ciafangin Shadrak, Meshak le Abednego in, “Aw kumpibawi, he thu ahcen kinmah veve ṭan dun kul in ruat lo i ing.

¹⁷ Maipui songin kin hupbentu Pathian um lekhaw kin biahnak le kin ruaihmi Pathian ian i ai amah in na hathnak huham song inkhai kin hup tuh i.

¹⁸ Kin hup lo inrin, kumpibawi, na khuavangte tu bia tuh lo ai na sui milim bawnhnak hmai ahkhai ut tuh lo i ing, ti khiah kin ling sah cia tu,” tiin ti i.

Daniel Ai Rualpuite Pathum Rek Tuh

¹⁹ Ciatih ai ponghnak tu Nebuchadnezzar in a za fangin a thin sup ben nawn loin, Shadrak, Meshak, le Abednego vumah a thin raw ze in a mithmai san sek i. A minungte khiah thupe ai mizapui ai a sem dehnak tahin let sarih sa tuhin samruai i.

²⁰ Cen a ralkap songah mihat ber minung ril ai ciami Judah mite pathum kutke pen tuhin le mai songah lon tuhin thupe i.

²¹ Ciamite pathum tu amahte angki, bongbi le lukhuk, amahte sillaihnak thilthuam semkhim thawn pen ai maipui songah lon i.

²² Kumpibawi in maipual khiah sa cuang tuhin thu kho ngai in a pe bangin maipual amahte sephnak tu a sa ze ai mite pathum maipual songah a lontute ralkap hat ngai pawl khai mailiau in kang ai thi sek i.

²³ Cen Shadrak, Meshak le Abednego tu amahte kut le ke penhnak thawn maipual songah tlok tlang i.

²⁴ Cen mangrinlo in Nebuchadnezzar tu multing in ding vut i! A kuthnia ai tlangsuakte khiah, “Mite pathum khiah kutke pen in maipual songah lon i ta lo sing maw?” tiin zawt i. Anite in, “I, bawipa, na tihnak bang i,” ti tlang i.

²⁵ Kumpibawi in, “Akontih in maipual songah mite pali vak tlang thliahthlo hmu heh ini ing!” tiin zawt i. “Amahte kutkete khai penhnak ilo ai a ur tuarhnak zaikhai lar fawn lo i; cen a palihnak khai Pathian fapa bang i!” tiin ti i.

Suak Tlang Ai Amahte Naper Kai I

²⁶ Nebuchadnezzar tu maipual sephnak lamai a umhnak kotka lamah feh ai, “Shadrak! Meshak! Abednego! Cungnungber Pathian ai cengfate, suak tu ih!” tiin ko dekdo i. Cen suak tlang vut i.

²⁷ Cen ram uktu bawite, ramkhan uktute le kumpibawi kuthnia ai tlangsuak hmuahhmuah kawi tlang ai maipual ai a tuahmawh lo mite pathum khiah sik tlang dekdo i. Amahte sam fangkhat khai kang lo i, amahte hnikpon khai kang lo ai maikang rim khai nam lo i. Ciami khiah hmu tlang sio i.

²⁸ Ciafangin kumpibawi in, “Shadrak, Meshak le Abednego ai Pathian tu thangphat in um tuseh! Amah a naruaihtu le a rinsantute o tuhin a vancungmi hlat i. Amahte biahnak a Pathian siar lo a dang khuavangte bia le a hmaiah ut tahin i thupeciahnak el tlang ai a nunhnak khai pe ngam tlang sawn i.

²⁹ “Ciamanin tunin thu ning pe ing: Zaibang phun le aisu bang hin le nam ita inkhai, zaibang pong a hmangtu ita inkhai Shadrak, Meshak le Abednego ai Pathian upat lohnak thawn a pongtu um lekhaw a kut le ke hlai tuh sek ai a inn tu hnawmborh pumhnak ah cangruai tuh sek i. Hemi bangin mi o bentu a dang khuavangte akonah khai um lo i,” tiin ti i.

³⁰ Kumpibawi in Shadrak, Meshak le Abednego tu Babylon peng songah a naṭuan kairuai i.