Daniel 12 - Zanniat Bible

Can Tawphnak

¹ Pon fem ai bawnhnak hnikpon a siltu vancungmi in, “Ciami can ah na minung a kilkhawltu vancungmi thawmlian Michael lar tuh i. Hemi miphunte hnenah amahte thawhkehhnak ai panin a tawk awng lo harsahnak roh ngai hleng tuh i. Ciami can a khim fangin Pathian laibu songai hming ngan mi na miphunte tu o tuh i.

² A thi cia zo minung tampui nung leh tuh i; mi hrekkhat tu kumkhua nunhnak co tuhai hrekkhat tu kumzangza zakthihnak tuar tuh i.

³ Hotu mifimte tu van ai tleuhnak hmuahhmuah thawn tleu tuh i. A dikcang bawn tuhin mi tampui a zirhtute arsi bangin kumzangza in tleu tuh i,” ti i.

⁴ Cen i hnenah, “Daniel, tunin laibu khup tulai laivum a bo hlanlo aisu inkhai hong tuh loin a vumah tacik khen tu. Minung tampui in thil canghnakte heh a sullam ling tum tuh napui amahte zuamhnak tu a lovang cang tuh i,” tiin ti i.

⁵ Cia hnuaah runpui kamah mite pahnih ding kawm hmu ing; nak khat ah pakhat veve in ding i.

⁶ Cia mi pakhat in runpui vum lamai a dingtu vancungmi hnenah, “Hebang khuaruahhar thilte a bo hlanah tikcu zaicam tian rai tuhlai ini? tiin zawt i.

⁷ Vancungmi in a kutte pahnih van lamah hlir in Kumzangza Pathian hming sal in thukhamhnak bawn ai, “Kum thum le a hrek um tuh i. Pathian minungte cawhhnak a bo fangin he thil hmuahhmuah khiah khim tuh sio i,” a tihnak za ing.

⁸ Ciatihin a tihnak tu za napui a sullam ling thil lo ing. Ciamanin, “Bawipa zaibangin a tawphnak i tuh ini?” tiin zawt leh ing.

⁹ Ciafangin ani in, “Daniel tunin feh tu, zaimantifangin he thute tu can tawphnak a hleng hlanlo aisu inkhai ling tuh loin thup ai tacik khenhnak i tuh i.

¹⁰ Mi tampui tu cianghlimhnak ngah tuh i. Mihrokhrawl pawl incen ling thil tuh lo ai hrokhrawl tuh amam i; ikhalselai mifimte incen ling thil tuh i.

¹¹ “Nisiar hibawlhnak hlum i, ciami tu anite in Ningdul Tihikkul a bawn tlang ai panin, ni thawng khat le zahnih le sawmkua liam tuh i.

¹² Ni thawng khat za thum sawm thum le ni nga a bo hlanlo rintlak in a nungtute tu mihmuifu i!

¹³ “Cen nang Daniel, a tawp tian rintlak in um tu. Laivum na nunhnak tu bo tuh i, ikhalselai can tawphnak ahcen lehsawng co tuhin tho leh tuh isi,” tiin i ti i.