Daniel 1 - Zanniat Bible

Daniel Le A Rualpuite Thu ( 1:1—6:28 ) Nebuchadnezzar Inn Ai Um Tlangvalte

¹ Jehoiakim in Judah kumpibawi a ṭuan kum thumhnak ah Babylon kumpibawi Nebuchadnezzar in Jerusalem khuapui khiah tawng ai kulh sio i.

² Bawipa in kumpibawi Jehoiakim khiah pomruai ai Biakinn thilri le hlawnthilte hrekkhat langruai i. A pom mite tu Babylon ah fehpui ai Biakinn thilri a langhnakte khai khuavangte ai biakinn thilri dahhnak khan ah dah i.

³ Kumpibawi Nebuchadnezzar in a kuthnia ai tlangsuak lianber pakhat Ashpenaz heh ralpom mi le thawngtohhnak Israel mite songin kumpibawi hin le bawi phun, mino deuh pawl ril tuhin thupe i.

⁴ Mipiang, mifim, zaizongza ah zirhnak a naiciatu, mifimvar le kutke him i tuhai kumpibawi inn ah naperthaitu i tuh i, tiin ti i. Babylon pong siar thiam le ngan thiam tuhin Ashpenaz tu amahte zirhtu i tuh i.

⁵ Nisiar in amahte aih tuh le din tuhhnak tu kumpibawi inn ai aih le din rong le zu i tuh ve i. Ciatihin kumthum zirhnak a nai tlang hnuaah kumpibawi hmaiah suak tuh i, tiin thupe i.

⁶ Ciatihin a ril mite lakah Daniel, Hananiah, Mishael le Azariah tel ve i. Anite pali in Judah hin in i.

⁷ Amahte bawi upa ber in anite khiah hmingthar bawt ai amahte hmingthar tu Belteshazzar, Shadrak, Meshak le Abednego i.

⁸ Daniel in kumpibawi inn ai rong ai in le zu ding in cianghlimlo mi cang tuh loin a thinlung khancat dun i; ciamanin Ashpenaz heh amah bawm tuhin ninghio ngen i.

⁹ Ashpenaz khai Pathian in Daniel vumah ninghiohnak thinlung nairuai i;

¹⁰ ikhalselai Ashpenaz in kumpibawi a kih manin Daniel hnenah, “Na aih tuh le na din tuh heh kumpibawi amah rori in relcat i. Ciamanin tlangval dang bangin ning cakvak pang hlah lekhaw kaimah sawn lam i rek thaipang tuh i,” ti i.

¹¹ Ciafangin Daniel khai amah le a rualpuite pathum siktu tuhin Ashpenaz in mikiltu ah a dahhnak pa hnenah feh ai,

¹² “Ni hra song i cu tu. Aih tuhin thinghnah thingthai le din tuhin tidap kin pe tu.

¹³ Cen tlangval dang kumpibawi inn ai ti le rong a ding a aitute thawn kin teh tucuk lai ciami vuman thukhan leh tu,” tiin ti i.

¹⁴ Amahte kiltu pa in ni hra song cu tuhin a lungkhim i.

¹⁵ Ni hra khim ai a sik fangin kumpibawi inn ai ti le rong a aitute tahin nuncak sawn le hat sawn in lar i.

¹⁶ Ciamanin cia nia ai panin amahte kiltu pa in kumpibawi ai pehnak rong ilo in thinghnah thingthai airuai hlen ihang.

¹⁷ Pathian in he tlangvalte pali khiah fimhnak, lai thiamhnak le ruatthiamhnak pe i. Ciami vumah Pathian in Daniel tu mang letthiamhnak le mang hmuhhnakte relfiang benhnak khai pe i.

¹⁸ Kumpibawi in can a thiahhnak kum thum a khim fangin Ashpenaz in tlangvalte tu Nebuchadnezzar hnenah fehpui i.

¹⁹ Kumpibawi thawn thuruah dun tlang ai midang hmuahhmuah tahin Daniel, Hananiah, Mishael le Azariah tepawl in a thinkhing ber i. Ciamanin kumpibawi inn ai napertu tuhin cang tlang i.

²⁰ Kumpibawi in zaibang thu zawt ai, zaibang thu harsa a suah inkhai he tlangvalte pali in a ram ukhnak songai kutrin sikthiam le mitkher thiamte tahin a let hra in ling thai sawn de i.

²¹ Persia Kumpimangbawi Cyrus in Babylon a neh tian Daniel tu kumpibawi napertu ah um lanta i.