Daniel 2 - Zanniat Bible

Nebuchadnezzar Ai Mang

¹ Nebuchadnezzar tu kumpibawi a canghnak kum hnihhnak ah mang pakhat man i. Ciami a mang manhnak manin a thinhar in mitmu thil lo i.

² Ciamanin a kutrin sikthiamte, a mitkher thiamte, dawithiam mite le arsi sikthiamte khiah a mang lettu tuhin ko i. A hnenah kawi in a hmaiah a ding tlang fangin,

³ anite hnenah, “Mang i man awnghnak in thin i har ze i. A sullam ling i nuam i,” ti i.

⁴ Kumpibawi hnenah a ram pon in, “Aw kumpibawi, na nunkhua sau tuseh. Na mang kin rel tulai a sullam na rel tuh i ing,” tiin ti tlang i.

⁵ Kumpibawi in a hnenah, “I mang le a sullam i rel tuhin i tumhnak le i ruatcat zohnak i. I rel ben hlah le i sikhaw ning kut le ning ke ning hlai tuh sek ai ning innte khai hnawmborh pumhnak ah cangruai tuh sio ing.

⁶ Ikhalselai i mang le a sullam i rel ben le i sikhaw lehsawng le hmingthanghnak ning pe tuh ing. Ciamanin tunah i mang le a sullam i rel tu ih,” ti i.

⁷ Kumpibawi hnenah, “Kumpibawi in na mang kin rel tulai a sullam na rel tuh i ing,” tiin ti tlang i.

⁸ Ciafangin Kumpibawi in aw hrang roh in, “I ruathnak bang ngaingai i si! A can rai deuh tuseh tiin tum tlang i si, zaimantifangin i mang rel ben hlah le i sikhaw,

⁹ ning veksen in cawhhnak a bangvek ning pe tuh ing, tiin i ruatcat zohnak ling manin i si. Can rai deuh lekhaw thu tu thleng deuh tuh ngawn i tiin umlamhnak ning nai manin ningmah lakah lingthiamhnak nai tlang ai thudon lek i rel i si. I mang ziang i ti i rel tu ih. Cen i mang ai a sullam khai i rel ben i si, ti ling tuh ing,” tiin ti i.

¹⁰ Kumpibawi ai thuron mite in, “Hemi laivum ah cen kumpibawi nangmah in na ling nuamhnak heh na rel bentu aisu khai um tuh lo i. Na thuzawthnak bangin zaibang kumpibawi lianber le hat ber inkhai amahte kutrin sikthiam, amahte mitkher thiam le dawithiam mite hnenah zawt awng kel lo i.

¹¹ Kumpibawi pa na thu zawthnak heh a har ze lawmlam manin khuavangte ti siar lo nangmah caah a let bentu aisu khai um tuh lo i. Khuavangte le minung lakah um fawn lo i,’ tiin sawn tlang i.

¹² Cia sawng fangin kumpibawi tu a thinraw, a thintok ai Babylon ram songah kumpibawi ruathnak petute hmuahhmuah rek tuh sio in thupe i.

¹³ Ciatihin kumpibawi ruathnakpetu hmuahhmuah Daniel le a rualpuite tianin rek tuh sio in thupe i.

Pathian In Daniel Hnenah Mang Le A Sullam Rel I

¹⁴ Cen Daniel tu mirektu tuhin ṭuanvo a pehnak, kumpibawi kiltu ralkapte hotu ralbawi Ariok hnenah feh i. Ralring ngai in pong ai,

¹⁵ Ariok khiah, “Zaimanin kumpibawi in hebang thusuah hrang roh suah ini?” tiin zawt i. Ciatihin Ariok in Daniel heh thil umdan hmuahhmuah rel sio i.

¹⁶ Cia sawngpah in Daniel tu kumpibawi hnenah feh ai a mang ai sullam relthilhnak tuhin can rai deuh ngen i.

¹⁷ Daniel tu tlung ai a rualpuite Hananiah, Mishael le Azariah hnenah ciami thulate rel i.

¹⁸ Babylon ram song kumpibawi ruathnak petute thawn rek cih lohnak tuhin le ciami ngaihsunurkul thil amahte hnenah fiangruaihnak tuhin, Pathian hnenah ninghiohnak ngen tuhin rel i.

¹⁹ Cen cia zan rori ah Daniel in larhnak hmu ai ciami ngaihsunurkul thil heh a hnenah fiangruai i. Cen Daniel in vancung Pathian thangphat i.

²⁰ “Pathian tu fim ai huham nai i, Kumzangza in a kumzangza tian ani tu thangphat tu ih!

²¹ Amah in can le tikcu bawn i; Kumpibawite din ai amah in tolhruai leh i. Fimhnak le lingthiamhnak a petu heh amah i.

²² Thuthuk le thuthup khai Amah in larruai sio i. Khuathim lakai thuphnak khai Amah in ling sio i. Amah tu tleuhnak in kulh i.

²³ Aw i pu le i pate ai Pathian, Nangmah khiah thang na phat ai na upat ing. Nangmah in fimhnak le hathnak i pe isi. I sawngenhnak i ngai sah ai Kumpibawi hnenah rel tuhhnak khai i rel zo isi,” ti i.

Daniel In Kumpibawi Rel I

²⁴ Daniel tu kumpibawi ruathnakpetu rek tuhin ṭuanvo pehnak Ariok hnenah feh ai, “Rek malaw, kumpibawi hnenah i fehpui tulai a mang ai sullam khiah rel tuh ing,” tiin ti i.

²⁵ Cia sawngpah in Ariok in Daniel heh kumpibawi Nebuchadnezzar hnenah fehpui ai, “Kumpibawi, Judah saltanghnak lakah na mang let bentu tuh pakhat tawk zo ing,” tiin ti i.

²⁶ Kumpibawi in (Belteshazzar ti inkhai kohnak) Daniel hnenah, “Ziang mang man ing tihnak le a sullam i rel ben nga sim?” tiin zawt i.

²⁷ Daniel in, “Aw kumpibawi, na mang le a sullam na rel bentu aisu khai um lo i; mifimte ituseh, mitkher thiamte ituseh, kutrin sikthiam le arsi sikthiam ituseh, aisu khai um lo i.

²⁸ Ikhalselai vancung ah, mangbangkul thil a relfiang bentu Pathian um i. Amah in kumpibawi, na hnenah hmai lamah a cang tuhhnak thu na rel cia i. Na mitmu lai ai na manhnak na mang tu na rel tuh ing.

²⁹ “Kumpibawi, na mitmu lakah hmai lam thu man isi. Cen ngaihsunurkul a larfiangruaitu Pathian in hmai lamai a hleng tuhhnak thil na hmuh i.

³⁰ Hemi thil tu i hnenah a relfianghnak i; kaimah heh midang tahin i fimber manin ilo i, ikhalselai kumpibawi nangmah in na mang ai a sullam khiah na lingthilhnak tuhin le na hnenah a hlenghnak ruathnakte heh na lingthilhnak tuhin hetihin a relfianghnak i.

³¹ “Aw kumpibawi, na mang ah a lian le aicankul, a var ngai le a tleu ngai, ikhalselai sik fangin a kihkul milim pui na hmaiah a ding khiah hmu isi.

³² A lu tu sui ciang in bawnhnak, a sohnar le a kut tu ngun in bawnhnak, a el le a kawng tu dar in bawnhnak;

³³ a kete tu thir ai bawnhnak i ai a kezapham tu thir in a hrek, laisawr a hrek ai bawnhnak i.

³⁴ Ciami milim na sik ngelngo laitak ah aisu inkhai dai loin lungpui pakhat khiah amah hlanlam in leu ai thir le laisawr ai bawnhnak a ke heh vawr ṭhak ai parh sek i.

³⁵ Cia sawngpah in thir le laisawr, dar le ngun le suite tu khoi sek ai khuakhal cu fangrialhnak hmunai laivut bang ah cang sio i. Ciami laivut tu hlivua in a niah tlawmniu tal tang lo tianin hmut sek i. Ikhalselai ciami lungto tu khang zianzo ai tlang lian ngai ah cang i; cen laivum pumpuhluk khuk sio i.

³⁶ “Na mang tu ciami i. Aw kumpibawi, na mang ai a sullam tu tunah na rel tuh ing.

³⁷ Kumpibawi, nang heh kumpibawi hmuahhmuah lakah a lianber le a thawmlianber isi. Vancung Pathian in kumpibawi lakah bawi ber in na bawn ai huham le hathnak le hmingthanghnak khai na pe i.

³⁸ Minung umhnak laivum hmuahhmuah uktu ah na bawn ai ramsa le vaniu vum ahkhai uktu tuhin na bawn i. Nangmah heh a lu ai sui khiah isi.

³⁹ Na hnuaah ram uktu um tuh napui nangmah ai ram ukhnak tluk in a thawmlian tuh lo i. Cia hnuaah ram uktu pathumhnak um tuhai laivum pumpuhluk uk tuh i. Ciami tu dar ram ukhnak i tuh i.

⁴⁰ Cia hnuaah ram uk palihnak um tuhai thir tluk in hat tuh i. Ciatihin a hat manin zaizongza seu tuhai tat tuh sek i. Thir in zaizongza a seu sek bangin cia hlanai ukhnak hmuahhmuah seu in khoi tuhai a vut in rial tuh sek i.

⁴¹ Cen na mang in na hmuhnak bangin a ke le a kezungte tu a hrek thir, a hrek laisawr i. A sullam tu ciami ukhnak khiah a khan dun ukhnak i tuh i, tica i. Thir bangin hathnak nai tuh ve i, zaimantifangin thir le laisawr roih dun manin i.

⁴² A kezungte tu a hrek thir, a hrek laisawr i ai a sullam tu ciami ukhnak khiah a hrek hat tuhai a hrek tu ṭawnṭai tuh i tihnak i.

⁴³ Na hmuhnak bangin thir tu laisawr thawn a roihhnak i. A sullam tu ciami ram ukhnak ai uktu bawite in hin khat le hin khat komdunhnak ah hin dangdang hoidunhnak bawn tum tuh i tihnak i. Ikhalselai bawn ben tuh lo i, zaimantifangin thir le laisawr tu roih dun thil lo i.

⁴⁴ Cia ram uktu bawite in ram a uk fangin vancung Pathian ai a bo awng lo ukhnak umruai tuh i. Aisu inkhai ciami ukhnak tu neh tuh lo i; ikhalselai ukhnak dang hmuahhmuah siatsuah tuh sek ai kumzangza in kho tuh i.

⁴⁵ Na mang ah aisu inkhai dai loin tlang vumai lungpui tu amah hlanlam in leu ai thir, dar, laisawr, ngun le sui ai bawnhnak milim a seu khiah hmu isi. A thawmlian mi Pathian in hmai lamai a hleng tuhhnak thil khiah kumpibawi nangmah na rel i. Na mang manhnak cekci na rel zo ing; cen a sullam khai dik ngai in na relfiang zo ing,” tiin ti i.

Kumpibawi In Daniel Lehsawng Pe I

⁴⁶ Cen kumpibawi Nebuchadnezzar tu laipua ah bok ai Daniel hnenah hibawlhnak le thil aphnak pe tuhin thupe i.

⁴⁷ Kumpibawi in, “Hemi Pathian tu Pathian dang hmuahhmuah lakah a thawmlianber i; kumpibawi vumah Bawi i ai mangbangkul thil relfiangtu Pathian i. Hemi tu ling ing, zaimantifangin mangbangkul thil nangmah in relfiang zo isi,” ti i.

⁴⁸ Cen Daniel tu naṭuan lianpui pe ai lehsawng mankhung ngaingai a pe hnuaah Babylon peng hotu ber ah bawn i; kumpibawi thuron mite lakah hotuber ah bawn fawn i.

⁴⁹ Daniel ai ngensahhnak thawmin Shadrak, Meshak le Abednego khai Babylon peng thula tawlreltu ah kumpibawi in bawn i. Daniel tu kumpibawi inn ai napertu ah um hlen ihang.